Read Nyishi LIBITIKAS 10 Bible Online

LIBITIKAS 10 - Nyishi bible

LIBITIKAS 10

¹Aaron gv ko tuup Nadab la Abihu, bunyiv asaq sub mwwg loorangam naalayil hoqho wm mam vlwqtvl bunyiv pardy maanam sulum mam At Sw agaho parnum, mwv bulam hoqham parm dvb gaml jimanum.

²‍Hoo At Swg aga hoqgv wmv bioqbanv bulam dvmeqnum, hoo bulv At Swg agaho sinum.

³‍Ho Mojes Aaronnvn benum, “Soq sib At Sw benum, ‘Ngoqg ogum so doonbo pengko soq gam ngo xeexaq tayin, hoo nyiilu mwlwg agaho ngam yuum tayin.’” Hoo Aaron cooikab daqnum.

⁴‍Hoo Mojes Aaron gv vbw hoqg Ujjiyelg ko tuup Misael la Eljapannvn goqnv hoo bulam benum, “Ogumb hvvnwqto; nulug vbw-bor svma sam dvrwq namlo aga hoqgv la svmcw soqgv lvvgwb joopaqta.”

⁵‍Ho Mojes benum hvb bulv ogumb hvvnwqnv bulug vjam gvbw tvl svmcw hoqgv lvvgwb joolinum.

⁶‍Hoo Mojes Aaron nvla mwwg ko tuup Eleajar nvla Itamarnvn benum, “Nulug dum mam nulv pus-rvgin dvb baqmabv hoo nulug vjam swrc maabv, hvbnyib nyiloqkam nulv sitayin, hoo dvpar mwlwg aoho At Swg hang lingtwrnamv haatayin; hvbmabde nulug vbw-boram At Swg wm lvgab guxnam ham Israel nombungam nyix-riil mwwdwq mvto.

⁷‍Hoo kvvrwq minsko tombu haagag lvvgwb lengmabv, hvbnyib nyiloqkam nulv sitayin, hoggab At Swg neexaqnan kutiv nulug lvgab doodwn.” Hoo Mojesg gomcwr bekjaqb bulv nyiknum.

⁸‍Hoo At Sw Aaronnvn agam goonv, begamv,

⁹“No la noqg ko tuup tulungv opo maalo twwxum boam twwmabv, hwdlo nulv kvvrwq minsko tombub wikam, hvb nyibaloqkam nulv sitayin. Soq si nulug nwrba xaqb hotam-hotam gob pvvbwb dootayin.

¹⁰‍Nulv dvrwqkam la komsumb nyinam mam, hoo kacboam la kac maanam xuqbwq laqto,

¹¹‍hoo nulv Israel nyiilungam Mojesnvn At Swg agam gooknam mwlw pvvbam tomswrto.”

¹²‍Mojes Aaron nvla mwwg ko tuup swwl doonbo Eleajar nvla Itamarnvn agam goonum: “At Swg dvs-twws aky dvngo ham naagdvl dvto, hoo opap kiilwq maanam wtw lvgab hoqham yugw bviywrho dvto, hoggab hoqhv mwlwngam dvrwq yaadwn.

¹³‍Nulv hoqham dvrwqbo nyook ho dvtayin, hoggab At Swg dvs-twws aky hoqgv no la noqg ko tuup tulug dvdwb nyidwn, hoggab ngo sam gaml jigyin.

¹⁴‍Hvbmabde copium torlin kunam akiv hoo axar hv noqg bulwngv, no la noqg ko tuupv la noqg nyem ko tulungv ham nulv dvrwqbo nyook ho dvtayin, hoggab hoq tuluhv nam la noqg ko tuup tulungam Israel nyiilungv swrso akib pwr jinam hoqgv dvdwb nyidwn.

¹⁵‍Axaram bulwb hoo copium mam torlinam akib bulv dvs-twws akiam baqatayin bulug ox twqmwqnam akiam At Swg agaho baqyin, hoo hoqhv noqgab la noqg ko tuup tulu gab nwrba gob dootayin, At Sw gaml jipa kun.”

¹⁶‍Mojes hingky jaqb nyic gab sibin aky jinam mam toxnum, hoo kaato, hoqham gunyia kunum! Hoo mwv Aaron gv ko tuup swwl doonbo Eleajar la Itamarnvn hang lengnv begamv,

¹⁷“Hog nyitwl nulv nyic gab aky jinam ham dvrwq namlo lo dvmanum, hoggab hoqhv mwlwngam dvrwq yaan bov hoo dvpar mwlw nyicam At Swg agaho hoqgv nyic kwly gab pwr jil naapaq mvdwb nulam jinam mam?

¹⁸‍Kaato, hoqg uiyam dvrwq namlog uraho bwa kumanum. Ngoqg gaml bekjaqb, nulv hoggub nyijaqkam dvrwq namlo ho hoqham dvdwb nyidwn.”

¹⁹‍Hoo Aaron Mojesnvn benum, “Kaato, soolo bulug nyic akiam la boyuqnam akiam bulv At Sw agaho jipa ku, hoo hvbsujaqkam hoq hvk pagoq tulungv ngam nyipa kun! Ngo soolo nyic akiam dvbnyiloqkam, At Sw looiyin dvi yv?”

²⁰‍Hoo hwdlo Mojes ham tapa yin, mwv loolwq kunum.