Read Nyishi AIJAYA 66 Bible Online

AIJAYA 66 - Nyishi bible

AIJAYA 66

¹Soq sib At Sw bedo: “Ao lvpwngv ngoqg pwqlw dootamv, hoo swcw si ngoqg lvpia datamv; hognvk nam mam nulv ngoqgab mvta dvn, hoo hognvk nyookv yu ngoqg doonu kongv?

²Soq mwlw sam ngoqg alaqkv mvpa kun, hoo soq hog mwlw si lengknum, At Sw bibwqdo. Hvbmabde soq ak sam ngo meegaq dvn: hiyv yan bvla mwwkurbo yal hang baqdwn hoo ngoqg gomcwr ho tvmdwr dvn.

³“Hiyv svv hvvbam patab dvn, hv nyi ak mengnam hvb nyidwn; hiyv sviya koam pwr jidwn, hv iky akwg lwwpongam pvrwqnam hvb nyidwn; hiyv ammam aky jidwn, hv iriq uiyam aky jinam hvb nyidwn; hiyv sungam bo kutiam mwwpa dvb aky jidwn, hv murtiam lvqc cinam hvb nyidwn. Soq tulu sam bulv atwg mwwkwb xuqpa kun, hoo bulug yvjv bulug bulum-kac dvb nyikho hemp dvn;

⁴Ngo kam bulam hentwr jaqb hem dvb xuqtayin hoo bulug aoho bosam baqatayin, hoggab, hwdlo ngo goqnum, hiyvkam goqrwq maanum; hwdlo ngo goonum, bulv tamanum, hvbmabde hoggv almadwn ngoqg kaagaho bulv nyinum hoo hoggam ngo hemp maadwn ham bulv xuqdwn.”

⁵Nulv hiyv mwwg gomcwr ho tvmdwr dvn, At Swg gomcwr sam tato: “Nulug vbw-borv nulam oyum bov hoo ngoqg emin gab nulam ruqxa dvn hoo benum, ‘Kv At Swn yuumto, ho ngulv nulug hempnam mam kaapa kamyi nvpv’; hvbmabde hoq tulu ham hvnyw moolw ko ho vlwq tayin.

⁶“Bopam hoqgv sogoq goql hur-marabnam yalv dulin do! Dvrwq namlo hoqgv yalv dulin do! At Swg yalv dulinv mwwg ceebio tulungam kwly daqdu do!

⁷“Mwn cinc cima taab mwn ko bwwknum; mwnwg cincv cima taab mwn ko tuup ak bwwlinum.

⁸Hiyv soq svk pagoqkam tapa pakun? Hiyv soq svk pagoqkam kaapa pakun? Gvda sam aal lookin ho bwwlin tai nvi yv? Nyob tulu sam saqdaq totu ho swwlin mvta yin yv? Hoggab Jaiyonv cinc cirab twqda kalam mwnwg ko tulungam mwn bwwlinum.

⁹Ngo ko bwwlin tanam gob ko gvmtvl kongam bwwlin mvrab yv?” At Sw bedo; “Ngo ko bwwlin mvdwb jinbov nvmmam nvpam mutum tan yv?” noqg Pwnbov bedo.

¹⁰“Jerusalem lvgab hwnyir-hvmarto, hoo nul mwlwngv hiyv mwnwn aby dvn, mwnwg lvgab hwrcwl hempto; nul mwlwngv hiyv mwnwg aoho nyix-riil doodwn, mwnwg lvgab hwnyir-hvmarto;

¹¹ho nulv mwnwg gwwi hoqgv twwtvl hoo hangv xumt kamyi nvpv; ho nulv mwnwg naleqb yuunam hoqgv vcjaqb twwtvl hemp pokam yinpv.”

¹²Hoggab soq sib At Sw bedo: “Kaato, ngo mwn gab swrsongam pobu hvb aaso mvtayin, hoo nyob tulug yuunamv iss kucwngv burl tol doonbo hvb nyitayin; hoo nulam cita-hootayin, nulam mwn kumwrl baqtayin, hoo mwnwg xarpo ho pojuq tayin.

¹³Mwwg ann akv bet-belanam hvb, ngo nulam bet-bela tayin; Jerusalemho nulam bet-bela tayin.

¹⁴Nulv kaatayin, hoo nulug hangv hwnyir-hvmar tayin; nulug alongv nwmw jurminam hvb jurmin tayin; hoo At Swg alaqkam mwwg nyera tulungv cengtayin, hoo mwwg jvqtw haaxaqnam mam mwwg nyemaq tulungam mwv kaatam tayin.

¹⁵“Hoggab kaato, At Sw wmmwb nyil haatayin, hoo mwwg ceriot tulungv cwkeq-lvmeq dooi hvb nyitayin, mwwg haaxaqnam mam bioqlin mvtayin, hoo mwwg yolu ruqnamv wm moi hvb bioqtayin.

¹⁶Hoggab At Sw wm lvgab, hoo mwwg lyoqr orioq lvgab nyi mwlwngam pw-hwwtab haatayin; hoo At Swg mengnamv naleq tayin.

¹⁷“Hiyv atv atam nyiidar bvla dvrwq dvb mvtwl boolu urab haanbov, pengko ho wmin gvnbov, akv, iriq vdinam la oyumnam mam hoo kubungam dvnbov lvkin gob twrtayin, At Sw bibwqdo.

¹⁸“Hoggab ngo bulug nyis tulungam hoo bulug mwwnam mam cengdwn, hoo nyob nyi mwlw gab la luusaq-luusaqb goonbo hookum de moodv hoodu do. Hoo bulv haatayin hoo bulv ngoqg yuunam mam kaatayin,

¹⁹‍hoo ngo bulug pengko ho kaacin dvb muxnam loq ak mvp tayin. Hoo bulug hoqgv ngo nyob gvdab situ-singo tulungam, Tarsisib, Pulwb, hoo illiam seea bo Ludwb, Tubal gvla Jaban, soiyoq nyook aado namgub, hiyv ngoqg yuunam mam tapa kaapa maan bob kanam tayin. Hoo bulv nyob nyi tulug pengko ho ngoqg yuunam mam bibwq tayin.

²⁰‍Hoo At Sw gab bulv nulug vbw-bor tulungam nyob asaq nyi tulu hoqgv aky hvb boatayin, svpur tuluho, ceriot tuluho, svjin tuluho, svdam tuluho, hoo gaari tulug aoho, ngoqg dvrwqbo Jerusalem puutuho, Israelwg nyiilungv hoggub bulug am-temy akiam dvrwqbo pwcwlo At Swg namlo ho aky baqa jinam hvb baqa jidwn, At Sw bedo.

²¹‍Hoo tuugin ngo nyub tulu gabla Lebi nyi tulu gob naatayin, At Sw bedo.

²²“Hoggab nitbo ao lvpwngam la nitbo swcwngv ngoqg mvnamv ngoqg agaho dootayin, At Sw bedo, hoq hvbkalam nulug ko hosiq kvla nulug eminv dooky tayin.

²³Nit poolv hoqgv nit pool gob hoo Doonu aal loogwn hoqgv Doonu aal loogwn gob, nyi mwlwngv haal ngoqg agaho xumta-paqtayin, At Sw bibwqdo.

²⁴“Hoo bulv lvvgwb lengtayin hoo ngam ceekol taleqbo nyi tulug svmangam kaapa tayin. Hoggab bulug topumv siram, bulug wmv miqram, hoo nyi mwlwngv bulam oyum tayin.”