Read Nyishi AIJAYA 64 Bible Online

AIJAYA 64 - Nyishi bible

AIJAYA 64

¹Oa no ao lvpwngam kuqko layil hoo akob ipoqto, ho puutu mwlwngv noqg haagam gab hwqdin kamyi nvpv-

²hwdlo wswngam wmv pargab yin hoo wmv oggul issam curg dvn- noqg ceebio tulungam noqg eminam cengm to, hoo nyob tulungv noqg dookho tvmdwr kamyi nvpv!

³Hwdlo no swrdorxeq nyinam tulungam ngulv kaagaq maanum, no ipoqnum, puutu tulungv noqg haagam gab hwqnum.

⁴Kol otuq hoqgv nyi akkam taka ma ho nyuru ho jargab kamanum, noqg lvvg alo asaq Pwnbov hvl kaaka maanum, hiyv mwam kaaya yaal doon boam mwv bonam nyijdvn.

⁵hiyv jvqtw dvrwq lvgab hwnyir-hvmarl nyis tulungam nyinbov, hiyv noqg lamta tulu ngamla nam mwwpa bov nam kvvrwq dvn. Kaato, no haaxaqnum, hoo ngulv nyic nyinum; ngulug nyic ko so ngulv oyu mood go doopa ku, hoo ngulam ywwlin tai nvi yv?

⁶Ngul mwlwngv dvrwq maanbo nyi ak hvb nyipa ku, hoo ngul mwlwg jvqtw dvrwqb nyis nyinamv kacbo vj hvb nyipa ku. Ngul mwlwngv ok hvb sengpaq paku, hoo ngulug nyixiaqkv, ngulam dooi hvb nuul wg paku.

⁷Noqg eminam goqnbov, atv gorab layil nam gvbw deenbo nyi akkam dookma; hoggab no ngul galoqkv noqg nyuqm mam kvs paku, hoo ngulug nyixiaqnam tulungv ngulam jiqm paku.

⁸Hvbmabde sija, At Swa, no ngulug Abv; ngulv deekamv, hoo no ngulam pwcw pwnbov; ngul mwlwngv noqg alaq hoqgv mvnamv.

⁹At Swa, tvmdwr dvb jaq haaxaq maabka, hoo nyixiaqnam mam nwrba gob mwwgab maabka. Kaato, ngulam tuugab tvb, ngulv noqg nyiilungv.

¹⁰Noqg dvrwqbo bopam tulungv deexa-rara gob nyipa ku; Jaiyonv deexa-rarab nyipa ku, Jerusalemv ocu-aiya paku.

¹¹Ngulug dvrwq bvla kangam bo namlo tuluho ngulug ab tulungv dootwl nam paql dookam, wmv guiyum paku, hoo ngul mwlwg doongam jaqb dook nyookv yaqpia-yaqya paku.

¹²At Swa, soq pagoq tulu soqgv no atv nyimab apaqkub yv? No cooyub dook bvi yv, hoo ngulam hentwr sam vcjaqb hem kub yv?