Read Nyishi AIJAYA 55 Bible Online

AIJAYA 55 - Nyishi bible

AIJAYA 55

¹“Haato, hvngwrbo nyiicwr-cwrxiv, iss dookub haato; hoo hiyv twngk dooma bov, haato, rvto hoo dvto! Haato, twngk dooma jaqkam hoo kor jima jaqkam, roo ala ngamla gwwiyam naanyib naato.

²Hoggub nulv dvd maanam ho nulug twngkam bwqsam-yaqsam dvn, hoo nulug hang xumt maadynam bonam nyidwn? Hingky jaqb ngam tagabto, hoo hoggv aldvn ham dvto, hoo nulv atv dwjw bo dvs ho hempto.

³Nulug nyurungv ruucw kwrgabl, hoo ngoqg dookub haato; tato, nulug yvjv swwkam yinpv; hoo kuiyum xaqb birnam mam nulug lvgab ngo mvtayin, jvqtw jaqb ngoqg tumab abynamv Debid gab doodwn.

⁴Kaato, ngo mwam nyiilug agaho hvvky akwb mvnum, nyiilo nyi bvla nyiilungam gaml jinbo akwb mvnum.

⁵Kaato, noqg cengmanam nyobam no goqtayin, hoo nam cengmabo nyob akv noqg dookub xvrlwq tayin, hoggab hvbnyiloqkam noqg Pwnbo At Sw, hoo Israelwg Dvrwqbo Akv, mwv nam yuum dvb jipa kun.

⁶“At Swn meegaqto mwam meepa kamyi nvpv; mwv ogumb dooikam mwam goqto;

⁷nyic bov mwwg lamtangam apaq tuku, hoo mwwmur bov mwwg mwwjam apaq tuku; mwam At Sw dookub tobkur mvto, ho mwwg aoho mwv hang biikam yinpv, hoo ngulug Pwnbo dookub haato, hoggab mwv xila maadwb apaq jitayin.

⁸Hoggab ngoqg mwwjv nulug mwwj hvb nyima dvn, ho nulug lamtangv ngoqg lamta ma, At Sw bibwqdo.

⁹Doangv hwdgo swcw soqgv ao dvn hwdkalam ngoqg lamtangv nulug lamtangam ao yaadwn hoo ngoqg mwwjv nulug mwwjam ao yaadwn.

¹⁰“Nyodongv la tapamv doa ao toloqkv yaql dvn hoo cookur kuma dvn hvbmabde swcwngam iss jidwn, ho swcw so nwmw-nwsinv buqlin dvn, aaxy-amaram iss jaayaq dvn hoo dvn boam dvs jidwn,

¹¹hoq hvbkalam ngoqg gomcwrv ngoqg agam soqgv lengn bov; ngoqg dookub hoqhv asarb hookur kuram, hvbmabde hoqhv ngoqg mwwrnam mam niqtuq nyilin tayin, hoo hoq pagoq gab ngoqg kanam nvmlwqnamv niqtuq lengtayin.

¹²“Hoggab nulv hempwl lvvgwb lengtayin hoo swrso ho wgtayin; puutu ngvla yorn tulungv nulug agaho beminam belin tayin, hoo nyorog svvn mwlwngv pwjwr-labtwrl biitayin.

¹³Taa kwlib saipres svvn tulungv swwlin tayin; kiib-rupum kwlib swiywq nyam-nyambo nwmwngv swwlin tayin hoo hoqhv At Sw eminam dooky mvtayin, kuiyum xaqb doom dvb muxnam mam mvpaqram.”