Read Nyishi LIBITIKAS 13 Bible Online

LIBITIKAS 13 - Nyishi bible

LIBITIKAS 13

²“Hwdlo nyi akwg mwwg gv vpinho gool ho unv buqporl ho utwl hoqhv tviyiq vcnam hvb mwwg vpinho nyita tai nyiloqkam, mwam nyub Aaron la mwwg ko tuup nyub tulug dookub boatayin,

³‍hoo nyubv mwwg gv vpin un vc koam yeql kaatayin. Hoo un bviywrg vm mam kaatayin hoo vmv puulul hoo mwwg gv vpinam unv ura yaab nyiloqkam, hoqham tviyiq vc gob betayin. Hwdlo nyubv mwam hingkib yeql kaaco tvl, mwam dvrwq maan gob mwv bibwq tayin.

⁴‍Hvbmabde mwwg gv vpin hoqg unv puulu sutwl hv vpinam la vm mam ura yaama baloqkam, nyubv nyi ak ham aal kvn gob tuml aptayin.

⁵‍Hoo nyubv kvn aalam mwam yeql kaatayin, hoo mwwg vnyiqkv vcam kaatv tayin, ho hv svjab kubaloqkam, nyubv mwam aal kvn gota hvraqb tuml aptayin.

⁶‍Hoo nyubv mwam kvn aalam lokta yeql kaatayin, hoo unv svjabl vpinho goosiq kuma baloqkam, ho nyubv mwam dvrwqbo hvl bibwq tayin; hoggab hoqhv gooburl goolinam gotwqpa. Hoo mwv mwwg vjam niixaq tayin hoo dvrwq taikun.

⁷‍Hvbmabde nyubam kaatam kokwngam vpin unv gooburl buqmb nyiloqkam, mwv lokta nyub dookub haal kaakin tayin.

⁸‍Hoo nyubv kvvdy tayin, hoo vpin unv gooburl buqsiq baloqkam hoqhv tviyiq vcv; ho nyubv mwam dvrwq maan gob bibwq tayin.

⁹“Hwdlo nyi akv tviyiq vcv cik baloqkam mwam nyub dookub boatayin,

¹⁰‍hoo nyubv kaatayin. Hoo vpin unv la hoqg vmv puulul hoo unv gooiyiq-gooiyiq leelaq baloqkam,

¹¹‍hoqhv mwp lamanam tviyiq vcv mwwg gv vpinho cirab dukun, hoo nyubv mwam dvrwq maan gob bibwq dukun. Mwv mwam tuml apkuram, hoggab mwv dvrwq maanbob nyidkun.

¹²‍Hoo nyub akv kaapa dvb tviyiq vcv nyi akwg gv vpinam dumpo hoqgv lvpia namgub doob nyiloqkam,

¹³‍nyubv kaatayin, hoo tviyiq vcv mwwg gv dorpwngam cibnyiloqkam, mwv mwam vcv hoqgv dvrwq dukun hvl bibwq tayin; hoggab hoqg unv geeknv puulu luuyum paku, hoo mwv dvrwq dukun.

¹⁴‍Hvbmabde hwdlo mwwg unv leelaq tvl doobaloqkam, mwv dvrwq maanbov.

¹⁵‍Hoo nyubv mwwg un leelaqkam yeql kaatwl mwam dvrwq maan gob bibwq tayin. Un leelaq bov dvrwq maadwn, hoggab hoqhv tviyiq vc dooiyv.

¹⁶‍Hvbmabde un leelaqkv geel hoo lokta puulu kubanyiloqkam, ho mwv nyub dookub haatayin,

¹⁷‍hoo nyubv mwam yeql kaatayin, hoo unv geel puulu kubaloqkam, nyubv vc bo nyi ham dvrwq bogub bibwq tayin; mwv dvrwq dukun.

¹⁸“Nyi akwg gv vpinho lok hil-pwl hoo hv alkunum,

¹⁹‍hoo hoqg hil-pwk unho puulul goolin baloqkam, hoqham nyubam kaakin tayin.

²⁰‍Hoo nyubv ham kaatayin, hoo hoqg unv vpinam urab yaal hoo vmv puulu baloqkam, nyubv mwam dvrwq maan gob bibwq tayin. Hoqhv tviyiq vcv hil-pwpwb buqlin paku.

²¹‍Hvbmabde hoqham nyubv yeql kaatayin hoo puulu bo vmv la vpinam unv urab yvvlwqmab hvbmab geek baloqkam, nyubv mwam aal kvn gob tuml aptayin.

²²‍Hoo hoqhv vpinho buqsiq-buqmeq kubaloqkam, nyubv mwam dvrwq maan gob bibwq tayin; hoqhv tviyiq un vcv ku.

