Read Nyishi AIJAYA 9 Bible Online

AIJAYA 9 - Nyishi bible

AIJAYA 9

¹Hvbmabde hiyv mwwdwq kunum hv mwn gab mooma-sasa kuram. Otuq moodho Jebulun la Naptali kedam haqpaqnam mam baqanum, hvbmabde kokw moodam mwv Jordon lvvgho sa-svlo hvb Galili nyok ho doonbo nyob tulungam yuum dvb mvtayin.

²Hiyv kan twdwq ho gaqkarbo nyiilungv koijaqb hutongam kaapa pakun; hiyv kan twdwq ura sig nyook ho doonum, bulug aoho hutongv hua pakun.

³No nyob hoolungam dumtwq-miilyw mvpa kun; no hoqg hempam poca mvpa kun; vly naaikam hempnam hvb, hwdlo bulv naareqnam mam mvpin-mvra yin hempnam hvb, bulv noqg agaho hemp-hvnyir dvn.

⁴Hoggab mwwg viyam baqnam mam, hoo mwwg lwwpaq baqnam mam, mwam nyijab-nyiyiqbo hoqgv dvvcw laqm baqnam mam, Midianam mviya dvk aalho mvpaqnam hvb no mvpaq pakun.

⁵Hoggab nyob pakho nyob panbog luxuq gvl wnamv svrvng twqb dudo hoo hijum jarxabnam vjam rumxiam tiqtwql wsw hvb wm partayin.

⁶Hoggab ngul gab ko ak bwwpa kun, ngul gab nyega ko ak jipa kun; hoo mwwg gorgy lo sorkarv dootayin, hoo mwwg eminam Swrdorxeqb Tomswr-hony bov, Mwlwngam Ator yaanbo Pwnbov, Kuiyum xaqg Abv, Swrsog Lvpw At Swv hvl goqtayin.

⁷Mwwg sorkarv la swrsongv koi-koi yaab swwca dvn hoqhv swwtar dooram, Debidg pwqlwho la mwwg lvpw-haty aoho, hoqham mvko dvn hoo hoqham torl-daal doogdvn jvqtw ngvla dvrwq lvgab soq mood soqgv nwrba cwtam hoqgv nwrba gob dootayin. Nyiit At Swg soq sam hwrcwb nyinwnam mam nyitayin.

⁸At Sw Jakubnvn ceekol agam mam bilwql kanam nvmlwq pakun, hoo hoqhv Israelwg aoho haatayin;

⁹hoo Iprayim hoola Samariya ho doonbo, hoo hiyv larl hoo atam paqsbo, nyiilu mwlwngv cengtayin:

¹⁰“Hitangv yoql pakun, hvbmabde ngulv wlw xwwlapnam lvgab mvtayin; Taoq svvn tulungam kwrtab pakun, hvbmabde ngulv bulug kwlib sidar svvn lo vlwq tayin.”

¹¹Hvbmabde At Sw Rejinnvn ceekol mwam vi yaiya go vs-axaq dvb mvdwn, hoo mwwg ceebiongam vigo biywrl raarab mvdwn.

¹²Dou-caga hoqgv Siriya nyiilungv hoo dou-haaga hoqgv Palistan nyiilungv agam gamk rooto tvl Israelam dvdwn. Hoggab mwwg haaxaqnam mwlwngv wpaq maata dvn, hoo mwwg alaqkv sija xaqb ijin tvl dooxiq dvn.

¹³Bulam jwwn bo nyiilu dookub mwv hookur maadwn, ho nyiit At Swn tox kama dvn.

¹⁴Hoqgab At Sw Israelwg dumpongam la amiam, pvng svvn haqbam la rapeqkam aal lookin ho papaq pakun—

¹⁵nyi nyiixa ngvla xinam nyiv dumpongv, hoo vm mvvl nyiqry benbo hv amiv;

¹⁶hoggab soq nyiilu sam tomswrbo tulungv bulam booxar wg pakun, hoo hiyv bulam tomswr boam dvmeq paku.

¹⁷Hoqgab At Sw bulug yaapa aoho hemp poma dvn, hoo ab dooma bo la xwwmy tulug aoho; nyiicwr-cwrxiv dormo nyiib nyima boam la almab nyin boam, hoo xima dvb agam almab goon boam aya mwwpa maadwn. Hoggab mwwg haaxaqnam mwlwngv wpaq maata dvn, hoo mwwg alaqkv sija xaqb irab tvl dooxiq dvn.

¹⁸Hoggab nyic-nyia boam wm hvb pardwn; ham iky ningc taa-ngam la taa-haageqkam gunam hvb gudwn; hoqhv nyorog tvgeq hvb nyidwn, hoo bulam mwkv aob tiqcal caag dvn.

¹⁹Nyiit At Swg hang lingtwrnam hoqgv gvdangam xaaxin dvn, hoo nyiilungv wsw hvb nyidwn; akin gokam apaqram.

²⁰Bulv vdinam kvtaqb piimwq sudo, hvbmabde hvraqb kano dvn, hoo bulv apaqnam mam kam dvs do, hvbmabde xumt maadwn; vxiv mwwg atwg laqpo aiyaqkam dvdwn,

²¹Manasse ngv Iprayim mam mengdwn, hoo Iprayimv Manassengam mengdwn; bulv lvkin gob Judangam ceeko dvn. Hoggab mwwg haaxaqnam mwlwngv wpaq maata dvn, hoo mwwg alaqkv sija xaqb irab tvl dooxiq dvn.