Read Nyishi AIJAYA 62 Bible Online

AIJAYA 62 - Nyishi bible

AIJAYA 62

¹Hwdlo mwnwg jvqtw dvrwqkv huto malol lengma deedib hoo mwnwg ywwlinamv mur huto hvb torlin maad deedib, Jaiyon pagoq gab ngo cooikab dooram, hoo Jerusalem pagoq gab ngo ody maab dooram.

²Nyob tulungv noqg jvqtw dvrwqkam, hoo lvpw at tulungv noqg yuunam mwlwngam kaapa tayin, hoo nam nitbo emin lvgab goqtayin ham At Swg agam hoqgv jitayin.

³No At Swg alaqho kangam bo ywr dumtup gob nyitayin, hoo noqg Pwnbog alaqho xinam viyin gob nyitayin.

⁴Nam Haqpaq pakun hvl bekram, hoo noqg gvdangam Doopaq bo nyookv hvl bekram, hvbmabde nam Mwnwg uraho Ngoqg Hempv hvl goqtayin, hoo noqg gvdangv nyem Wknum; hoggab At Sw nam hemp dvn, hoo noqg gvdangam nyem naatayin.

⁵Hoggub yaapangv nyijwram nyem naadwn hvbkalam noqg ko tuup tulungv nam nyem naatayin, hoo paadangv hoggub tvmw ao lo hwnyir-hvmar dvn hvbkalam, noqg Pwnbov noqg aoho hwnyir-hvmar tayin.

⁶Jerusalema, noqg bvly tuluho, ngo rvky boam mvp pakun; aal-aiyib bulv nywywngam cooikab dooram. Nulv At Swn mwwpal doon bov, doonu maabv,

⁷hwdlo mwv Jerusalem mam mvma deedib hoo hoqham swcw nvg aoso paqma deedib hoo mwam doonu mvmabv.

⁸At Sw mwwg lvqbwq alaq hoqgv hoo mwwg atorbo laqpo hoqgv dingr pakun: “Ngo lokta noqg am-temiam noqg nyemaq tulug dvs gob jij kuram, hoo hogloq ham no hentwr henpa kun noqg opongam nyoodo nyi tulungam twwm jikram;

⁹hvbmabde hiyv hoqham boqkum bov ham dvtayin hoo At Swn paqdwn, hoo hiyv hoqham nookum dvn ham ngoqg dvrwqbo namlog baagho twwtayin.”

¹⁰Toggoq tuluho, wpeqto, wpeqto; nyiilu gab lamta mwx-mvaqto; lamta baadangam mvrabto, mvrabto, hoqg wlw tulungam mvxaqto; nyiilug aoho muxnam mam tvca to.

¹¹Kaato, At Sw swcw nvg ywwtwr namgub puiyam baqa paku: Jaiyonwg nyem ko tulungam beto, “Kaato, nam ywwn bov haado; kaato, mwwg lvqcv mwwg lvgab doodwn, hoo nyijongam jidynamv mwwg agaho doodwn.”

¹²Hoo bulam Dvrwqbo Nyiilungv hvl goqtayin, At Swg Pvlyw kunamv; hoo nam Meelin Kunamv, Bopam Haqpaq maanamv hvl goqtayin.