Read Nyishi LIBITIKAS 19 Bible Online

LIBITIKAS 19 - Nyishi bible

LIBITIKAS 19

¹Hoo At Sw Mojesnvn agam goonv begamv,

²“Israel nyiilug dvparam agam goog dvl bulam beto, nulv dvrwqto, hoggab ngo nulug Pwnbo At Sw ngo dvrwqdvn.

³‍Nulv nyiicwr-cwrxiv atwg annam hoo atwg abam modul swwto, hoo nulv ngoqg Doonu Aalam pvvtayin: ngo nulug Pwnbo At Swv.

⁴‍Murty tulungam xumabv ho maalo nulv atgab dvvcw hoqgv pwnbo tulungam pwmabv: ngo nulug Pwnbo At Swv.

⁵“Hwdlo nulv At Swn swrso akiam pwr jiyikam, nulv ham jito ho nulam loorwq tayin.

⁶‍Hoqham nulv hoq aal darangam dvtayin, ho maalo loonyi deen aalam kam dvtayin, hoo loum aalam hog mwlw doon boam wm lvgab partayin.

⁷‍Hoqham loum deen aalam ham dvk baloqkam, hoqhv naxa dukun; hoqham loorwq kuram,

⁸‍hoo hiyv lajaqkam ham dvnbov mwwg nyijongam naatayin, hoggab mwv kacdvb mvdwn hoggv At Sw gab dvrwqdvn, hoo hoq nyi ak ham mwwg nyiilug lvgab xitaq kuram.

⁹“Hwdlo nulug rongongam nulv vly naaikun, nulug rongo raagam namgub nulv vly naamabv, ho nulug vly noumnam mam nulv naak maabv.

¹⁰‍Hoo noqg roo boolug aaxy puumnam tulu ham putab no wkur kumabv, ho noqg roo boolub roo aaxy yoql bo ngamkam no darmabv. No hoq tulu ham jwwgw la nyoodo nyiilu gab apaq jitayin: ngo nulug Pwnbo At Swv.

¹¹“Nulv dvco comabv; nulv xaalyo bon nyimabv; nulv akwn-akwn vm mvvmabv.

¹²‍Nulv ngoqg eminho xaalyol dingmabv, hoo nulug Pwnbog eminam kacdvb mvmabv: ngo At Swv.

¹³“Noqg door-doopwngam nyijab-nyiyiq ho maalo naalil naareq maabv. Nyera ak hoqg nyijongam no aal loogwn ar namgub pvvl doog maabv.

¹⁴‍No ruutar boam beemabv ho maalo nyiqca boam dwqtup dvb tutum maabv, hvbmabde noqg Pwnboam no bosto: ngo At Swv.

¹⁵“Nulv nyel pukumho jvqtwngam bemab nyimabv. No jwwgwbo gab mwwsw maabv ho maalo koibo gab luusaqb nyimabv, hvbmabde jvqtw hoqgv noqg door-doopwngam no pw-hwwtayin.

¹⁶‍Noqg nyiilug pengko ho no benyi-beya akgob nyimabv, hoo noqg door-doopwg swwgam no ceekol daqmabv: ngo At Swv.

¹⁷“Noqg vbw-boram noqg hangho no oyum maabv, hvbmabde noqg door-doopwngam no hoopu-haabia gvdwl doobam to, hvb nyima baloqkam mwwgab no nyic nyitayin.

¹⁸‍No ree daqmabv ho maalo noqg atwg nyiilug ko tuup tulungam ceekol hang baqmabv, hvbmabde noqg door-doopwngam no atam abynam hvb aby tayin; ngo At Swv.

¹⁹“Nulv ngoqg gamlam pvvtayin. Noqg svv hvvtwngam mviyo-mvco mvmabv. Noqg rongongam vly liiyikam luunyi go liiyo-liico maabv, ho no tan luunyi go mviyo-mvconam vjam koomabv;

²⁰“Pvlyw maatanam ho toolin maatanam nyega begaqnam nyem paqn akam, nyega asaqkv bwwb nyiloqkam, ham luusaqb kvvbwq dvb nyitayin. Bulam mengdwb nyiram, hoggab mwnwn tolin maata pan;

²¹‍hvbmabde kvvrwq minsko tombu haagaho yaap tvmwr dorg nyixiaqnam aky gab, mwwg nyijo kwliam At Swn mwv boa jitayin.

²²‍Hoo nyubv nyixiaqnam akiam At Swg agaho mwwg nyic nyiknam gab yaap tvmwram nyic kwly gab pwr jitayin, hoo mwwg nyic nyiknam ham mwam apaq jitayin.

²³“Hwdlo nulv gvda uraho haala yukul dvnam aaxy liib nyiloqkam, ho aaxy tulu ham dvdwb nyiram. Vnyw nywum go nulv ham dvmabv; hoqham hoggub nyijaqkam dvmabv.

²⁴‍Hoo vnyw nywpy deenho hoqg aaxy mwlwngv dvrwq tayin, ho At Swn paqg dvl aky jitayin.

²⁵‍Hvbmabde vnyw nywng deenam nulv hoqg aaxy tulu ham dvtayin, ho hoqg aaxiv vigo xeelin tayin: ngo nulug Pwnbo At Swv.

²⁶“Nulv vdinam hijum doodwb dvmabv. Nulv pwp-pocu cwwma-koqmabv ho maalo yuma gokam tuumabv.

²⁷‍Nulug dum mam dumtup dvb reqmabv ho noqg nvm mam riqcu-reqya maabv.

²⁸‍Nulug gv vdinam sinbo gab nulv atv un peegwl ho maalo no atv coqp pamabv: ngo At Swv.

²⁹“Noqg nyem koam kacdvb meqjobob mwnwn nyim mvmabv, hvb nyima baloqkam gvdangv meqjo bo uraho haatayin hoo gvdaho nyic rooxo tayin.

³⁰‍Nulv ngoqg Doonu Aalam pvvtayin hoo ngoqg dvrwq namlo ham modul xitayin: ngo At Swv.

³¹“Uiyam guulayil nam bisiq deenbo nyi tulu ham meekar taab wmabv, hoo bulug hoqgv nam dvrwq maadwb mvtayin: ngo nulug Pwnbo At Swv.

³²“No dumpu bo nyi tulug agaho daqrab tayin hoo nyekam-xoxnam mam modu tayin, hoo noqg Pwnboam no bos tayin: ngo At Swv.

³³“Hwdlo nyoodo nyiingv noqg lvgab nulv gvdaho doob nyiloqkam nulv bulam nyimur maabv.

³⁴‍Noqg lvgab nyoodo nyiingv nulug pengko ho doob nyiloqkam bulam nyiidu nyi hvb xito, hoo no atam aby sunam hvb bulam no aby to, hoggab nulv Ijipt gvdaho nyoodo nyiib nyinum: ngo nulug Pwnbo At Swv.

³⁵“Nulv daayaram ho maalo vgwngam ho maalo mvqlwngam xikal, pw-hwwk ho hwwmur maabv.

³⁶‍Nulv jvqtw jaakananam, jvqtw palangam, jvqtw ipangam, hoo jvqtw hinnam nyitayin: ngo nulug Pwnbo At Sw, hiyv nulam Ijipt gvda hoqgv boolinum.

³⁷‍Hoo nulv ngoqg gaml tulungam hoo ngoqg pvvb tulungam tagdvl hoq tulu ham nyil swwto: ngo At Swv.”