Read Nyishi LIBITIKAS 11 Bible Online

LIBITIKAS 11 - Nyishi bible

LIBITIKAS 11

¹Hoo At Sw Mojes nvla Aaronnvn agam goonv bulam begamv,

²“Israel nyiilungam agam goog dvl beto, swcw aoso soq swwl doonbo svdin tulug pengko soqgv nulv dvto.

³‍Hoqloq hv lvpy peenyi dvn hoo kepo hoqgv xuqkurl nyaml dvnbo svdin tulug pengko hoqgv nulv dvto.

⁴‍Hvbsujaqkam lvpy peenyi sudo hoo kepo hoqgv xuqkurl nyaml dvnbo pengko hoqgv nulv soq tulu sam dvmabv: Svjinam dvmabv, svjinv kepo hoqgv xuqkurl nyaml dvs dvn hvbmabde bulug lvpy peekin dvn, hoqgab hv nulgab dvrwq maadwn.

⁵‍Hoo siky-bukiam dvmabv, siky-bukiv kepo hoqgv xuqkurl nyaml dvs dvn hvbmabde bulug lvpy peekin dvn, hoqgab hv nulgab dvrwq maadwn.

⁶‍Hoo buut-ruudongam dvmabv, buut-ruudongv kepo hoqgv xuqkurl nyaml dvs dvn hvbmabde bulug lvpy peekin dvn, hoqgab hv nulgab dvrwq maadwn.

⁷‍Hoo iriqkam dvmabv, iriqkv lvpiv peenyi sudwn hvbmabde bulv kepo hoqgv xuqkurl nyaml dvma dvn, hoqgab hv nulgab dvrwq maadwn.

⁸‍Nulv bulug vdinam dvmabv, hoo nulv bulug svmangam idaq maabv; hoq tuluhv nulgab dvrwq maadwn.

⁹“Soq iss ura soq doonbo tulu sam nulv dvto. Sa-svlo hoola pobu uraho hoolu deed alap la puswq baqnbo luucw-luutam nulv dvto.

¹⁰‍Hvbmabde sa-svlo hoola pobu uraho alap la puswq baqma boam, puml gwn-jarl swwl doon boam dvmabv, hoq tuluhv nulgab dvrwq maadwn.

¹¹‍Nulgab hoq tuluhv dvrwq maadwn; nulv hoq tulug vdinam dvmabv, hoo nulv bulug svmangam idaqmabv.

¹²‍Hoolu deed iss uraho alap la puswq baqmabov nulgab dvrwq maadwn.

¹³“Hoo soq pvta tulu si nul pengko ho dvrwq maadwn; hoq tulu ham dvmabv; hoq tuluhv dvrwq maadwn: xookam, dook-pul, mwiya-tada,

¹⁴‍pwm, hoo xookam hoolungam,

¹⁵‍hoolu deed poaq dvparam,

¹⁶‍mwra-kiiga, lwwka-poaq, sa-svlog pwm, hoo twt-bwr hoolungam,

¹⁷‍anyo bo pup-kaan, iss poaqkam, mwla,

¹⁸‍twt-bwr, guunyi-pilw, pvby

¹⁹‍bogoli, heron hoolungam, hoopoe, hoo tapinam dvmabv.

²⁰“Topum-yorup alap gvtwl all-alaq vpybo tuluhv nulgab dvrwq maadwn.

²¹‍Hvbsujaqkam topum-yorup alap gvtwl all-alaq vpy tvl kedho poqkar yvnboam nulv dvto.

²²‍Soq tulu sam nulv dvto: takam hoolungam dvto, komar takam, saab takam, kamj takam mam la hoqg hoolungam dvto.

²³‍Hvbmabde asaq topum-yorup alap gvtwl all-alaq vpy bov nulgab dvrwq maadwn.

²⁴“Hoo soq tulu soqgv nulv dvrwq maab nyitayin. Hiyv lajaqkam bulug svmangam idaqbov ariyum namgub kac tvl dootayin,

²⁵‍hoo hiyv lajaqkam bulug svmangam baqnbov mwwg vjam niixaqto hoo ariyum namgub kac tvl dootayin.

²⁶‍Lvpy peenyi maanbo la kepo hoqgv xuqkurl nyaml dvma bo svdin mwlw hv nulgab dvrwq maadwn. Hiyv lajaqkam bulam idaqbo tuluhv dvrwq maadwn.

²⁷‍Hoo all-alaq vpy tvl bulug lupup hoqgv wnbo svdin mwlw hv nulgab dvrwq maadwn. Hiyv lajaqkam bulug svmangam idaqbov ariyum namgub kac tvl dootayin,

²⁸‍hoo hiyv bulug svmangam baqnbov mwwg vjam niixaqto hoo ariyum namgub kac tvl dootayin; bulv nulgab dvrwq maadwn.

