Read Nyishi LIBITIKAS 14 Bible Online

LIBITIKAS 14 - Nyishi bible

LIBITIKAS 14

²“Soq pvvb tulu sam tviyiq nyinbo nyiam paxy xeexaqyin mwam nyitayin. Mwam nyub dookub boatayin,

³‍hoo nyubv svmcw lvvgwb lengtayin, hoo nyubv ham kaatayin. Ho tviyiq nyinbo nyiv tviyiq vc hoqgv al kuba loq,

⁴‍nyubv mwam dvrwqbo pvta loq dornyi go hoo sidar wsw loq hoo tan lwwcw booloq la hissop haqb loq naam dvb gaml jitayin.

⁵‍Hoo pvta dorgwn deekam pwcw iss aoho mengm dvb nyubv gaml jitayin.

⁶‍Mwv torl doonbo pvta dorgwn ham la sidar wswngam hoo lwwcw bo tanam la hissop haqbam naalayil hoq tulu lvgab tornbo pvtangam pwcw iss aoho mengnam uiho swwbam tayin.

⁷‍Hoo tviyiq vc hoqgv paxy xeexaq tanam nyi ak ham mwv kvn go pwqyaq tayin. Ho mwam dvrwq dukun hvl mwv bibwq tayin hoo tornbo pvta ham topaq tayin.

⁸‍Hoo hiyam xeexaqnam nyi ak hv mwwg vjam niixaq tayin hoo mwwg dum mam reqpaqtayin hoo iss lvgab gv hurs tayin, hoo mwv dvrwq taikun. Hoo mwv svmcw urab haatayin, hvbmabde mwwg tombu lvvgho aal kvn go dootayin.

⁹‍Hoo kvn deen aalam mwv mwwg dum mam, nvm mam, hoo mwwg nyiqsin tvm mam reqpaq tayin. Mwv mwwg gv dorpw vm mam reqpaqtayin, hoo mwwg vjam niixaq tayin hoo gv hurstayin, hoo mwv dvrwq dukun.

¹⁰“Hoo piin deen aalam mwv yaap un-tar gvma bo dornyi go, hoo vnyw nywgbo un-tar gvma bo yaan loq dorg, hoo wtw lvgab kuty mviyonam dvs akiam ipa ak hoqgv sorum gob, hoo kuty loq juqum go bwatayin.

¹¹‍Hoo nyubv paxy-xeexaq tanam nyi ak ham la hoqg dupum-dvrab ham At Sw agaho kvvrwq minsko tombu haagaho jool aptayin.

¹²‍Hoo nyubv yaap dorgwn la kuty juqum ham nyixiaqnam aky gob jitayin, hoo hoq tulu ham torlinl At Swg agaho torlinam aky gob jitayin.

¹³‍Hoo mwv sviya dorgwn ham hogloq ho nyic akiam la boyuqnam akiam dvrwq namlo ho patab dvn hoqho patab tayin. Hoggab nyixiaqnam akiv, nyic aky hvb nyidwn, hoq tuluhv nyub gvku; hoqhv mwlwngam dvrwq yaadwn.

¹⁴‍Nyubv nyixiaqnam akig ui tuugin naatayin, hoo ham nyubv hoq xeexaqnam nyi akwg ruubwq ruutuqho hoo lvqbwqg laqn ho hoo lwbwqg lvnho tiyaq tayin.

¹⁵‍Ho nyubv kuty hoqg meeg naalayil mwwg laqc alaq laqc koro ho toop tayin

¹⁶‍hoo mwwg lvqbwq lvqcwngv laqc hoqg kutiam nyiabam tayin hoo kuty meegwn mwwg lvqcw lvgab kvn go At Sw agaho pwqyaq tayin.

¹⁷‍Hoo nyubv mwwg alaqho kuty doonyu boam hoq xeexaqnam nyi akwg ruubwq ruutuqho hoo lvqbwqg laqn ho hoo lwbwqg lvn aoho nyixiaqnam aky uiyam tiyaq tayin.

