Read Nyishi AIJAYA 58 Bible Online

AIJAYA 58 - Nyishi bible

AIJAYA 58

¹“Vcjaqb sogoql; xaxaq jaqb belinto; noqg sogoqnam yalam tuuly miqnam dumto; ngoqg nyiilug bulug nyimurnam mam, ho Jakubg nombu ho bulug nyic tulungam bibwqto.

²Hvbsujaqkam bulv ngam looxiam meegaq dvn hoo ngoqg lamtangam cengdwb hemp dvn, bulv jvqtwngam nyinbo nyob akv hvb hoo bulug Pwnbog pw-hwwnam mam haqpaq maanbo hvb nyidwn; bulv jvqtw pw-hwwnam mam ngam kodwn; bulv Pwnbo ogumb hvvnwq dvb hemp dvn.

³‘Hoggub ngulv vrr rwdwn, hoo no ham kaama dvn yv? Hoggub ngulv atv yan sudwn, hoo hoqham no cengma dvn yv?’ Kaato, nulug vrr rwd aalam nulug atwg mwwlwqkam nulv meegaq dvn, hoo nulug bonam nyinbo mwlwngam nyijab-nyiyiqdo.

⁴Kaato, nulv yolu dud bvla paiyaq mins twqdwb dery reedo hoo nyic-nyia lvgab jwwmin sudwn. Soolo soq sib nyil dery reenam sam ao toloq doon bov nulug yalam taparam.

⁵Aal lookin go nyi akam mwam atam yan mvdwb, ngo soq svkwg dery rwnam sam xuqlin pan yv? Soq si mwwg dumpongam tvtwq nwwbu pvxwnam hvb pvxw mvd nvi yv, hoo tuila vjam taabor tvl hoo muiyam mwam taaiyaq mvd nvi yv? No soq vrr rwnam sam vrr rwnamv hvd nvi yv, hoo At Sw hoq aalam loorwq pan hvd nvi yv?

⁶“Soq vrr rwnam sam ngo xuqlin maap nvi yv: nyic-nyiag osongam toosuq mvdwb, gorbwg vgwngam tupaq mvdwb, nyijab-nyiyiqnam tulungam saqsor mvdwb, hoo gorgy baqnbo vxiam mvpaq jidwb?

⁷Noqg dvsam kano bo tulug lvgab dvg mvma dvb yv hoo nam doomab jwwgw boam noqg namho boolwq mvma dvb yv; hwdlo no talo boam kaapayin, mwam koolup mvma dvb yv, hoo noqg atwg nyi tulu hoqgv noqg nyuqm mam kvs maabv?

⁸Ho noqg hutongv ar komcam dou huulin bo hvb nyitayin, hoo nam mwpnamv nyebia subuq buqlin tayin; noqg jvqtwngv noqg otuqb wco tayin; At Swg yuunamv noqg xinam gurum gob nyitayin.

⁹Ho no goqtayin, hoo At Sw birwq tayin; no xabtayin, hoo mwv betayin, ‘Ngo si doodwn.’ Noqg pengko hoqgv noqg vgwngam, lvqc ponyi-nyokumnam mam, hoo bec-beya benam mam no apaq baloqkam,

¹⁰noqg dvsam kano boam no atv jipaql hoo hentwr henam mam mwungul xumt baloqkam, ho noqg hutongv kan uraho huurab tayin hoo noqg moosw rwbwnamv aal lvpa hvb nyitayin.

¹¹Hoo At Sw nam lwxiam kaal wgtayin hoo deexa-rara nyook lo noqg mwungnam mam xumt dvb mvtayin hoo noqg alongam ator dvb mvtayin; hoo no boolu iss tookynam hvb, iss subuq buqlinbo hvb nyitayin, hoqho issiv xooram.

¹²Hoo noqg kolwg yuupaq kunbo tulungam mvdar tayin; no ko hotamg gwwl dvqgwngam naleqgo mvrab tayin; nam yaqpia boam mvdar bov hvl, ho lyobu tulug lamtangam nam dookub mvdar bov hvl goqtayin.

¹³“Noqg lvpiangam Doonunam hoqgv no wkur baloqkam, hoqgv ngoqg dvrwqbo aalam noqg mwwlwq kob nyib nyiloqkam, hoo Doonunam mam hempv hvl goqb nyiloqkam hoo At Swg dvrwq aalam xibnyiloqkam; noqg atwg mwwkwb nyimab, hoqham no xibnyiloqkam, ho noqg atwg mwwlwq kob goomab nyib nyiloqkam, ho agam goosam-gooiyam maab nyib nyiloqkam;

¹⁴ho no At Swg uraho hemp baloqkam, hoo ngo nulam swcw nvg aoso mwlwngam xibin yaanam gob mvtayin; noqg ab Jakubg gumn otu hoqgv ngo nam hootayin, At Swg agam jaqkv soq sam bepa kun.”