Read Nyishi AIJAYA 7 Bible Online

AIJAYA 7 - Nyishi bible

AIJAYA 7

¹Jotam gv ko tuup, Ujjiya gv ko tuup Ahaj Judag lvpw atwb swwd moodho, Rejin Siriyag lvpw atwb hoo Remaliya gv ko tuup Peka Israelwg lvpw atwb swwiyik ho Jerusalem mam nyob patab haanum, hvbmabde hoqham nyob pala maanum.

²‍Hwdlo Debidg nambungam, “Siriyangv Iprayim lvgab lvkin gob nyibam dvk hvl betam yin,” Ahaj la mwwg nyiilug hangv nyorog svvnam dooi yidin yin hwqnam hvb bulug hangv tvmdwrnum.

³‍Hoo At Sw Aijayanvn benum, “No la noqg ko tuup Sear-jasub nunyiv wgdvl Ahajnvn, Vj niixaqbo tulug rongo lamta paada wta ko odum daiyag swnyiq biqlinko cuukiqho kvvrwqta.

⁴‍Hoo soq luunyig vs-axaq dvb mvl wm gudunam hvb mvgam gab, Rejin la Siriya hoo Remaliyag ko tuup hang lengc-leng ya lenggam gab, mwam beta, ‘Hvvmin to, swrso to, bosmab, hoo noqg hangv pwnyo maabv.

⁵‍Hoggab Siriyangv Iprayim lvgab hoo Remaliyag ko tuupv nam ceekol alman boam nyidwb mwo begamv,

⁶“Kuj ngulv Judab caal ceeko gvdwl hoo bos belam taaj, hoo kuj ngulv hoqham ngul atgab mviya taaj, hoo Tabeel ko tuupam lvpw at gob hoq pengko lo mvl ap taaj,”

⁷‍soq sib Pwnbo At Sw bedo: “Hoqhv hog dooram, hoo hoqhv hog nyilin ram.

⁸Hoggab Siriyag dvqgwngv Damaskasv, hoo Damaskaswg dvqgwngv Rejin. (Hoo vnyw camx leq nywg uraho Iprayim mam mwmwq tayin, ho hoq nyiilungam twrtayin.)

⁹Hoo Iprayimg dvqgwngv Samariya, hoo Samariyag dvqgwngv Remaliyag ko tuupv. Nulug mwwjwngv hwngkw mabaloqkam, nulv hog mwlwho hwngkw ram.’ ”

¹⁰‍At Sw Ahajnvn lokta goonum,

¹¹“Noqg Pwnbo At Swn kaacin dvb mvnam lo ak koto; hoqhv Sux-ywlw hvb ura jaqkam ho doa ao tvb ao jaqkam.”

¹²‍Hvbmabde Ahaj benum, “Ngo ham koram, hoo ngo At Swn pooka ram.”

¹³‍Hoo mwv benum, “Hvnyiloqkam, Debidg nambunga tato! Nyi gab nulv anyo jaq tvla yv nyelin-dors dvn, hoqhv ngoqg Pwnboam kam nulv nyelin-dors mvpan?

¹⁴‍Hoqgab At Sw atv nulam kaacin dvb kooxnam ak jitayin. Kaato, nyijwr ak ko gvtayin hoo nyega ko ak bwwtayin, hoo mwwg eminam Immanuel hvl emin tayin.

¹⁵‍Hwdlo mwv almanam haqpaq dvb cenglaq yin mwv gwwi hoqgv doxib mvnam mam la ngolangam dvtayin hoo alboam xuqtayin.

¹⁶‍Hoggab nyega kov almanam haqpaq dvb hoo alboam xuqdwb cengma taab, noqg bosnam mam gvda vnyig lvpw atam mvpaq tayin.

¹⁷‍At Sw noqg aoho hoo noqg nyiilu aoho hoo noqg ab tulug nambu aoho Iprayimv Juda hoqgv wleq yuk hoqgv jaq haak maanam aalam Assiriyag lvpw at moodam haam tayin.”

¹⁸‍Hoq aalam At Sw Ijipt pobu biqcum hoqgv jara mvdwb koxio tayin, hoo Assiriya gvdag tong ngopum mam goqa tayin.

¹⁹‍Hoo bul mwlwngv haatayin hoo lywpa mwlwho, hoo bwdw dwwraq mwlwho, hoo taa-haataq mwlwho, hoo tuun-mee nwmw dukumko nyook mwlwho dootayin.

²⁰‍Hoq aalam At Sw Assiriyag lvpw at lvgab pobu lvvg nagub tolum pee lvgab riqbin tayin—dumpo dum mam la lvpia lwmmam, hoo hoqhv nvmmam riqbin tvl wgtayin.

²¹‍Hoq aalam nyiv svv hvvdo dorg la sviya dornyi hoqgv swwtayin,

²²‍hoggab hvbnyiloqkam bulv gwwiyv naleqgo jitayin, mwv doxingam dvtayin, hoggab gvdaho hiyam apaqkunam nyiicwr-cwrxiv doxi ngamla ngolangam dvtayin.

²³‍Hoq aalam roo svvn lwwyw go daqtwl rup twngk lwwyw go naak nyook mwlwngam iky ningc citaq bvla taa-haageqb mvtayin.

²⁴‍Illy-uppuq lvgab nyiv hoqho haatayin, hoggab nyook mwlwngv iky ningc citaq bvla taa-haageqb nyitayin.

²⁵‍Hoo yorn yorxiam xooi lvgab habknam mam, nulv bosil hoqg iky ningc citaq bvla taa-haageq ho haala kuram, Hvbmabde hoq nyook tuluhv svb-svv tolwqko bvla sviya sojab jamin koob nyitayin.