Read Nyishi AIJAYA 57 Bible Online

AIJAYA 57 - Nyishi bible

AIJAYA 57

¹Nyiidar nyi akv yuupaq dvn, hoo ham hiyv kam hang biima dvn; dormo nyi tulungam naapaq dvn, ham hiyv kam cengma dvn. Hoggab nyiidar nyiingam dwr-kano hoqgv naagin pakun;

²mwv swrso uraho haadwn; hiyv bulv jvqtwho wdwn bulug yubk ho bulv doonu dvn.

³Hvbmabde nulv, nyioky nyubwg ko tulu, bwwxinbo la yocu dvnwg ko hosiq tulu, ogumb hvvnwqto.

⁴Hiyvn nulv bej-bepar bidu dvn? Hiyvn nulv ceekol nulug agamv gamk rooto tvl haql doodwn hoo nulv lyomeq-lyaleql bel doodwn? Nulv nyimurbog ko tulu maai yv, xaalyo bog ko hosiq maangv yv,

⁵nulv kor svvn gvla jeenyeqbo svvn tulug niikum lo yos-dvpeql nyidwb mwwby keedwn, hiyv nulug ko tulungam haapa hoola bwdwg wlw uraho mengpaq dvn?

⁶Haapag lvliq-mvmiqbo wlw tulungam nam xibwql jilin pakun; hoq tuluhv, hoq tuluhv, noqgab nvtaqnamv; hoq aoho noqg twwnam akiam tooiyaq pakun, no cwrm akiam baqpa pakun. Ngo hoq pagoq tulu gab hemp tai nvi yv?

⁷Ao bvla kangam bo puutu tulug aoho noqg kartam mam no mvl ap paku, hoo hoqho pwram jitab no caanum.

⁸Viyap langk hoola yabtamho noqg swwi-geecangam no mvl ap pakun; hoggab no ngam haqpaqnv, noqg kartam mam twqbin paku, no hoq namgub wpa ku, no hoqham taqt dvb mvpa ku; hoo bulug lvgab no atv birnam agam mam bir paku, no bulug kartam mam aby do, no talo boam kaagab paku.

⁹No lvpw at dookub kuty lvgab nyoyw wnum hoo noqg sungam bo kuty tulungam naleq dvb mvnum; noqg pootam tulungam no aado jaqb kanamnum, hoo Sux-ywlw namgub kanam namlnum.

¹⁰Noqg lamta aadongam no mwwdwqnum, hvbmabde no hvl bemanum, “Soq si mwwgw dooma bo go”; noqg ator gab no nit swwgam kaapanum, hoo hoqgab no swnyiq-svnyiaq maanum.

¹¹Hiyvn no bosil tvmdwrnum, hoo no vm mvvnum, hoo ngam mwwpa maaknum, ho hangho pvvmanum? Ngoqg swrsongam, ngo oyu mood gob parl ap maan mvi yv hoo no ngam bos maadwn?

¹²Ngo noqg dvrwqb swwnam mam la noqg nyis nyinam tulungam bibwq tayin, hvbmabde hoq tuluhv noqgab niqtuq dooram.

¹³Hwdlo no svka gab xabyikam, noqg nookumnam murty tulungam nam ywwlin koto! Dooiyv hoq tulu ham nuupaq tayin, hoq tulu ham saqdaqho miqpaq tayin. Hvbmabde hiyv ngoqg uraho cwwgw dvn hv gvdangam otu nvvsiq tayin hoo ngoqg dvrwqbo puutungam gumn bwwsiq tayin.

¹⁴Hoo hoqhv betayin, “Mvrabto, mvrabto, lamtangam mwx-mvaqto, ngoqg nyiilug lamta hoq duqtup-lurup mwlwngam mvpaqto.”

¹⁵Hoggab soq sam ao jaqb yuum dvb mvnum Akv, ho hiyvg eminv Dvrwql, nwrba cwtam gob doon bov bedo: “Ngo ao bvla dvrwqbo gvdaho doodwn, hoo hiyv mwwkurl hoo yanwb hang baqnbo lvg bvkam dooba dvn, yanwb hang baqn boam swwdar mvtayin hoo hang mwwkur boam swwdar mvtayin.

¹⁶Hoggab ngo nwrba gob bei kuram, ho ngo lwxiam haaxaqram; hoggab yvjv ngoqg agalo ngadku, hoo swwgwg saqnam mam ngo pwnum.

¹⁷Mwwg kvtaqb nyimab nyixiaq layil swwgam gab ngo haaxaqnum, ngo mwam jwwnum; ngoqg nyuqm mam ngo kvsnum hoo haaxaqnum, hvbmabde mwwg atwg hang mwwkwb mwv nyinv wkur kurdu dvn.

¹⁸Ngo mwwg lamtangam kaapa kun, hvbmabde ngo mwam mwp tayin; ngo mwam wgtayin hoo mwwg mwwdwqbo tulungam bet-bela boam jikur tayin.

¹⁹Aado-koc doonbo mwlwngam, swrsongv, swrsongv hvl bekar mvdwb, nvbcwrg aaxiam xeelin mvtayin,” At Sw bedo, “hoo ngo mwam mwp tayin.

²⁰Hvbmabde nyic-nyiabo tulungv sa-svlog suduq duqnam hvb nyidwn; hoggab hoqhv cooikab doonyiram, hoo hoq issiv kac-kanyiaqkam hwqkub-hwqxeq dvn.

²¹Nyic-nyiabo gab,” “hoqho swrso dooma,” ngoqg Pwnbo bedo.