Read Nyishi LIBITIKAS 15 Bible Online

LIBITIKAS 15 - Nyishi bible

LIBITIKAS 15

¹At Sw Mojes nvla Aaronnvn agam goonv begamv,

²“Israel nyiilungam agam goog dvl hoo bulam beto, hwdlo nyi akwg gv hoqgv doola biqlin hinyiloqkam, mwwg doola biqlinam hv dvrwq maadwn.

³‍Hoo soq pvvb tulu si mwwg dvrwq maab doola biqlinam pagoq gab pvvbv: mwwg doolangv biqlin lingdul doojaqkam hoo doolangv biqngin kujaqkam, hoqhv mwam dvrwq mvma dvn.

⁴‍Doola biqnbo akwg kartam nan vxiv dvrwq maadwn hoo mwwg dootaqnan luuxiv dvrwq maadwn.

⁵‍Hoo hiyv lajaqkam mwwg kartam tulungam idaq bov mwv atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

⁶‍Hoo hiyv lajaqkam hoqg doola biqlinl biqpko ho doon bov mwwg atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

⁷‍Hoo hiyv lajaqkam doola biqlinbo gv-ngam idaqbov mwwg atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

⁸‍Hoo doola biqlinbo ak hv dvrwqbo akam tacor coryaq baloqkam mwv mwwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

⁹‍Hoo doola biqlinbo ak hv dupum-dvrab pam caatamnam hv dvrwq maadwn.

¹⁰‍Hoo hiyv lajaqkam mwwg uraho doognam mam idaqbov ariyum namgub kac tvl dootayin. Hoo hiyv lajaqkam hoq hvkam baqn bov mwwg atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

¹¹‍Doola biqlinbo nyiv hiyam jaqkam mwv alaq losuq maab idaq baloqkam, hoqg nyiv mwwg atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

¹²‍Hoo doola biqlinbo idaqnam deekam pwcwngam joodub tayin hoo svvn dupum-dvrab pam iss lvgab hwrxaqtayin.

¹³“Hoo doola biqlinbo ak hv biqlin kunam hoqgv dvrwq dvb hvb nyiloqkam, mwv atv aal kvn go vrr rwl doodwb nyitayin, hoo mwwg vjam niixaq tayin. Hoo mwv atv mwwg gv-ngam dvrwqbo iss lvgab gv hurstayin hoo dvrwq taikun.

¹⁴‍Hoo piin deen aalam mwv pukum akam bo maalo anyo bo dornyi go naalayil kvvrwq minsko tombu haagaho At Swg agaho nyubam hoq tulu ham jitayin.

¹⁵‍Hoo nyubv hoq tulu ham pwr jintayin, akwn ham nyic aky gab hoo akwn ham boyuqnam aky gab jitayin. Hoo mwwg doola biqgam gab nyubv At Swg agaho nyic kwly gab pwr jitayin.

¹⁶“Nyi ak hv doola cablin baloqkam, mwv mwwg gv dorpwngam iss lvgab hurstayin hoo ariyum namgub kac tvl dootayin.

¹⁷‍Hoo doola cabyaqnam vj jaqkam hoo vpin jaqkam hog mwlwngam iss lvgab hwrxaqtayin hoo ariyum namgub kac tvl dootayin.

¹⁸‍Nyega akv nyem akwg lvgab yubal hoo doola cablin baloqkam, vnyi-vnyiv iss lvgab gv hurstayin hoo ariyum namgub kac tvl dootayin.

¹⁹“Hwdlo nyemv doola biqlinl hoo namc dooikam mwn aal kvn go namra haama tayin, hoo hiyv lajaqkam mwnwn idaq bov ariyum namgub kac tvl dootayin.

²⁰‍Hoo mwnwg namc dooikam hog mwlw kartam nanhv dvrwq maatayin. Hog mwlw mwnwg dootaqnan hv dvrwq maatayin.

²¹‍Hoo hiyv lajaqkam mwnwg kartam tulungam idaq bov mwwg atwg vjam niixaq tayin hoo mwv atv iss lvgab hurstayin hoo ariyum namgub kac tvl dootayin.

²²‍Hoo hiyv lajaqkam mwnwg dootam mam idaqbov mwwg atwg vjam niixaq tayin hoo mwv atv iss lvgab hurstayin hoo ariyum namgub kac tvl dootayin.

²³‍Mwnwg kartam nan jaqkam ho dootam jaqkam hwdlo mwv idaq baloqkam mwv ariyum namgub kac tvl dootayin.

²⁴‍Hoo nyegangv mwnwg namc doodu yin yuba baloqkam mwnwg dvrwq maanv mwam haadwn, mwv aal kvn gob dvrwq maab dootayin, hoo mwwg kartam nan mwlwngv dvrwq maatayin.

²⁵“Nyem akv mwnwg namc doonyia de moodam doonyia maab oyu mood go namc coodul dooba loqkam hog hwdgo mwn namc cool dootayin hwd xaqb mwn dvrwq maatayin. Mwnwg namc coodunam xaqb mwn dvrwq maatayin.

²⁶‍Mwnwg namc doodu tvl hog mwlw kartam nanhv la dootaqnanv dvrwq maatayin.

²⁷‍Hoo hiyv lajaqkam hoq dupum-dvrab pam idaqbov dvrwq maadwn, hoo mwwg atwg vjam niixaq tayin hoo mwv atv iss lvgab gv hurstayin hoo ariyum namgub kac tvl dootayin.

²⁸‍Hvbmabde mwnwg namc doonam hoqgv mwn dvrwq dvb hvbnyiloqkam mwn aal kvn go namc dooxongam doodwb nyitayin.

²⁹‍Hoo piin deen aalam mwn pukum akam bo maalo anyo bo dornyi go naalayil kvvrwq minsko tombu haagaho nyub dookub bwatayin.

³⁰‍Hoo nyubv dorgwn ham nyic aky gab hoo dorgwn ham boyuqnam aky gab jitayin. Hoo mwnwg namc doogam gab At Swg agaho nyubv nyic kwly gab pwr jitayin.

³¹“Soq sib nulv Israel nyiilungam dvrwq maanam hoqgv mwbwqto, hvbmab nyiloqkam bulv dvrwq maatwl sitayin hoo bulug pengko ho ngoqg xumk pirram kacdvb mvtayi.”

³²‍Soq pvvb tulu si dvrwq maanbo doola biqlinbo la cablinbo nyi ak gab;

³³‍ho mwnwg namc dooikam dvrwq maan ham hoo hiyv namc doonamv kvtaqb dooma dvn, ho namc dool dvrwq maab nyim tvl hiyv nyegangv yumin gvdwn hoq tulu gab soq pvvb sam jigyin.