Read Nyishi LIBITIKAS 16 Bible Online

LIBITIKAS 16 - Nyishi bible

LIBITIKAS 16

¹At Sw Mojesnvn Aaron gv ko tuup vnyiv sixo kokw so goonum, hwdlo bulv At Swg agaho hvvnwq hoo sinum,

²‍hoo At Sw Mojesnvn benum, “Noqg vbw Aaronnvn tortumnam Dvrwqbo Wrwg aya mwwpa ko dook hulu wrwho haama bvk hvl beto, ho mwv siram. Hoggab ngo aya mwwpa ko dook aoho doomwqb lvgab daqlin tayin.

³‍Hvbmabde Aaron soq sib nyil Dvrwqbo Wrw uraho haatayin: svv hvvb dorg nyic aky gab hoo yaap tvmwr dorg boyuqnam aky gab bwal haatayin.

⁴‍Mwv dvrwqbo pud lvlwqham kootayin hoo pud ura vjam mwwg gv ho kootayin, hoo mwwg hwwpo ho mwv pud pusam hiqcub tayin hoo pud bopyangam gvtayin; soq tulu si dvrwqbo vjv. Mwv gv hurs tvl hoq tulu ham kootayin.

⁵‍Hoo mwv Israel nyiilu hoqgv sibin bimp dornyi go nyic aky gab, hoo yaap tvmwr dorg boyuqnam aky gab naatayin.

⁶“Aaron svv hvvb dorham mwwg nyic aky gab jitayin hoo mwwg atgab la mwwg imiq nyiilu gab nyic kwly gab pwr jitayin.

⁷‍Ho mwv sibin dornyi go naatayin hoo ham kvvrwq minsko tombu haagag At Sw agaho pvvtayin.

⁸‍Hoo Aaron sibin dornyiam tak cingtayin, dorgwn ham At Sw gab hoo dorgwn ham Ajajel gab.

⁹‍Hoo Aaron At Sw gab tak cinjiqnam ham nyic akib jitayin,

¹⁰‍hvbmabde Ajajel gab tak cinjiqnam ham tordwb At Sw agaho nyic kwly gab pwr jitayin, ho ham Ajajel gab deexa-rarab kanam napaq tayin.

¹¹“Aaron svv hvvb dorham mwwg nyic aky gab jitayin hoo mwwg atgab la mwwg imiq nyiilu gab nyic kwly gab pwr jitayin. Mwwg nyic aky gab mwv hvvb dorham patab tayin.

¹²‍Hoo mwv wm loorangam yugw hoqgv At Swg aga hoqgv naatayin, hoo tiiswrbo sulum mwmwqnam ham alaq yumnyi gob naalayil hoo mwv tortumnam urab bwatayin

¹³‍hoo At Swg agaho sulum mam wmho vlwq tayin, sulum mwkv aya mwwpa ko dook pvvb uddum ham doomwq hvb juulup tayin, ho mwv siram.

¹⁴‍Hoo mwv hvvb hoqg ui meegwn naatayin hoo ham mwwg lvqcw lvgab aya mwwpa ko dook dou-caga daiyab pwqyaq tayin, hoo aya mwwpa ko dookwg agaho mwwg lvqcw lvgab kvn go uiyam pwqyaq tayin.

¹⁵“Ho mwv sibin ham nyiilug nyic aky gab patab tayin hoo hoqg uiyam tortum ko urab bwatayin hoo svv hvvb uiyam hoggub mwv nyinum hoqhvb mwv aya mwwpa ko dookwg agaho pwqyaq tayin.

¹⁶‍Ho Israel nyiilug dvrwq maagam gab hoo bulug nyimur ko-gab, hoo bulug nyic gab, mwv nyic kwly gab pwr jinam ham Dvrwqbo Wrwho pwr jitayin. Hoo mwv kvvrwq minsko tombu ho nyitayin, hoggab hoqhv bulug dvrwq maak pengko ho doodwn.

¹⁷‍Kvvrwq minsko tombu ho nyi akkam doomabv hwdlo mwv haal Dvrwqbo Wrwho nyic kwly gab pwr jipel lvvgwb lengnam gob hoo mwv nyic kwly gab pwram mwwg atgab hoo mwwg imiq gab hoo hookum bo Israel tulu gab jitayin.

