Read Nyishi AIJAYA 60 Bible Online

AIJAYA 60 - Nyishi bible

AIJAYA 60

¹Gorabl, hwnyir cojorto, hoggab noqg hutongv haapa ku, hoo At Swg yuunamv noqg aoho dudaq paku.

²Hoggab kaato, swcwngam kanv pulup tayin, hoo kan twdwqkv nyiilungam pulup tayin; hvbmabde At Sw noqg aoho daqrab tayin, hoo mwwg yuunam mam noqg aoho kaapa tayin.

³Hoo nyob tulungv noqg huto, hoo noqg kwlwq-kvlaql huto ko-gab lvpw at tulu ngvkam haatayin.

⁴Noqg vnyiqkv taqg-loosaqb nywrab gvdwl hoo kaato; bul mwlwngv lvkin gob hookuml, bulv noqg dookub haado; noqg ko tuup tulungv aado hoqgv haatayin, hoo noqg nyem ko tulungam ko joonam hvb joa tayin.

⁵Ho no kaatayin hoo kwlwq-kvlaq tayin; noqg hangv hwrcwl hoo pwtwl swwrab tayin, hoggab sa-svlongv naleqgo noqg dookub toa tayin, nyob mwlwg gumnv noqgab haatayin.

⁶Svjin tulungv nam naleqgo doqyum tayin, Midian gvla Epag svjin jinpa tulungv doqyum tayin; Seba hoqg mwlwngv haatayin. Bulv hunam la kuty sungam boam baqa tayin, hoo At Swn paqnam tugu puiyam baqa tayin.

⁷Kedarg sibin-svv mwlwngv noqgab hookum tayin; Nebaiotwg yaap tvmwrv noqgab nyis nyij tayin; bulv ngoqg yugw ho rwwlwql loonam gob nyitayin, hoo ngoqg kangam bo namlongam kangam mvtayin.

⁸Hiyv doomwq jaanam hvb jaadwn, hoo bulug pupumho pwk tulu doonam hvb nyid nvi yv?

⁹Hoggab soiyoq nyookv ngam svqgw tayin, otuqcob Tarsisig iss jaaj tulungv, noqg ko tulungam aado hoqgv boa tayin, bulug rupam la hunam bulug lvgab baqa tayin, hoggab noqg Pwnbo At Swg emin gab hoo Israelwg Dvrwqbo Ak gab, mwv nam kangam dvb mvpa kun.

¹⁰Nyoodo nyi tulungv noqg sulungam nwqtayin, hoo bulug lvpw atv nam nyis nyij tayin; hoggab ngoqg hang lingtwrnam hoqgv nam jwwnum, hvbmabde ngoqg mwwsw ko-gab ngoqg aya mwwpanamv noqg aoho doonum.

¹¹Noqg toggoq tulungv lwxiam mvko tvl dootayin; aal-aiyib hoq tulu ham cwqtumram, ho bulug lvpw at tulug lvgab, nyiilungv nyob tulug gumnam noqgab baqal daayob soa kamyi nvpv.

¹²Hoggab nyobv la lvpw-hativ nam xuma bov yuupaq tayin; hoq nyob tulungam dooxa-xaaram dvb mvtayin.

¹³Lebanonwg yuunamv noqgab haatayin, saipresv, swwriv, hoo pasa svvnv, ngoqg dvrwq namlongam kangam bo nyook gob mvtayin, hoo ngoqg lvc samdaqko nyookam ngo yuunam gob mvtayin.

¹⁴Nam hentwr hembo ko tulungv noqg dook ho haal pvxwl xumtayin, hoo nam bej-beparbov noqg lvpia lwkw ho pvxwl xumtayin; bulv nam At Sw Bopamv, Israelwg Dvrwqbo Akwg Jaiyonv hvl goqtayin.

¹⁵hvbsujaqkam nam haqpaq pakun hoo oyumnum, nyi akkam hoqb wpeq kuma, ngo nam nwrba xaqb xitor gob, hoo swwtam-swwtam xaqb hemp dvb mvtayin.

¹⁶No nyob asaqg gwwiyam biutayin, nam lvpw at tulug gwwiyam twwm tayin; hoo no cengtayin, ngo, At Sw, nam ywwn bov hoo Jakubg Atorbo Akv, nam Pvlyw bov.

¹⁷Tama kwlib ngo nam hunam, hoo lyoqdwr kwlib rupam baqa jitayin; svvda kwlib tamangam, wlw kwlib lyoqdwram baqa jitayin. Nam kaol nyigbo tulungam ngo swrso dvb mvtayin hoo nam nyis nyigbo at tulungam nyiidar nyiib mvtayin.

¹⁸Noqg nyook ho yolu-swcinam tapa kuram, noqg door uraho yuupaq-caapaql ocu-aiyanam mam tapa kuram; noqg sulu tulungam no Ywwn bov hvl, hoo noqg toggoq tulungam Paqnamv hvl goqtayin.

¹⁹Doonyiv aalam noqg huto gob nyikram, ho poolv nam huto huuj kuram; hvbmabde At Sw noqg kuiyum xaqb huto gob nyitayin, hoo noqg Pwnbov noqg yuunam gob nyitayin.

²⁰Noqg doonyiv lokkam haaleq kuram, ho noqg poolv kam atv sileq kuram; hoggab At Sw noqg kuiyum xaqb huto gob nyitayin, hoo noqg nyix-riinam aal tulungv nyiita yukun.

²¹Noqg nyiilu mwlwngv nyiidar nyiib nyitayin; bulv gvdangam kuiyum gob gumn bwwtayin, ngoqg svvn liinam haqb ho, ngoqg alaqg nyinam ho, ngam yuukam yin pv.

²²Dvpar parnyo bo akv hoolu gob swwtayin, hoo hoolu luunyo jaqn bo akv atorbo nyob ak gob nyitayin; ngo su At Swv; hoq mood jaqkam ngo hoqham nyebia jaqb mvtayin.