Read Nyishi LIBITIKAS 21 Bible Online

LIBITIKAS 21 - Nyishi bible

LIBITIKAS 21

¹Hoo At Sw Mojesnvn benum, “Aaron gv ko tuup nyub tulungam agam goog dvl hoo bulam beto: ‘Mwwg nyiilungam svma liik pengko ho nyubam hiyam kam atam dvrwq maadwb mvm mvmabv,

²‍mwwg annam, mwwg abam, mwwg ko tuupam, mwwg nyem koam, mwwg vbw-boram imiq lwkw nyi arongam bulam nyim to

³‍ho maalo mwwg any-bwrm mvvngam gab (hiyv mwam ogum dvn hoggab mwn nyol dooma ta; hoggab mwnwg gab mwv atam lokam dvrwq maadwb mvkam dvn).

⁴‍Mwwg nyiilu pengko ho mwv atv atam nyol gob mvl dvrwq maadwb mvsmabv hoo mwv atv atam kacdvb mvmabv.

⁵‍Bulv bulug dumpo dum mam ho maalo bulug coqyum mam reqpaq maabv, ho akkam bulug gv-ngam coqp pamabv.

⁶‍Bulug Pwnbo gab bulv dvrwq tayin hoo bulug Pwnbo eminam kacdvb mvta ma. Hoggab bulv bulug Pwnbog wtw dvsam At Swg dvs-twws akib jidwn; hoqgab bulv dvrwq tayin.

⁷‍Bulv meqjo bo nyem mam, ho maalo dvrwq kuma bo nyem mam, ho nyem mwnwg nyolam tumin sun boam nywxw naamabv, hoggab nyubv mwwg Pwnbo gab dvrwqdvn.

⁸‍No mwam garxaqtayin, hoggab mwv nulug Pwnbog wtwngam jitayin. Mwv noqgab dvrwq tayin, hoggab ngo At Swv, nulam garxaqbov dvrwqdvn.

⁹‍Hoo nyubwg nyem kov hiyv lajaqkam atv kacdvb nyil meqjo dvn, hv mwnwg abam kacdvb mvdwn; mwnwn wm hoqgv partayin.

¹⁰“ ‘Mwwg vbw-bor pengko ho nyub peelo bogub mvnam hv, ho hiyv dumpo ho neenan kutiam tooyaq pan hoo hiyam dvrwqbo vjam koom dvb garxaq pakun, hv mwwg dumpo dum mam pus-rvgin mvmabv ho mwwg vjam puc maabv.

¹¹‍Mwv nyi svma dook ho wnwq maabv ho mwv atam dvrwq maadwb mvmabv, mwwg ab gab jaqkam ho mwwg ann gab jaqkam wmabv.

¹²‍Mwv dvrwq namlo soqgv lvvgwb wmabv, mwv hvb wb nyiloqkam mwwg Pwnbog dvrwq namlongam kacdvb mvtayin, hoggab mwwg Pwnbog garxaqnan kutiv mwwg aoho doodwn: ngo At Swv.

¹³‍Hoo mwv mvvngam nyem mam mwwg nywxwb naatayin.

¹⁴‍Xwwmiam, ho maalo tumin sunam nyem mam, ho maalo dvrwq maanbo nyem mam, ho maalo meqjo bo tulu hoqgv mwv nywxw naadwb nyiram. Hvbmabde mwwg atwg nyiilu hoqgv mwv mvvngam boam mwwg nywxwb naatayin,

¹⁵‍ho mwwg nyiilu pengko ho mwwg hosiqkam mwv kacdvb mvram, hoggab ngo At Swv hiyv mwam garxaqbov.’ ”

¹⁶‍Hoo At Sw Mojesnvn agam goonv begamv,

¹⁷“Aaronnvn agam goog dvl beto, noqg hosiq hoqgv ywrngumnamv hotam-hotam xaqb mwwg Pwnbo dook ogumb wtwngam jitab hvvnwq nyoram.

¹⁸‍Hoggab hiyv kam ywrngumnam hv ogumb hvvnwq nyoram, hoqhv nyiqca bov ho maalo lutu bov, ho maalo nyuqm doomabv ho maalo lugu-loqgu bov,

¹⁹‍ho maalo nyi all-alaqho un-tar doon bov,

²⁰‍ho maalo hwngk hungku bo ho maalo nyiib rubc nyiv ho maalo vnyiq nyiqmv bov ho maalo axaq nyinbov ho maalo bwswq nyinbov, ho maalo otum kwnam nyiv ogumb hvvnwq nyoram.

²¹‍Nyub Aaron gv hosiq hoqg ywrngumnam nyiv hiyvkam At Swn dvs-twws akiam jitab ogumb hvvnwq nyoram; hoggab mwam ywrngum pa, mwwg Pwnbog wtwngam mwv ogumb hvvnwql jinyi ram.

²²‍Mwwg Pwnbog wtwngam mwv dvla tayin, mwlwngam dvrwq yaanbo la dvrwqbo tulungam hoq vnyi-vnyiam,

²³‍hvbmabde mwv tortumko ho maalo yugw lwkwb hvvnwq nyoram, hoggab mwam ywrngum paku, hoqgab ngoqg dvrwq namlongam mwam kacdvb mvm mvmabv, hoggab ngo At Sw hiyv bulam garxaqbov.”

²⁴‍Ho Mojes Aaron nvla mwwg ko tuup tulungam la Israel nyiilu mwlwngam agam gooknum.