²⁹“Hoo ked aoso soq puml gwn-jarnbo tulu si nulgab dvrwq maadwn: piiw, kubu, koibo soopin hoolungv,

³⁰‍bamin soopin, soojw, soopin, xuqx soopin, hoo soobiap.

³¹‍Soq tulu si gwn-xarnbo tulug pengko hoqgv nulgab dvrwq maadwn. Hiyv lajaqkam hoq tulug svmangam idaqbov ariyum namgub kac tvl dootayin.

³²‍Hoo hoq tulug svmangv svvdangam jaqkam ho vjam jaqkam, vpinam jaqkam ho tuilangam jaqkam, hoo nyin-mvnnan dupum-dvrab gotwq bolo mviyaq baloqkam hoq tuluhv kac dukun. Ham iss ho pamdwb nyitayin, hoo hoq tuluhv ariyum namgub kac tvl dootayin; ho hoqhv dvrwq tayin.

³³‍Hoo hoq tuluhv deekam pwcw golo yoqlwq baloqkam hoq hog mwlw doon bov kac dukun, hoo nulv ham joodub xiatku.

³⁴‍Hoo hoq uraho doonbo dvsam dvdwb nyikam yinpv, hvbmabde hoqg iss lengn bov dvrwq maadwn. Hoo hoq hvkwg pwcw hoqgv iss twwnamv dvrwq maadwn.

³⁵‍Hoo dupum-dvrab hog golo jaqkam bulug svmangv yoqlwq baloqkam hv dvrwq maadwn. Hoqhv loora sujaqkam ho pwcw sujaqkam, hoq tulu ham vmwq gob mwmwqtayin. Hoq tuluhv dvrwq maadkun hoo nulgab dvrwq maab dootayin.

³⁶‍Hvbmabde, iss buqlin bov la kamco coolinam issiv dvrwq tayin, hvbmabde hiyv lajaqkam svmangam idaqbov dvrwq maatayin.

³⁷‍Hoo bulug svmangv vly liitanam mvmho yoqyaq jaqkam hoq tuluhv dvrwqdvn,

³⁸‍hvbmabde iss ho pampnam vly liitanam mvmho bulug svmangv yoqlwq baloqkam, hoq tuluhv nulgab dvrwq maadwn.

³⁹“Hoo hiyv lajaqkam nulug dvnam svdin tulug sinbo svmangam idaq baloqkam ariyum namgub kac tvl dootayin,

⁴⁰‍hoo hiyv lajaqkam hoqg svmangam dvnbov mwwg vjam niixaqto hoo ariyum namgub kac tvl dootayin. Hoo hiyv lajaqkam mwv bulug svmangam baqn bov mwwg vjam niixaqto hoo ariyum namgub kac tvl dootayin.

⁴¹“Ked aoho puml gwn-jarnbo topum-yorup mwlwngv dvrwq maadwn; hoqham dvmabv.

⁴²‍Hoggv xeq kepo lvgab xwwl wdwn, hoo hoggv all-alaq vpy lvgab, ho naleqgo all-alaq baqtwl ngaml wdwn, ho hoggv xeq ked aoho puml gwl-jarl yvnboam nulv dvmabv, hoggab hoq tuluhv dvrwq maadwn.

⁴³‍Nulv soq puml gwn-jarnbo tulu sam dvl atv kacdvb mvmabv, hoo nulv atv soq tulu lvgab kacdvb mvs maabv, hoo bulug hoqgv kacdvb mvk maabv.

⁴⁴‍Hoggab ngo nulug Pwnbo At Swv. Hoqgab nulv atv garxaqto, hoo dvrwqto, hoggab ngo dvrwqdvn. Nulv ked aoho puml gwn-ngaml yvnbo topum-yorup pam atv dvl kacdvb mvmabv.

⁴⁵‍Hoggab ngo At Sw nulug Pwnbob nyidwb hiyv nulam Ijipt gvda hoqgv boolinum. Hoqgab nulv dvrwqto, hoggab ngo dvrwqdvn.”

⁴⁶‍Soq pvvb tulu si svdin gab hoo pvta gab hoo iss uraho gwn-xarnbo gab hoo ked aoso gwn-xarnbo topum-yorup tulungam,

⁴⁷‍dvrwq maan boam la dvrwq boam hoo swwl doonbo vdin tulungam dvdynam mam la dvdy maanam mam kaalaql kvvbwq mvdwb jipa kun.