Read Nyishi AIJAYA 8 Bible Online

AIJAYA 8 - Nyishi bible

AIJAYA 8

¹Ho At Sw ngam benum, “Lwpia taqt bolo ak naag dvl hoo hoq aoho Mahar-salal-hasbajwg dvpar hoqg komsum nyij-mujam xeql apto.’

²‍Hoo ngo mwwjw dvb nyinbo hvvkiam naatayin, Jeberekiyag ko tuup nyob Uriya la Jakariya, ngam bugil dootayin.”

³‍Hoo ngo nyiqry benbo nyem dookub wnum, hoo mwn ko gvnum hoo nyega ko ak bwwnum. Ho At Sw ngam benum, “Mwwg eminam Mahar-salal-has-baj hvl goqto;

⁴‍hoggab nyega ko hv ‘ngoqg ab-anna,’ hvl xabcin maatab Damaskas gvla Samariyag gumn muiyu-mvcanam mam Assiriyag lvpw atwg otuqb baql wtayin.”

⁵‍At Sw ngam lokta goonum:

⁶“Hoggab soq nyiilu si anya jaqb toonbo Siloa issam haqpaq pakun, hoo Rejin la Remaliya ko aoho hwnyir-hvmar dvn,

⁷‍hoqgab, kaato, At Sw bulam ceekol Assiriyag lvpw atam la mwwg hog mwlw yuunam lvgab, ator bvla naleqbo iss pobungam hoodu mvmdo. Hoo hoqhv iss silam mwlwngam topoq-toloql hoo sugur mwlwngam tolup tayin,

⁸‍hoo hoqhv Juda urab tolwq tayin, hoqhv topoq-toloql tonamv tosiq-tosiqnv lwwpo nagub toca tayin, hoo hoqg tobwq-toswq tonamv noqg nyook cuukiq-bvvrw mwlwngam toc tayin, Immanuel-la.”

⁹Nyiilungv nulv, vmwq-akaqto, hoo mub cinjum gob nyito; aado gvdaho doonbo nul mwlw, ruucw-kwrgab to; nulug nwwxo-svtam mam rublwq tvl hoo mub cinjum gob nyito; nulug nwwxo-svtam mam rublwq tvl hoo mub cinjum gob nyito.

¹⁰Lvkin gob tomswr-honynam mam naato hvbmabde hoqhv niqtuq lengma tayin; gomcwram goos dvn, hvbmabde hoqhv pvvb dooram, hoggab Pwnbov ngulug lvgab doodwn.

¹¹‍Hoggab At Sw mwwg alaq atorboam ngoqg aoso laqp tvl ngam goonum, hoo ngam begamv, soq nyiilug lamtab wmab, hv sigv:

¹²“Soq nyiilug almab nyidwb hwwsnam mwlwngam almab nyidwb hwwsnamv hvl bemab, hoo hoggv bulv bosdvn ham bos maabv, ho haamy maabv.

¹³‍Hvbmabde nyiit At Swn, mwam no dvrwqb xito. Noqg bosnam mam mwam bosto, hoo noqg haamynam mam mwam haamy to.

¹⁴‍Hoo mwv cwwgw akwb nyitayin hoo Israelwg nambu gab kaacnam wlw pwgwb hoo dwqtupnam wlw pwgwb, Jerusalemho doonbo nyiilu gab pwd-potob nyidwn.

¹⁵‍Hoo naleqgo hoqho dwqtup tayin. Bulv yoqlwl hoo vmwq gob nyitayin; bulam pwd-poto hoqtu tvl naanam hvb naatayin.”

¹⁶‍Nyij-mujam rubtaq to; ngoqg buu tulug pengko ho tomswrnam mam morx tubto.

¹⁷‍Ngo At Swn kaaya tayin, hiyv mwwg nyuqm mam Jakubg nambu hoqgv kvs sidu dvn, hoo ngo mwam mwwgw dvn.

¹⁸‍Kaato, ngo la ko tulungam At Sw ngam kaacin dvb la muxnam mam nyiit At Sw Israelwg ura hoqgv jipa kun, hiyv Jaiyon Puutu ho doodwn.

¹⁹‍Hoo hwdlo bulv nam beiyin, “Bisiq bo tulungam hoo sootu nyub tulug jebs-japeql betanam pagoqkam tox kaaka ta,” nyiilungv bulug Pwnboam tox-tataq maad nvi yv? Sin boam swwl doonbo kwlib tox-tataq dvn yv?

²⁰‍Tomswrnam mam la nyij-mujam! Bulv soq gomcwr hvbjaq gooma baloqkam, hv hvbaloqkam bulv huto doogma.

²¹‍Bulv vcjaqb mwwdwq gvi hoo kano tvl nyookub wpeq tayin. Hoo hwdlo bulv kano yin, bulv hang lengl hoo bulv bulug nyuqm mam nyiidu tvl bulug lvpw atam la Pwnboam mwwgw maab gootayin.

²²‍Hoo bulv swcwb kaabab tayin, hvbmabde kaato, mwwdwq-saqkv la kanv, mooma-sasa tvl mwwdwqnum. Hoo bulam kan twdwq uraho tuulwq tayin.