Read Nyishi LIBITIKAS 22 Bible Online

LIBITIKAS 22 - Nyishi bible

LIBITIKAS 22

¹Hoo At Sw Mojesnvn agam goonv begamv,

²“Aaron nvla mwwg ko tuup tulungam agam goog dvl beto Israel nyiilug bulug ngam jipaqnam dvrwqbo dupum-dvrab ho dvs-twws tulu ham dvrwq mvto, ho bulv ngoqg dvrwqbo eminam kacdvb mvram: ngo At Swv.

³‍Bulam beto, ‘Nulug hosiq hoqgv hotam-hotam xaqb hiyv lajaqkam dvrwq maatwl Israel nyiilug dvrwqb At Swn jinam mam bwa baloqkam, hoq nyi ak ham ngoqg dook hoqgv mvpaqtayin: ngo At Swv.

⁴‍Aaron gv hosiq hoqgv tviyiq nyinbov la doola cablin bo nyiv mwv dvrwq maady deedib hiyv kam dvrwq boam dvmabv. Hiyv lajaqkam dvrwq maanboam ho maalo nyi svmangam, ho maalo nyi doola cablin boam idaqbov,

⁵‍hoo hiyv lajaqkam dvrwq maab topum-yorup puml gwl-jarn boam idaqbov dvrwq maadwb mvdwn ho maalo hoggv xeq mwwg dvrwq maanam mam, nyi ak hoqgv dvrwq maanam naadwn—

⁶‍ham nyiv idaq baloqkam ariyum namgub kac tvl dootayin hoo mwwg gv-ngam iss lvgab hurs maady deedib dvrwqbo dvs-twwsam dvmabv.

⁷‍Hwdlo doonyiv haaikun mwv dvrwq tayin, hoo kokwngam mwv dvrwqbo dvs-twwsam dvta-twwtayin, hoggab hoq tuluhv mwwg dvsv.

⁸‍Mwv atv sin boam la dwr-pee cexnam mam dvmabv, hoo hoq tulu ham dvl atv dvrwq maadwb mvmabv: ngo At Swv.

⁹‍Hoqgab bulv ngoqg gamlam pvvtayin, hvb nyibaloqkam bulv nyic nyitayi hoo bulv hoqhvb kacdvb nyil sitayin: ngo At Sw hiyv bulam garxaqbov.

¹⁰“Nyiisam nyiv dvrwqbo dvs-twwsam dvmabv; nyubwg nyoodo nyiinv ho maalo ree goqnam nyerangv dvrwqbo dvs-twwsam dvmabv,

¹¹‍hvbmabde nyub akv mwwg gumn twngk gab raasur ak rvbnyiloqkam, hoq raasur ak hv hoqham dvtayin, hoo mwwg namho ko bwwnam nyera tulungv ham dvtayin.

¹²‍Nyubwg nyem kov nyiisam nyi ak nyol naaiyi kunyi loqkam mwn dvrwqbo dvs-twws jikumnam ham dvmabv.

¹³‍Hvbmabde nyubwg nyem kov xwwmib nyikbov ho maalo tumin sukbov hoo ko doomab mwnwg abwg namho wkur kunbov mwnwg abwg dvsam mwn dvla tayin; hvbsujaqkam nyiisam nyiv ham dvnyi ram.

¹⁴‍Hoo hiyv gonjaqkam cengmab dvrwqbo dvs-twwsam dvk baloqkam, mwv hoqg koram ang goiya vbw tvl dvrwqbo dvs-twwsam nyubam jitayin.

¹⁵‍Israel nyiilug At Swn bulug dvrwqbo dvs-twwsam jinam mam, bulv kacdvb mvnyi ram,

¹⁶‍hoo bulug dvrwqbo dvs-twwsam dvgam-twwgam gab, bulam nyixiaqnam la nyimurnam nyijongam baqmto: hoggab ngo At Sw hiyv bulam garxaqbov.”

¹⁷‍Hoo At Sw Mojesnvn agam goonv begamv,

¹⁸“Aaron nvla mwwg ko tuup tulungam la Israel nyiilu mwlwngam agam goog dvl hoo bulam beto, hwdlo Israelwg nombu hoqgv la Israel ho doomin gvnbo nyoodo nyiv bulug dingrnam mam la bulug hang mwwbwql aky jinam ham bulv At Swn mwwg boyuqnam akib jimto,

¹⁹‍hoqham loorwq mvdwb hvb nyiloqkam un-tar gvma bo svv hvvb maalo yaap maalo bimp tulungam jidwb nyitayin.

²⁰‍Nulv un-tar gvnboam aky jimabv, hoggab hoqham nulgab loorwq ram.

²¹‍Hoo hwdlo dingrnam ham ho hang mwwbwql svv hvvtw hoqgv ho sviya pvtw hoqgv swrso aky pwram At Swn jitayin, hoqham loorwq mvdwb hvb nyiloqkam bobuql hvlap mvseq booloq jito; hoqhv un-tar gvnboam jimabv.

²²‍Svdin nyiqca boam ho maalo ywrcmanam mam ho maalo lutu-loqtu boam ho maalo iijuq juqdu boam ho maalo axaqboam ho maalo bwswq boam, nulv At Swn jimabv ho maalo hoq tulu ham yugw ho At Swg dvs akib jimabv.

²³‍Noqg hang mwwbwql aky jinam svv hvvb la sviya ko hv lutu-loqtu jaqkam alv, hvbmabde dingrnam aky gab hoq hvkam loorwq ram.

²⁴‍Svdin otum kwnam mam ho lvca-laqca dvb mvnam ham At Swn jimabv; Nulv hoq tulu ham nulug gvda uraho nyimabv,

²⁵‍nulv hvbkam nyimabv nyoodo nyi galoqkv svdin naanam ham Pwnbog wtw gob jimabv. Hoggab bulug uraho un-tar gvnamv doodwn, ho bulug ho lutu-loqtu ko-gab hoq tulu ham nulgab loorwq ram.”

²⁶‍Hoo At Sw Mojesnvn agam goonv begamv,

²⁷“Hwdlo hvvb maalo sviya maalo sibinv ko bwwi nyiloqkam, hoq tuluhv ann lvgab aal kvn go daqmin gvtayin, hoo piin deen aalam hoqhv At Swg dvs aky gob loorwq dvb nyila dvn.

²⁸‍Hvbmabde nulv hvvb koam ho maalo sviyangam la mwnwg koam aal lookinam mengmabv.

²⁹‍Hoo hwdlo nulv At Swn paqyalinco paqnam pwram pwr jiyikam, nulv loorwq dvb pwram jito.

³⁰‍Hoq tulu ham aal lookin ho dvtayin; nulv hoqham aal loogwn ar namgub hog akkam doom mvmabv: ngo At Swv.

³¹“Ngoqg gaml tulu sam nulv pvvtayin hoo hoq tulu ham nyito: ngo At Swv.

³²‍Hoo nulv ngoqg dvrwqbo eminam kacdvb mvmabv, ho ngam Israel nyiilug pengko ho garxaq tayin. Ngo At Swv hiyv nulam garxaqbov,

³³‍nulug Pwnbob nyim dvb hiyv nulam Ijipt gvda hoqgv boolin kunum: ngo At Swv.”