Read Nyishi AIJAYA 61 Bible Online

AIJAYA 61 - Nyishi bible

AIJAYA 61

¹Pwnbo At Swg Yvjv ngoqg ao si doodwn, hoggab At Sw ngam nyedar darxaq pakun jwwgw boam tugu puiyam bekin mvdwb; mwv ngam hang honboam bet-bela mvdwb kanam pakun, nyuum tulungam swrsob swwnam mam bekin mvdwb, hiyam leel-parl pvtwq lwqnam mam tolin mvdwb;

²At Swg mwwswnam vnywngam, hoo ngulug Pwnbog kwly daqd aalam bekin mvdwb; nyix riinbo mwlwngam bet-bela mvdwb;

³Jaiyon lo nyix-riil doon boam lvqcam cidwb- mub kwlib bulam kangam bo bopyangam jidwb, nyix-riinam kwlib hemp kutiam jidwb, hentwr-kaas yvj kwlib paqnam vjam koom dvb; ho bulam kora svvnwg jvqtw dvrwqkv hvl goqkam yinpv, At Swg liinamv, ho mwam yuukam yinpv.

⁴Bulv kolwg yaqpia kunboam mvdar tayin; bulv otuq hoqg ocu-aiya boam mvdarl mvrab tayin; hotam-hotam hoqgv naleqgob ocu-aiya kunboam, bulv yaqpia kunbo bopam tulungam mvdar tayin.

⁵Kaacin maanam nyi tulungv nulug sibin-svvngam kaal yvg jiya tayin; nyoodo nyi tulungv nulug hal beenbo bvla roo boolungam mvxaq yaan bob nyitayin;

⁶hvbmabde nulam At Swg nyub tulungv hvl goqtayin; bulv nulam ngulug Pwnbog bonam nyinbo hvb agam gootayin; bulv nyob tulug gumn hoqgv dvtayin, hoo bulug yuunam ho nulv lartayin.

⁷Nulug hvnyw kwlib tomnyi yaag dootayin; bulug ximanam kwlib tak kvvjwqnam mam hwnyir-hvmar tayin; hoqgab bulug gvdaho bulv tomnyi yaag gumnam kaapa tayin; bulv kuiyum xaqb hemp pam kaapa tayin.

⁸Hoggab At Sw ngo lootwngam aby dvn; ngo naalil naanam mam la nyixiaqnam mam oyum dvn; ngo dengky jaqb bulug nyijongam bulam jitayin, hoo ngo kuiyum xaqb biima bo birnam mam bulug lvgab bir tayin.

⁹Bulug ko hosiqkam nyob tulug pengko ho, hoo nyiilug pengko ho bulug ko hotam tulungam cengtayin; mwlwngv hiyv bulam kaanbov alpa hvl bepa tayin, ho bulv su At Swg lvqc cinam ko hosiqkv.

¹⁰Ngo At Swn vcjaqb hwnyir-hvmar tayin; ngoq yvjv ngoqg Pwnboam koib yuum dvn, hoggab mwv ngam ywwlinam vjam koom pakun; mwv jvqtw dvrwq kamt lvgab ngam tomlup pakun, paada akv mwv atv nyub hvb hoggub kangam dvb bopya gvnam hvb, hoo tvmw akv hoggub mwn atv kangam dvb muny-tvsw gvnam hvb nyim paku.

¹¹Hoggab swcwngv hoqg aaxiam garlin mvnam hvb, hoo boolu ho hoggv liilwqnum ham garlin mvnam hvb, Pwnbo At Sw jvqtw dvrwqkam la paqnam mam nyob nyi mwlwg agaho buqlin mvtayin.