Read Nyishi AIJAYA 53 Bible Online

AIJAYA 53 - Nyishi bible

AIJAYA 53

¹Hoggv ngulug soqgv tapan hiyv ham mwwjw pakun? Hoo hiyam At Swg laqpongam kaakin pakun?

²Hoggab mwwg agaho mwv svvn apa swwrabnam hvb swwarbnum, hoo rwbv deela ho mialinam hvb nyinum; mwv yuunam apo gob nyigam gab mwam ngulv tuugab maadwn, hoo mwv kangam ko-gab mwam ngulv mwwby maadwn.

³Mwam nyi tulungv benyi-beyanv hoo haqpaqnum; mwv mwwdwq bvla hentwr henam mam cengky bo nyi gob nyinum; hoo mwv nyia ko tulug nyuqtuq-moor kvvrwq dvb nyimanum, mwam nyij-nyiparnum hoo ngulv mwam ximab nyinum.

⁴Jvqtw jaqb mwv ngulug hentwram la mwwdwqkam baqg nukun; hvbsujaqkam ngulv mwam laqm-baqmnum, Pwnbov mwam ximwql mvtwl hentwr hemnum.

⁵Hvbmabde mwv ngulug nyic gab uun gvnum; mwam ngulug nyixiaq ko-gab vmwq-yumgub mvknum; mwwg laqm-baqgam gab ngulam swrsongam baqa jipa kun, hoo mwwg laqm baqgam gab ngulam mwp pakun.

⁶Ngul mwlwngv sviya gaqxarbo hvb gaqxar kunum; ngul nyiicwr-cwrxiv at-atwg lamtab wnum; hoo At Sw ngul mwlwg nyixiaq gorgiam mwwg aoho tulwq kunum.

⁷Mwam bejab-biyiqnum, hoo mwam hentwr hemnum, hvbsujaqkam mwv mwwg agam mam gomd maanum; patab deenbo lvgab sviya kov cooikab wmin gvnam hvb wnum, hoo patab deenbo agaho sviya dorv cooikab doonam hvb doonum, hoo mwv mwwg agam mam gomd maanum;

⁸Mwam bej-beparl hoo pw-hwwtab bool wg kunum; hoo mwwg hotam mam swwl dook nyook hoqgv mvpaq gvibo hvl hiyv kam mwwmanum, ngoqg nyiilug nyic ko-gab mwam laqm baqm pakun?

⁹Hoo nyic bo lvgab mwwg nyubungam mvtaqnum hoo nyetbo nyi akwg lvgab mwwg svmangam liinum, mwv hog yolu-swcin guunyi nyi gob nyima su hoo mwwg agam lo xaalyonam doomanum.

¹⁰Hvbsujaqkam mwam vmwq yumgub mvdwb At Swg mwwlwq kunamv; mwv mwam mwwdwq opum mam vlwq jinum; mwwg swwgam nyic ko-gab aky jipaqnum, mwv mwwg ko hosiqkam kaapa tayin; mwv mwwg aalam swwiyu dvb mvtayin; At Swg mwwlwqnamv mwwg alaqho swwta-geetayin.

¹¹Mwwg mwwdwq-dwql swwnam mam mwv kaatwl hoo xumtnum; mwwg cengnam hoqgv ngoqg nyera akv dvrwq tayin, ho naleqgo nyiidar nyi gob xitaq pakun, hoo bulug nyixiaqkam mwv baqtayin.

¹²Hoqgab ngo mwam mvqlwg pengko ho mvpin-mvra tayin, hoo atorbo pengko ho mwam pareql naanam mam mvpin-mvra tayin, hoggab mwv mwwg swwgam sidwb jipaqnum hoo nyic-nyiya bo nyi tulu lvgab mwam xitaqnum; hvbsujaqkam mwlwg nyic gab mwv laqm baqnum, hoo nyic-nyiya bo nyi tulu gab hvvky gob nyim dvn.