¹⁸‍Hoo nyubv alaqho kuty neengo ham mwv nyi xeexaqnam akwg dumpo ho dvrwq mvdwb neetayin. Ho nyubv At Swg agaho mwwgab nyic kwly gab pwr jitayin.

¹⁹‍Nyubv nyic akiam jitayin, dvrwq maanam hoqgv dvrwq mvdkub xeexaq tanam nyi ak gab nyic kwly gab pwr jitayin. Hoo mwv hoq kokwngam boyuqnam akiam patab tayin.

²⁰‍Hoo nyubv yugw ho boyuqnam akiam la dvs akiam jitayin. Soq sib nyubv mwwg nyic kwly gab pwr jitayin, hoo mwv dvrwq tayin.

²¹“Hvbmabde mwv jwwgw ko-gab soq tulu sam nyila mabnyiloqkam, mwv yaap loq dorg naalayil nyixiaqnam aky gob torlin tayin, mwwg nyic kwly gab pwr jitayin, hoo albo wtw lvgab kuty mviyonam ipa ak hoqgv sorum go hoo kuty juqum go dvs akiam jitayin;

²²‍hoq lvgab pukum akam bo maalo anyo bo dornyi go, hogloq ak ham mwv nyila dvn ham nyimto. Pukum dorgwn ham nyic aky gab hoo dorgwn ham boyuqnam aky gab.

²³‍Hoo piin deen aalam mwv hoq tulu ham bwa layil kvvrwq minsko tombu haagaho At Swg agaho, mwam xeexaq kudwb nyub dookub haatayin.

²⁴‍Hoo nyubv sviyangam la kuty juqum mam nyixiaqnam aky gab naatayin, hoo nyubv hoq tulu ham torlinl At Swg agaho torlinam aky gob jitayin.

²⁵‍Hoo mwv nyixiaq gab aky jinam sviya ham patab tayin. Hoo nyubv nyixiaqnam akig ui tuugin naatayin, hoo ham nyubv hoq xeexaqnam nyi akwg ruubwq ruutuqho hoo lvqbwqg laqn ho hoo lwbwqg lvnho tiyaq tayin.

²⁶‍Hoo nyubv kuty hoqg meegwn naalayil mwwg laqc alaq laqc koro ho toop tayin,

²⁷‍hoo mwwg lvqbwq lvqcwngv laqc hoqg kutiam nyiabam tayin hoo kuty meegwn mwwg lvqcw lvgab kvn go At Sw agaho pwqyaq tayin.

²⁸‍Hoo nyubv mwwg alaqho kuty neengo ham xeexaqnam nyi akwg ruubwq ruutuqho hoo lvqbwqg laqn ho hoo lwbwqg lvn aoho nyixiaqnam aky uiyam tiyaqko ho tiyaq tayin.

²⁹‍Hoo nyubv alaqho kuty neengo ham mwv nyi xeexaqnam akwg dumpo ho dvrwq mvdwb neetayin. Ho nyubv At Swg agaho mwwgab nyic kwly gab pwr jitayin.

³⁰‍Hoo mwv pukum akam bo maalo anyo bo dornyiam jitayin, hogloq ak ham mwv nyila dvn ham nyitayin,

³¹‍dorgwn ham nyic aky gab hoo dorgwn ham boyuqnam aky gab dvs aky lvgab jitaqto. Hoo nyubv At Swg agaho mwwgab nyic kwly gab pwr jil mwam dvrwq mvdkun.

³²‍Tviyiq nyinbo nyiv mwwg tviyiq vc hoqgv dvrwq dvb paxy xeexaq kodwb bwqla kuma yin soq pvvb tulu sam nyito.”

³³‍At Sw Mojes nvla Aaronnvn agam goonv begamv,

³⁴“Hwdlo ngo nulam gumn gab jinam, Kanaan gvda uraho nulv haaikun, hoo nulam gumn jinam gvdaho ngoqg nam golo tviyiq vcam pvvl ap pan,

³⁵‍ho hiyv hoqg nam ham doog tayin mwv nyub dookub haal betayin, ‘Ngoqg kaanamv ngoqg doogw namhv tviyiq vc do.’

