Read Nyishi AIJAYA 6 Bible Online

AIJAYA 6 - Nyishi bible

AIJAYA 6

¹Lvpw at Ujjayag sid vnywho ngo At Swn ao bvla yuunam pwqlw aoho doodu dvb kaapanum; ho mwwg vjv aaso kiyo dvb dvrwqbo namlongam soryumnum.

²‍Mwwg odumho Serapimv daqnum. Vxiv alap labx go gvnum: hoqg alap lvbnyi gon lvgab mwwg nyuqm mam lobyumnum, hoo hoqg alap lvbnyi gon lvgab mwwg lvpiangam lobyumnum, hoo alap lvbnyi gon lvgab mwv jarnum.

³‍Hoo akwnv akwn goqnv hoo benum: “Dvrwq, dvrwq, dvrwqbo nyiit At Sw; swcw bumpw si mwwg yuunam rooxo do!”

⁴‍Hoo swwrw gwwlv mwwg goqgam gab hwqnum, hoo nambu bumpwngam mwkv juulupnum.

⁵‍Hoo ngo benum; “Ngam mwwdwq mvmto! Hoggab ngo yuupaq paku; hoggab ngo agam dvrwq maanbo nyiv, hoo agam dvrwq maanbo nyiilug pengko lo doodwn; hoggab Lvpw atam la nyiit At Swn ngoqg vnyiqkv kaapa paku!”

⁶‍Ho yugw hoqgv sabku lvgab mopio yoqdu boam sabnanam mwwg alaqho bvvtwl, Serapim ak ngoqg dookub jaranum.

⁷‍Hoo mwv ngoqg agam mam tengdaql hoo benum: Kaato, soq si noqg naboram tengdaq pakun; noqg nyixiaqkam naapaq pakun, hoo noqg nyimur gab pwr jit kun!”

⁸‍Hoo At Swg goodunam yalam ngo tapanum, “Hiyam ngo kanam buiyu, hoo hiyv ngul gab wta yin yu?” Ho ngo benum, “Si ngo doodwn! Ngam kanam tvb.”

⁹‍Hoo mwv benum, “Wn, soq nyiilu sam beta: “Tal doos do, hvbmabde tacin ma; kaal doos do, hvbmabde kaacin ma.’

¹⁰Soq nyiilug hangam vdw dvb mvta, hoo bulug nyurungam tuunga mvto, hoo bulug vnyiqkam nyiqmv mvto; hvbma baloqkam bulug vnyiq lvgab bulv kaapa tai; hoo bulug nyuru lvgab tapa tai, hoo bulug hang lvgab cenglaq tai, hoo mwp kodwb hookur tai.”

¹¹Ho ngo benum, “At Swa, hwd oyu gob?” Hoo mwv benum: “Bopam tulungv deexa-rara gob nyi akkam dookmab, hoo nam tuluho nyiilungv dookmab, hoo nyookv deexa-rara yuupaq namgub,

¹²hoo At Sw nyiilungam aado kiyob mvpaq dvn, hoo gvda pengko ho haqpaq kunam nyookv naleq paku.

¹³Hoo hoqho wyw go dootwq jaqkam hoqham hvraqb ramdwr tayin, Terebin la Kora svvn hvb, tabto layil hoqg swwtungv doonam hvb doodwn.” Dvrwqbo vliv hoq swwtu hv.