²³‍Hvbmabde hoqg unv buqsiq-buqmeq mabnyiloqkam, hoqhv hilwg paiyv twq, hoo nyubv mwam dvrwq gob bibwq tayin.

²⁴“Hoqmalo, hwdlo gv vpinv buml puiyiq baloqkam hoo hoqg buml puiyiqnam unv leelaql lwwcw-puulu baloqkam,

²⁵‍nyubv ham yeql kaatayin, hoo hoqg un bviywr hoqg vmv puulul hoo vpinam ura yaaba loqkam, hoqham tviyiq vcv hvl betayin. Hoqhv buml puiyiq paku, hoo nyubv mwam dvrwq maan gob bibwq tayin; hoqhv tviyiq dooi vc goku.

²⁶‍Hvbmabde nyubv hoqham yeql kaatayin hoo hoq unho vmv puulu tvl hoo unv vpinam urab yvvlwqmab, hvbmabde geek baloqkam, nyubv mwam aal kvn go tuml aptayin,

²⁷‍hoo nyubv kvn deen aalam mwam yeql kaatayin. Hoqhv vpinho buqsiq-buqmeq kubaloqkam nyubv mwam dvrwq maan gob bibwq tayin; hoqhv tviyiq dooi vc ku.

²⁸‍Hvbmabde hoqg unv vpinho buqsiq-buqmeq maab unv dootwql hoo geek baloqkam, hoqhv buml puiyiql gootwqbo go, hoo nyubv mwam dvrwq gob bibwq tayin, hoggab hoqhv buml puiyiqbo hoqg paiyv twq.

²⁹“Hwdlo nyemv jaqkam ho nyega ngvjaqkam dumpo hooma lo coqpiaho un lengbaloqkam,

³⁰‍nyubv ham yeql kaatayin. Hoo hoqhv vpinam ura yaaba loqkam, hoo hoqg vmv nyenceqb nyil sooriq kobaloqkam, nyubv mwam dvrwq maan gob bibwq tayin. Hoqhv tviyiq dooi axaqkv dumpo maalo coqpiab xaqlin dvn.

³¹‍Hoo nyubv axaq-xaqk ham yeql kaatayin hoo hoqhv vpinam urab yvvlwqmab hoo hoqho kaiya bo vm dooma baloqkam, nyubv nyi ak ham axaq-xoqdu dvb aal kvn gob tuml aptayin,

³²‍hoo nyubv kvn deen aalam vcam yeql kaatayin. Hoqg axaq unv xvqsiq-xaqmeq maab hoo hoqho nyenceq bo vmv dooma baloqkam, hoo axaq unv vpinam ura yaama baloqkam,

³³‍axaq ko un bviywram apaqtvl mwv atv vmmam reqpaqtayin; hoo nyubv nyi ak ham axaq-xoqdu dvb aal kvn gota tuml aptayin,

³⁴‍Hoo kvn deen aalam nyubv axaqkam yeql kaatayin, hoo axaq unv xvqsiq-xaqmeq kubaloqkam hoo hoqg unv vpinam ura yaama baloqkam nyubv mwam dvrwq gob bibwq tayin. Hoo mwv mwwg vjam niixaq tayin hoo dvrwq taikun.

³⁵‍Hvbmabde mwwg hwrxaq kokwngam axaq unv vpinho xvqsiq-xaqmeq kubaloqkam,

³⁶‍nyubv mwam yeql kaatayin, hoo axaqkv vpinho xvqsiq-xaqmeq kubaloqkam, nyubv nyenceq vm mam meegaq kuram; hvbmab mwv dvrwq maadkun.

³⁷‍Hvbmabde mwwg vnyiq kaagaho axaq-xaqk maab hoo unho vm kaiya bov swwlin kubalo, axaqkam mwp pakun hoo mwv dvrwq dukun, hoo nyubv mwam dvrwq gob bibwq tayin.

³⁸“Hwdlo nyem jaqkam ho nyega jaqkam bulug gv vdinho puulu bo un doob nyiloqkam,

³⁹‍nyubv ham kaatayin, hoo gv vpin hoqgv puulu hv kaama-kaiya dvb puulu baloqkam hoqhv gv vpin hoqg ui mvram buqlin bov; mwv dvrwqdvn.

⁴⁰“Nyi akwg dumv rwxinl-rwl ko-gab mwwg dumpongv dungxo lol dvloqkam; mwv dvrwqdvn.

⁴¹‍Hoo nyi akwg tuqt dumv rwxinl-rwl ko-gab mwwg tuqtv tuqliq baloqkam; mwv dvrwqdvn.