³⁶‍Ho nyubv ham yeql kaama taab nyubv bulam nammam wleq mvdwb gaml jitayin, hvbnyima baloqkam namho doonbo mwlwngam dvrwq maan gob bibwq tayin. Hoo kokwngam nyubv nammam wl kaatayin.

³⁷‍Hoo mwv yeql kaatayin. Hoo nam hoqg cwqcv yajwl ho maalo lwwcwl tviyiq vcnamv doob nyiloqkam, hoo hoqhv cwqcam ura yaaba loqkam,

³⁸‍ho nyubv nammam aal kvn gob mutuml aptayin.

³⁹‍Hoo nyubv kvn deen aalam lokta nammam haal kaatayin. Ho tviyiq vcv nammwg cwqc tuluho nyoqsiq kubaloqkam,

⁴⁰‍ho nyubv hoq tapin piul ramnbo nam cwqc hoqg wlwngam naalinl hoo bopamg dvrwq maak nyook lvvgho hurpaq mvdwb gaml jitayin.

⁴¹‍Hoo mwv nam cwqc uraho mwlwqnam dupum-dvrab pam hoo ham paqlap nan mwlwngam naalayil bopamg dvrwq maak nyook lvvgho joopaq tayin.

⁴²‍Ho bulv asaq wlwngam naalayil hoqho wlwq tayin, hoo mwv asaq paqlap nanam naalayil nammam paqlap tayin.

⁴³“Ho hvb wlwngam la paqlap nanam namho mwlil mvxo kokwngam hvraqb namho lokta vcv nyoqsiq baloqkam,

⁴⁴‍ho nyubv ham wl kaatayin. Hoo namhv hvraqb tviyiq vcv nyoqsiq baloqkam, hoqhv yeqgab lala tviyiq vcv ku; hoqhv dvrwq maadkun.

⁴⁵‍Hoo mwv namham sapia tayin, ho hoqg wlwngam hoo svvtaqkam hoo nammam paqlap nanam bopamg dvrwq maan nyook lvvgho baqpaq mvtayin.

⁴⁶‍Hoq aoho, nammam mutum tvl ap dvk moodho hiyv lajaqkam haanbov ariyum namgub dvrwq maab dootayin,

⁴⁷‍hoo hiyv lajaqkam namho yubn bov mwwg vjam niixaq tayin, hoo hiyv lajaqkam namho dvnbov mwwg vjam niixaq tayin.

⁴⁸“Hvbmabde nyubv haal kaakal, hoo nammam mvdarl paqlap kokwngam tviyiq vcv nyoqsiq kuma baloqkam, ho nyubv nammam dvrwq gob bibwq tayin, hoggab hoqg vcam mwp paku.

⁴⁹‍Hoo nammam xeexaq dvb mwv pvta dornyi go hoo sidar wsw loq hoo tan lwwcw booloq la hissop haqb loq naatayin,

⁵⁰‍hoo pvta dorgwn deekam pwcw iss aoho mengtayin

⁵¹‍hoo sidar wswngam la hissop haqbam hoo lwwcw bo tan lvgab torl doonbo pvtangam naalayil hoq tulu ham pwcw iss aoho mengnam pvta uiho swwbam tayin hoo nammam kvn go pwqyaq tayin.

⁵²‍Soq sib mwv pvta ui lvgab hoo dvrwqbo iss lvgab hoo tornbo pvta lvgab, hoo sidar wsw lvgab hoo hissop haqb lvgab hoo lwwcw bo tan lvgab nammam dvrwq dvb xeexaq tayin.

⁵³‍Ho mwv tornbo pvta ham bopam hoqgv nyorob jarm dvb topaq tayin. Ho mwv nam hoqg nyic kwly gab pwr jitayin, hoo hoqhv dvrwq taikun.”

⁵⁴‍Soq pvvb tulu si tviyiq vc cinbo tulu gab: tviyiq axaqbo gab,

⁵⁵‍tviyiq vc vj ho maalo, namho,

⁵⁶‍hoo unv gool ho maalo bumjwrl ho maalo unwb,

⁵⁷‍ho hoggv dvrwq maanam mam la dvrwqnam mam kaacin natayin. Soq si tviyiq vc gab pvvbv.