¹⁸‍Ho mwv yugw lvvgwb lengl At Swg agaho nyic kwly gab pwr jitayin, hoo hvvb hoqg ui meegwn hoo sibin hoqg ui meegwn naatayin, hoo ham yugwg taqg-loosaqg vrrw tuluho vlwql aptayin.

¹⁹‍Hoo mwwg lvqcw lvgab mwv ui tuugin kvn go pwqyaq tayin, hoo ham dvrwq dvb mvtayin hoo Israel nyiilungam dvrwq maanam hoqgv garxaqtayin.

²⁰“Hoo hwdlo mwv Dvrwqbo Wrwb hoo kvvrwq minsko tombungam hoo yugwngam darxaql neexaqtayin, hoo mwv tornbo sibin ham jitayin.

²¹‍Hoo Aaron mwwg alaq lvqnyi-lvqnyiv tornbo sibin dumpo ho idaqtayin, hoo Israel nyiilug nyixiaqnam mwlwngam, hoo bulug nyimur mwlwngam, hoo bulug nyic nyinam mwlwngam beporl betam tayin. Hoo mwv hoq mwlw ham sibin dumpo ho vlwqtvl hoo ham deexa-rarab nyi wdwb mwx-mvaq doonbo alaqb jilwq tvl kanam tayin.

²²‍Ho sibin hv bulug hog mwlw nyixiaqkam mwv atv baqtwl gvda ura jaqb haatayin, hoo mwv sibin ham deexa-raraho topaq jitayin.

²³“Ho Aaron kvvrwq minsko tombu mwwg Dvrwqbo Wrwb haata tayikho pud vj koonam ham pipaq peekul hoo hoqgv wleq tayin.

²⁴‍Hoo mwwg gv-ngam mwv dvrwqko nyook ho hurstayin hoo mwwg vjam kootayin hoo lvvgwb lenglayil mwwg boyuqnam akiam la nyiilug boyuqnam akiam jitayin hoo mwwg atgab la nyiilu gab nyic kwly gab pwr jitayin.

²⁵‍Hoo nyic aky hoqg oxam mwv yugw ho partayin.

²⁶‍Hoo hiyv sibin ham Ajajel gab boonbo hv mwwg vjam niixaq tayin hoo mwwg gv-ngam iss lvgab hurstayin, hoo mwv kokwngam svmcw urab haatayin.

²⁷‍Hoo nyic aky gab svv hvvbam la sibinam aky jinam hoqg uiyam nyic kwly gab Dvrwqbo Wrwho pwr jiknam ham svmcwg lvvgwb baqlin tayin. Hoqg vpinam hoo hoqg vdinam hoo hoqg eengam wm lvgab partayin.

²⁸‍Hoo hiyv hoq tulu ham wm parnbov mwwg vjam niixaq tayin hoo mwwg gv-ngam iss lvgab hurstayin, hoo kokwngam mwv svmcw urab haatayin.

²⁹“Hoo hoqham nulv nwrba xaqb pvvb gob pvvtayin, ho pool kvnwg looyw aalam nulv vrr rwgdvl nyiidu nyi jaqkam ho nulug pengko ho doon nyoodo nyi jaqkam bonam nyimabv.

³⁰‍Hoggab soq aal so nulgab nyic kwly gab dvrwq mvdwb pwr jitayin. Nulug nyic mwlw hoqgv nulv At Sw agaho dvrwq dvb nyitayin.

³¹‍Hoqhv nulgab dvrwq Doonunam aalv, hoo nulv atv vrr rwto; hoqhv nwrba xaqb pvvb gob nyidwn.

³²‍Hoo mwwg abwg kwlib swwm dvb hiyam xuqlinam nyub ak hv dvrwqbo vjam kootwl nyic kwly gab pwr jitayin.

³³‍Mwv dvrwq namlo gab nyic kwly gab pwr jitayin, hoo mwv kvvrwq minsko tombu gab nyic kwly gab pwr jitayin hoo yugw gab jitayin, hoo mwv nyub gab nyic kwly gab pwr jitayin hoo nyiilu hookumbo tulug nyic kwly gab pwr jitayin.

³⁴‍Hoo soq si nulgab nwrba xaqb pvvb gob nyitayin, ho nulug nyic mwlw gab Israelwg nyiilu gab vnywngam lok nyic kwly gab pwr jitayin.” Hoo Mojes At Swg mwam gaml bekjaqb nyiknum.