Read Nyishi LIBITIKAS 20 Bible Online

LIBITIKAS 20 - Nyishi bible

LIBITIKAS 20

¹At Sw Mojesnvn agam goonv begamv,

²“Israel nyiilungam beto, Israel nyi tulu ak gonjaqkam ho maalo Israel lvgab nyoodo nyi doomin gvnbo jaqkam mwwg ko huriam Moleknvn pwr jib nyiloqkam hv hoggub nyijaqkam sitayin. Gvdag nyiilungv mwam wlw lvgab wlw hurx tayin.

³‍Ngoqg nyuqm mam ngo atv hoqg nyi ak ham ceeko tayin hoo mwwg nyiilug pengko hoqgv mwam mvpaqtayin, hoggab mwwg ko hury akwn mwv Moleknvn pwr jipa ku, ho ngoqg dvrwq namlongam dvrwq maadwb hoo ngoqg dvrwq eminam kacdvb mvpa ku.

⁴‍Hoo gvdag nyiilungv hwdlo hoq nyi ak hv mwwg ko huriam Moleknvn pwr jim tvl, hoo mwam mengmab bulug vnyiqkv nyiqcw tvl doob nyiloqkam,

⁵‍ho ngoqg nyuqm mam ngo hoqg nyiam la mwwg nyob dvparam ceeko tayin hoo bulug nyiilug pengko hoqgv bulam mvpaqtayin, Moleknvn xumn bo, mwam la mwwg lvgab nyimin gvnboam mvpaqtayin.

⁶“Hiyv nyiingv uiyam guulayil bisiqbo dookub wnbov, bulug kokwb meqjo mingdvn, ngoqg nyuqm mam ngo hoq nyi ham ceeko tayin hoo mwwg nyiilug pengko hoqgv mvpaqtayin.

⁷‍Hoqgab nulv atv garxaq suto, hoo dvrwqto, hoggab ngo nulug Pwnbo At Swv.

⁸‍Ngoqg gamlam pvvl hoo nyil swwto; ngo At Sw nulam garxaqdvn.

⁹‍Hoggab hiyv lajaqkam mwwg atwg abam maalo annam beedwn ham sim tayin; mwwg ab maalo annam mwv beegam gab, mwwg aoho atv sigam bipup supa kun.

¹⁰“Nyiv mwwg door-doopwg nywxwngam nywxw bwwxin baloqkam, nyem-nyega nyum hoggub nyijaqkam vnyi-vnyiam sim tayin.

¹¹‍Nyiv mwwg abwg nywxwngam nywxw bwwnbov, mwv mwwg abam hvnyw nyipa paku; bunyiam hoggub nyijaqkam sim tayin; bulv atv sigam bulug aoho nyipup supa kun.

¹²‍Nyi ak mwwg nyeexwngam nywxw bwwb nyiloqkam, bunyiam hoggub nyijaqkam sim tayin; bulv nyima takanam mam nyipa ku; bulv atv sigam bulug aoho nyipup supa kun.

¹³‍Nyi ak nyega orum mam nywxw hvb bwwb nyiloqkam, bunyiv bulum-kac dvb nyipa kun; bunyiam hoggub nyijaqkam sim tayin; bulv atv sigam bulug aoho nyipup supa kun.

¹⁴‍Nyi ak kongam la annam nywxw naab nyiloqkam, hoqhv nyima takanam mam nyipa kun; mwam la bul mwlwngam wm lvgab partayin, ho nulug pengko ho hoqhvb nyic-nyia dook ram.

¹⁵‍Nyi ak svdinam nywxw bwwb nyiloqkam, mwam hoggub nyijaqkam sim tayin, hoo nulv svdinam mengpaq tayin.

¹⁶‍Nyem ak svdinam nyol bwwb nyiloqkam no nyem mam la svdin ham mengtayin; bulam hoggub nyijaqkam sim tayin; bulv atv sigam bulug aoho nyipup supa kun.

¹⁷“Nyi ak mwwg any-bwrm mam, mwwg abwg nyem koam, ho maalo mwwg annwg nyem koam nywxw-nyol bwwb nyiloqkam, hoqhv ximanamv, hoo bulam bulug nyiilug hury kaaga hoqgv mvpaqtayin. Mwv mwwg any-bwrm mam nywxw bwwgam gab mwv mwwg nyijo laqm mam baqtayin.

¹⁸‍Nyi ak nyem namc doodu boam bwwb nyiloqkam, mwv mwnwg swwg gwwlam hvnyw dvb mvpa ku, hoo mwnwg hijum gwwlam mwn atv hvnyw dvb mvpa ku. Hoqgab bunyiam bulug nyiilug pengko hoqgv mvpaqtayin.

¹⁹‍Noqg annwg any-bwrm mam no nywxw bwwmabv ho maalo noqg abwg any-bwrm mam nywxw bwwmabv, hoggab hoqhv noqg imiq nyiilungam hvnyw nyipanamv; bulug nyixiaq nyijongam bulv baqtayin.

²⁰‍Nyi ak mwwg kwiyig nywxwngam nywxw bwwb nyiloqkam, mwv mwwg kwiyam nyinyi-nyia dvn; bulug nyic nyijongam bulv baqtayin; bulv ko doomab sitayin.

²¹‍Nyi ak mwwg vbw-bor nywxwngam naab nyiloqkam, hoqhv dvrwq maanv. Mwwg vbw-boram mwv nyinyi-nyia dvn; bulv ko dooram.

²²“Nulv ngoqg gaml tulungam hoo pvvb tulungam pvvg dvl hoo hoq tulu ham nyil swwto, ho nulam doom dvb ngoqg gvda boa tanam hv nulam baapaq lengram.

²³‍Hoo nulug otuqho ngoqg ruqpaq tanam nyob tulug nyicw-mwcwngam nulv nyil wma bv, hoggab bulv soq mwlw sam nyigam gab ngo bulam oyum dvn.

²⁴‍Hvbmabde ngo nulam bepa kun, ‘Nulv bulug gvdangam otu nvvsiqtayin, hoo wtw lyuminko hoo ngola biqminko gvdangam ngo nulam ham gumn bwwm dvb jitayin.’ Ngo nulug Pwnbo At Swv, hiyv nulam nyiilu pengko hoqgv mvpin pakun.

²⁵‍Hoqgab nulv dvrwqbo svdin hoqgv dvrwq maanam mvpin tayin, hoo dvrwq maan pvta hoqgv dvrwq boam mvpin tayin. Nulv atv svdin hoqgv ho maalo pvta hoqgv ho maalo ked aoho gwl-ngamn bo hoqgv oyum dvb mvs maabv, hoq tulu ham ngo nulam gab dvrwq maan mwbwql mvpin kunamv.

²⁶‍Nulv ngoqgab dvrwqto, hoggab ngo At Sw dvrwqdvn hoo nyiilu hoqgv nulam mwbwql mvpin pakun, ho nulv ngoqgv ku.

²⁷“Nyega jaqkam nyem jaqkam hiyv uiyam guulayil bisiqdvn, hv hoggub nyijaqkam sitayin. Bulam wlw lvgab hurxtayin; bulv atv sigam bulug aoho nyipup supa kun.”