Read Nyishi AIJAYA 65 Bible Online

AIJAYA 65 - Nyishi bible

AIJAYA 65

¹Ngam tox maanbo tulu gab ngam meek dvb ngo nyix-nyiaqnum; ngam meegaq maanbo tulu gab ngo meepa kudub nyix-nyiaqnum. Ngoqg eminam goqma bo nyob tulungam, ngo benum, “Ngo si doodwn, ngo si doodwn.”

²Taleqbo nyiilu gab aal loopwngam hoo hiyv bulv atwg mwwlwqkob, almanbo lamtab wdwn ngoqg alaqkv yamga tvl doodwn;

³ngoqg kaaga lo lwxiam ngam hang nyiluqbo nyiilungv, boolu ho pwr jidu dvn hoo hita tulug aoho aky jidu dvn;

⁴hiyv nyubu butaqho doodwn, hoo aiyam kvs ko nyook tuluho doodwn; hiyv iriq vdinam dvdwn, hoo oyumnam vdin alangv bulug pwcw tuluho doodwn;

⁵hiyv bedwn, “No atv doogin to, ngoqg ogumb hvvnwq maab, hoggab noqgab ngo dvrwq looda dvn.” Soq tulu si ngoqg nyupumg mwk gob nyidwn, wmv aal loopwngam gudul doodwn.

⁶Kaato, hoqhv ngoqg aga si xeqp paku: “Ngo mvmsil dookram, hvbmabde ngo kwly daqtayin; ngo jvqtw jaqb bulug haabo uraho kwly jitayin

⁷nulug nyixiaq kamla nulug ab tulug nyixiaqkam lvkin gob, At Sw bedo; hoggab bulv puutu tuluho aky jinum hoo bulug yorn tuluho ngam nyij-nyiparnum, ngo bulug otuqho nyis nyinam mam xika gvdwl bulug haabo uraho jikur tayin.”

⁸Soq sib At Sw bedo: “Nitbo roo alangam oppium ho kaapa yin, bulv bedwn, ‘Ham mwciq-mwiyiq maabv, hoggab hoq uraho lvqc cinamv doodwn,’ soq sam ngoqg nyera tulug doogam gab ngo nyitayin, hoo hoq mwlw ham mwciq-mwiyiq maabv.

⁹Ngo Jakubg hoqgv ko hosiqkam lengm tayin, hoo Juda hoqgv ngoqg puutu tulungam gumn bwwm tayin; ngoqg daalinum tulungv hoqham gumn bwwtayin, hoo ngoqg nyera tulungv hoqho dootayin.

¹⁰Saronv sibin-svv nwmw dvmin kob nyitayin, hoo Akorg Lywpangv sviya tulug gel karminko nyook akwb nyitayin, hoggab ngoqg nyiilungv ngam meegaqnum.

¹¹Hvbmabde nulv hiyv At Swn haqpaq bov, hiyv ngoqg dvrwqbo puutungam mwwpa maab nyinbov, hiyv Nvtaqnam tebolam mvl apbov hoo Kuiyum gab pvtaq tuluho roo alangam tooiyo tvl bwwr mvtayin,

¹²ngo nulam lyoqr orioq niqtuqho wwm tayin, hoo nul mwlwngv nulam patab deenbo lwkw ho pvxw tayin, hoggab, hwdlo ngo goqnum, nulv goqrwq maanum; hwdlo ngo goonum, nulv tamanum, hvbmabde ngoqg kaaga lo hoggv almadwn ham nulv nyinum hoo hoggv hemp maadwn ham xuqnum.”

¹³Hoqgab soq sib Pwnbo At Sw bedo: “Kaato, ngoqg nyera tulungv dvtayin, hvbmabde nulv kano tayin; kaato, ngoqg nyera tulungv twwtayin, hvbmabde bulv hvngwr tayin; kaato, ngoqg nyera tulungv hwnyir-hvmar tayin, hvbmabde nulam hvnyw moolw mvtayin;

¹⁴kaato, ngoqg nyera tulungv hvvjwg hwnyir-hvmar gab bemin betayin, hvbmabde nulv hvvjwg vc cigam gab xabtayin hoo swwgwg almagam gab sogoql goqtayin.

¹⁵ngoqg daalinum nyiingam beenam gob, nulug eminam nulv apaq jitayin, hoo Pwnbo At Sw nulam sim dvb mvtayin, hvbmabde mwwg nyera tulungam asaq emin ak goqtayin.

¹⁶Ho hiyv nyiv atv atam gvda so xinam gob mvd nyiloqkam hv jvqtw Pwnboam mwv xinam gob mvtayin, hoo hiyv nyiv gvda so dingd nyiloqkam jvqtw Pwnbo lvgab dingto; hoggab kol otuqg vs-axaqkam mwwpa kumanum hoo ngoqg kaaga soqgv kvsnum.

¹⁷“Hoqgab kaato, nitbo ao lvpwngam la nitbo swcwngam ngo pwnam, hoo kol otuqg pagoq tulungam mwwgab kuram ho mwwpa kamram.

¹⁸Hvbmabde hoggv ngo pwpan hoq tuluho nwrba gob hempol hoo hwnyir-hvmar to; hoggab kaato, Jerusalem mam ngo hwnyir-hvmar dvb pwpan, hoo mwnwg nyiilungam hwnyir-hvmar mvdwn.

¹⁹Ngo Jerusalemho hwnyir-hvmar tayin hoo ngoqg nyiiluho hemp tayin; hoqho nywywngam nyix-riil xabnam mam hoo hentwr henl sogoql xabnam mam tapa kuram.

²⁰Hoqho ko anyongv swwdw dvb swwnamv dookram, ho axa bo nyiingv mwwg aalam swwiyum maanbo dookram, yaapangv vnyw lwwg yukam sitayin hoo nyicbo gab nyekaml vnyw lwwgnamv beenamv.

²¹Bulv nam tulungam mvtayin hoo hoq tuluho dootayin; bulv roo aaxiam liitayin hoo hoq aaxy tulungam dvtayin.

²²Bulv nyi asaqkam doom dvb doogw tulungam mvram; bulv nyi asaqkam dvm dvb vly liiram; svvnwg vnywngv hog hwd dvn hwdkalam go ngoqg nyiilug vnywngv dootayin, hoo ngoqg daalinum tulungv bulug alaqho nyis nyinwrnam niqtuqkam oyu mood gob dvmin-twwmin tayin.

²³Bulv niqtuq dooma boam nyis nyiram ho vs-axaq gab ko tulungam bwwram, bulv At Swg xinam ko hosiq gob nyitayin, hoo bulug hotam lvgab bulv dootayin.

²⁴Bulv goqma taab ngo birwq tayin; bulv goodu yukam ngo tapa tayin.

²⁵Svca ngvla sviya kongv lvkin gob nwmw dvbam tayin; sony nyotv am piilam svv hvvb dvnam hvb dvtayin, hoo diimwrv tvb tulug dvs gob nyitayin. Bulv ngoqg dvrwqbo puutu mwlwngam hog un-tarho mucu-mviya ram,” At Sw bedo.