Read Nyishi AIJAYA 63 Bible Online

AIJAYA 63 - Nyishi bible

AIJAYA 63

¹Idom hoqgv haanbo si, Bojra hoqgv lwwcw-cwwxwq dvb mvnum vjam kootwl haanbo si, ho kangam jaqb mwwg gujam gvtwl, mwwg ator hoqgv koi jaqb daayob soal haanbo si hiyv? “Soq si ngo su, jvqtw dvrwq hoqgv goodu dvn, ywwlin dvb ator dvn.”

²Hoggub noqg ojv lwwcw dvn, hoo noqg vj tulungv roo ala raxorbog vj hvb nyidwn?

³“Ngo roo alangam vpwb caaxor pakun, hoo nyiilu hoqgv nyi akkam ngoqg lvgab dookma; ngoqg haaxaq ko-gab bulam caaxornum hoo ngoqg hang lingtwr ko-gab bulam caajabnum; bulug swwgwg hijumv ngoqg vjam jaryaqnum, hoo ngoqg mwlwho oj kaqtaqnum.

⁴Hoggab ree daqnam aalv ngoqg hang ura si doonum, hoo ngam pvlywnam vnywngv haapa ku.

⁵Ngo kaagaqnum, hvbmabde hoqho akkam svka bo doomanum; ngo ciqkeq-hoqyeqnum, hvbmabde hoqho purabo akkam doomanum; ngoqg atwg alaqkv ngam ywwlinum, hoo ngoqg hang lingtwrnamv ngam torl doognum.

⁶Ngoqg haaxaq yukho ngo nyiilungam dujabnum; ngoqg hang lingtwrnam mam ngo bulam twwxum dvb mvnum, hoo bulug swwgwg hijum mam ngo swcw nvg aoso tolin mvnum.”

⁷Ngo At Swg tumab abynam mam, At Swn paqnam mam xikurl xika tayin, At Swg ngulam hog mwlwngam lvqc cikjaqb, hoo vcjaqb Israelwg nombungam al ko-gab ho mwwg hang biik hoqgv, mwwg naleqgo tumab abynamv mwv bulam lvqcam cipa kun.

⁸Hoggab mwv benum, “Jvqtw jaqb bulv ngoqg nyiilungv, ho ko tulungv vm mvvram.” Hoo mwv bulam Ywwlin bob nyiknum.

⁹Bulug hentwr mwlwho mwv hentwr hengbanum, hoo mwwg ao gumtwngv dooba ko-gab bulam ywwlinum; mwwg aby bvla aya mwwpa ko-gab mwv bulam pvlywnum; mwv bulam joorabnum hoo akam namgub bulam bool yvgnum.

¹⁰Hvbmabde bulv taleqnum hoo mwwg Dvrwqbo Yalam mwwdwq dvb mvnum; hoqgab mwv bulug nyemaqb nyikubnum, hoo mwv atv bulam ceekol nyob panum.

¹¹Ho mwv Mojes gvla mwwg nyiilug, otuqg aal tulungam mwwpanum. Hoglo bulam sa-svlo ura hoqgv sibin-sviyangam rvkybo hvb lvvgwb boolinbo akv? Hoglo mwwg Dvrwq Yalam bulug pengko ho jilwqbo akv,

¹²hiyv mwwg yuunam alaqkam Mojesg lvqbwq alaqho wwm dvb jinbov, hiyv mwwg atwg eminam kuiyum xaqb doom dvb issam bulug agaho mwrpin sunum,

¹³hiyv sa-svlo urab bulam bool wpeq gvnum? Svpur ak hvb diixa-raraho, bulv dwqtup maanum.

¹⁴Tuun-mee-ngv lywpa lo ilwqnam hvb, At Swg Yalv bulam doonu dvb jinum. Hoqgab noqg atwg eminam yuum dvb, noqg nyiilungam no wgnum.

¹⁵Noqg dvrwq bvla kangam bo dook, ao lvpw hoqgv kaabab gvdwl hoo kaato. Hogloq ho noqg hwrcwnamv la atorv? Noqg hvvjw hoqg hwrcw ngvla noqg hang biinamv ngoqg soqgv nookur paku.

¹⁶Hoggab no ngulug Abv, Abraham ngulam cengma sujaqkam, hoo Israelv ngulam bepa maas jaqkam; At Swa, no, ngulug Abv, kol otuq hoqgv noqg eminv ngulam Pvlyw bov.

¹⁷At Swa, no hoggab ngulug atwg lamtab ngulam gaqxar mvdwn hoo ngulug hangam kamtwr dvb mvtwl, ngulam nam bos mvma dvn? Noqg nyera tulu gab, noqg gumn otu nyob tulu gab hookur tuku.

¹⁸Noqg dvrwqbo nyiilungv anyo mood gob gumnam doognum; ngulug nyemaqkv noqg dvrwq namlongam caajabl damgeq lopa ku.

¹⁹Ngulv noqg pvvb bwwl doog maanam nyi tulu hvb nyipa ku, ho noqg eminam goql swwma bo hvb nyipa ku.