Read Nyishi LIBITIKAS 18 Bible Online

LIBITIKAS 18 - Nyishi bible

LIBITIKAS 18

¹Hoo At Sw Mojesnvn agam goonv, begamv,

²“Israel nyiilungam agam goog dvl bulam beto, ngo nulug Pwnbo At Swv.

³‍Nulv Ijipt gvdaho nulug dooi yikho nyinam hvb nyimabv, hoo ngoqg nulam boolwq tak Kanaan gvdag nyinam hvb nyimabv. Nulv bulug gaml jikwb nyinam-wnam ham nyimabv.

⁴‍Nulv ngoqg pvvb tulungam tagdvl swwto hoo ngoqg gamlam pvvto hoo hoq tulu ham nyil wto. Ngo nulug Pwnbo At Swv.

⁵‍Hoqgab nulv ngoqg gamlam la pvvb tulungam pvvtayin; hiyv akgon hoq tulu ham nyib nyiloqkam mwv hoq hoggv swwtayin: Ngo At Swv.

⁶“Nulv hiyv kam mwwg imiq lwkwngam nywxw-nyol bwwmabv. Ngo At Swv.

⁷‍Noqg abam nyinyi-nyial, noqg annam nywxw bwwmabv, mwn noqg annv, no mwnwn nywxw bwwmabv.

⁸‍Noqg abwg nywxwngam no nywxw bwwmabv; hoqhv noqg abam nyinyi-nyianamv.

⁹‍Noqg any-bwrm mam nywxw bwwmabv, noqg abwg maalo annwg nyem koam, mwnwn imiqho ho maalo asaq namho soca sujaqkam.

¹⁰‍Noqg ko tuupwg maalo noqg ko nyemwg nyem koam nywxw bwwmabv, hoggab bulug nyinyi-nyianamv no atam nyinyi-nyia sunamv.

¹¹‍Noqg abwg nywxwg nyem koam nywxw bwwmabv, hoggab abwg imiqho socanamv, mwn noqg any-bwrmv.

¹²‍Noqg abwg any-bwrm mam nywxw bwwmabv; mwn noqg abwg imiq lwkw nyiingv.

¹³‍Noqg annwg any-bwrm mam nywxw bwwmabv, hoggab mwn noqg annwg imiq lwkw nyiingv.

¹⁴‍Noqg abwg vbw-bor nywxwngam no nywxw bwwmabv, hoggab mwn noqg mwi hvb nyidwn.

¹⁵‍Noqg nyeexwngam no nywxw bwwmabv, mwn noqg ko tuupwg nywxwngv, no mwnwn nyinyi-nyianamv.

¹⁶‍Noqg vbw-bor nywxwngam no nywxw bwwmabv; hoqhv noqg vbw-boram nyinyi-nyianamv.

¹⁷‍No annam la mwnwg nyem koam nywxw bwwmabv, mwnwg ko tuupwg nyem ko maalo nyem kog nyem ge nywxw bwwmabv; bulv noqg imiq lwkwngv hoqhv almab nyidwn.

¹⁸‍Hoo noqg nywxwg any-bwrm mam, mwnwn dvn-barngob nywxw bwwmabv, mwnwn dooxiq mvtwl, mwnwg any-bwrm mam nywxw bwwmabv.

¹⁹“Nyemv namc vrr doodu yukam no mwnwn bwwmabv hoggab mwn dvrwq maadwn.

²⁰‍Hoo noqg door-doopw nywxwngam no nywxw bwwmabv hoo no atv mwnwg lvgab kacdvb mvsdvn.

²¹‍Noqg kongam Moleknvn pwr jimabv, hoo noqg Pwnbo eminam kacdvb mvmabv: Ngo At Swv.

²²‍Nyega orum mam nywxw hvb yubg maabv; hoqhv bulum-kac dvb nyinamv.

²³‍Hoo no svdinam nywxw bwwmabv hoo no atv hoq lvgab dvrwq maab nyidwn, nyemv svdinam nyol bwwmabv, nyixiaq loodanamv.

²⁴“Nulv atv soq dvrwq maan tulu sam akkam nyimabv, hoggab soq tulu gab ngo nulug otuq hoqgv dvrwq maanbo nyob tulungam ruqpaql pakun,

²⁵‍hoo gvdangv dvrwq kumanum, ho soq sam nyimur ko-gab ngo bulam laqm-baqmnum, hoo gvdangv hoqho doonbo nyiilungam baapaq lengnum.

²⁶‍Hvbmabde nyiidu nyiv jaqkam hoo nulug pengko ho doonbo nyoodo nyiv jaqkam, nulv ngoqg gamlam la ngoqg pvvb tulungam pvvtayin hoo soq bulum-kac dvb nyinam tulu sam ma,

²⁷(hoggab nulug otuqho doonbo gvda soq nyiilungv soq bulum-kac dvb nyinam tulu sam nyigam gab gvdangv dvrwq kumanam),

²⁸‍nulv hoqham dvrwq maab nyib nyiloqkam, hoggub nulug otuqho nyob tulungam baapaqnam hvb gvdangv nulam baalin tayin.

²⁹‍Hoggab hiyv lajaqkam soq bulum-kac dvb nyinam tulu sam nyib nyiloqkam, hoq nyi ak ham bulug nyiilug lvgab xitaq kuram.

³⁰‍Hoqgab ngoqg gaml tulu sam pvvto ho soq bulum-kac dvb nulug agaho nyicw-mwcw nyinam tulu ham nywywngam nyimabv, hoo nulv nywywngam bulug lvgab nyil dvrwq maadwb nyimabv: Ngo nulug Pwnbo At Swv.”