Read Nyishi AIJAYA 54 Bible Online

AIJAYA 54 - Nyishi bible

AIJAYA 54

¹“Bemin to, twrngum bo aka, hiyv ko bwwma dvn; hiyv no cinc cika maadwn, bemin besor gvdwl hoo vcjaqb sogoq to! Hoggab nyem naal ko doonam tulungam yos-dvconam ko tulungv naleq yaatayin,” At Sw bedo.

²“Noqg doogwngam goqta dvb mvto, hoo noqg piuaram taqt dvb tiqlin to; kwrl doog maabv; noqg osongam aaso dvb sorlin to hoo noqg hvqgwnan tulungam hwngkw dvb mvto.

³Hoggab noqg laqc lvqbwqb no koi dvb ywwta mvto, hoo noqg ko hosiqkv nyob tulungam hoo nyiilug apaq kunam bopam tulungam otu bwwsiq tayin.

⁴“Bos maabv, hoggab no hvnyw moolw ram; mwwdar-saqpar maab nyimabv, hoggab no hvnyw-har ram; noqg nyijwr-yaapa hoqg hvnywngam no mwwpa kuram, hoo nam xwwmy gob benyi-beya kunam mam no nywywngam mwwpa kuram.

⁵Hoggab nam Pwnbov noqg nyolv, nyiit At Sw mwwg eminv; hoo nam Pvlyw bov Israelwg Dvrwqbo akv, swcw mwlwngv Pwnbov hvl mwam goqdwn.

⁶Hoggab nywxw akam haqpaq yukam hoo hang mwwdwq dwql goqnam hvb, At Sw nam goqpa kun, yaapa akv nywxwngam haqpaq yukam mwnwg mwwdwq dwql sogoql goqnam hvb, noqg Pwnbov bedo.

⁷Anyo mood gob ngo nam haqpaq pan, hvbmabde vcjaqb hang biigam gab ngo nam bookum tayin.

⁸Ngo vcwr mood gob hang lingtwr ko-gab ngoqg nyuqm mam noqg hoqgv ngo kvsdvn, hvbmabde kuiyum xaqb abynam hoqgv ngo nam hang biidwn,” nam Pvlywbo, At Sw bedo.

⁹“Soq si ngam Noag moodho nyinam hvb nyido: Noag swwca ho sa-hindu issiv swcwngam hinglupnam hvb lokta hinglup mvma dvb ngo dingrnum, ho ngo nam haaxaq kuram hvl ngo dingr pakun, hoo nam yolu ruqkram.

¹⁰Hoggab puutu tulungv wleq jaqkam hoo yorn tulungam mvpaq jaqkam, hvbmabde ngoqg tumanam abynamv noqg hoqgv wleqram, hoo ngoqg birnam swrsongv noqg hoqgv mvpaqram,” hiyv nam hang biinbo, At Sw bedo.

¹¹“Likub-lexeq dvb la swrso dooma dvb mvnum, hentwr henbo aka, kaato, ngo noqg wlwngam kwlwq-kvlaq dvb mvtayin, hoo noqg gwwlam sappir tulu lvgab ywrtayin.

¹²Ngo noqg viyap yabtam mam agat lvgab mvtayin, noqg viyap toggoq tulungam karbunkel tulu lvgab mvtayin, hoo noqg cwqc mwlwngam xinam wlw tulu lvgab mvtayin.

¹³Noqg ko mwlwngam At Sw tomswr tayin, hoo koijaqb noqg ko tulungv swrso tayin.

¹⁴Jvqtw dvrwqb swwnam ho no dootayin; nyijab-nyiyiqnam hoqgv no aado tayin, hoqgab no bos kuram; hoo vcjaqb bosnamv, noqg ogumb hvvnwq kuram.

¹⁵Nyi akgon jwwnwnamv raarab baloqkam, hoqhv ngoqg hoqgv ma; hiyv lajaqkam noqg lvgab jwwnwl raarabov noqg doogam gab yoql tayin.

¹⁶Kaato, hiyv wm mopiongam miqwrl yip pwnbo akam ngo pwp pan hoo hoq pagoq gab nyinnan dupum-dvrab pam mvlin pan. Ngo sipai tulungam hoqham twrm dvb kam ngo pwlin pakun;

¹⁷nam ceebio baqn mvdwb nwwxo-svtam mvnam hv niqtuq lengram, hoo nam pw-hwwk ho gvmcw-gamt goonam mam no liipaq tayin. Soq si At Swg nyera tulug otu nvvsiq deenamv hoo bulam nyiidar nyi gob mvnamv ngoqg galoqkv, At Sw bibwqdo.”