⁴²‍Hvbmabde dungxo loolko ho tuqxo ko ho lwwcw-puulul un baloqkam, hoqhv tviyiq dooi vcv mwwg dungxo ko hoola tuqxo ko ho nyirab pakun.

⁴³‍Ho nyubv mwam yeql kaatayin, hoo mwwg dungxo ko hoola tuqxo ko ho lwwcw-puulub gv vpinho tviyiq hvb un buqlinamv buqlin baloqkam,

⁴⁴‍mwv tviyiq nyinbo nyiv ku, mwv dvrwq maadkun. Nyubv mwam hoggub nyijaqkam dvrwq maan gob bibwq tayin; mwwg unv mwwg dumpo hv doodwn.

⁴⁵“Tviyiq nyinbo nyi ak hv vj pujeq boam kootayin hoo mwwg dumpo dum mam sapur tvl baqtayin, hoo mwv odum nabor namgub vj puutum tvl hoo sogoq tayin, ‘Dvrwq maanbo, dvrwq maanbo.’

⁴⁶‍Mwwg lvgab hoq vcv doody deedib mwv dvrwq maan bob nyitayin. Mwv dvrwq maadkun. Mwv vpwb dootayin. Mwv svmcwg lvvgho dootayin.

⁴⁷“Hwdlo tacaq vjho, ho pud vjho,

⁴⁸‍kuxuq hoqgv la tacaq vj mvnam ho, ho vpin la vpin hoqg mvnam ho,

⁴⁹‍soj hvb maalo jolw hvb vcv vjho nyik baloqkam, ho maalo vpinho, ho maalo puunanho, ho maalo pusho, ho maalo vpin hoqg mvnamho, hoqhv tviyiq vcv ku, hoo hoqham nyubam kaakin to.

⁵⁰‍Hoo nyubv hoqham yeql kaatayin hoo ham aal kvn gob mutum tvl aptayin.

⁵¹‍Ho mwv kvn deen aalam ham yeql kaatayin. Hoqg vcv vjho, puunanho, ho maalo pusho, ho maalo vpinho, ho maalo vpin hoqg mvnam tuluho nyoqsiq baloqkam, hoq vc hv yeqgab lala bo tviyiq vcv; hoqhv dvrwq maadkun.

⁵²‍Hoo mwv vjam, ho maalo puunanam, ho maalo pusam, ho maalo svcaqkam, ho maalo pud, ho maalo vpin hoqg mvnam tuluho vc nyoqknam tulu ham wm partayin, hoggab hoqhv yeqgab lala bo tviyiq vcv. Hoqham wm partayin.

⁵³“Hoo nyubv yeql kaak bvnyiloqkam, hoo vcv vjho, ho maalo puunanho, ho maalo pusho, ho maalo vpin hoqg mvnam tuluho nyoqsiq kuma baloqkam,

⁵⁴‍ho nyubv hoq tulu ham niixaq mvdwb gaml jitayin hoo mwv aal kvn gota hoq tulu ham pvvl aptayin.

⁵⁵‍Hoo hoq tulu ham niixaq kokwngam lokta yeql kaatayin. Hoo hoqg vc cik un dookv kwly kuma sujaqkam, vcv nyoqsiq maasjaqkam, hoqhv dvrwq maadkun. Hoqhv yoqdwr langk ho doojaqkam ho otuqho doojaqkam, no ham wm lvgab parpaqto.

⁵⁶“Hvbmabde nyubv ham yeql kaaka kubaloqkam, hoo niixaq kokw so hoqg vc cik unv niik baloqkam, mwv hoqham vj hoqgv maalo vpin hoqgv maalo puunan hoqgv maalo pus hoqgv swrlinl swrpaq tayin.

⁵⁷‍Ho hoqhv lokta vjho, ho puunanho, ho maalo pusho, ho maalo vpin hoqg mvnamho nyoqsiqnam mam kaapa yuknyiloqkam, hoqhv nyoqsiql wdu do. Hognvk dupum-dvrab jaqkam vc nyoqknam ham no wm parpaqto.

⁵⁸‍Hvbmabde vjho, ho maalo puunanho, ho maalo pusho, ho maalo vpin hoqg mvnam tulu hoqgv noqg niixaq ko-gab vc nyoqnamv dook maabalo, ho ham lwnyi dvb niixaq kubaloqkam hv dvrwq taikun.”

⁵⁹‍Svcaq vj jaqkam, pud vj jaqkam, puunan hoojaqkam, pus hoojaqkam, ho maalo vpin hoqg mvnam dupum-dvrab hoojaqkam, tviyiq vc gab soq pvvb soqgv dvrwq boam la dvrwq maanam boam kaacin nvtayin.