Read Nyishi LIBITIKAS 23 Bible Online

LIBITIKAS 23 - Nyishi bible

LIBITIKAS 23

¹At Sw Mojesnvn agam goonv begamv,

²“Israel nyiilungam agam goog dvl hoo bulam beto, soq xuqlinam At Swg durum tulu sam nulv dvrwqbo dookum ho pui baqto; soq tulu si ngoqg xuqlinam durumv.

³“Aal loox go bonam nyitayin, hvbmabde kvn deen aalv hingky jaq Doonu de aalv, dvrwq dookum de aalv. Nulv bonam nyimabv. Nulv hoglo doojaqkam hoqhv At Swg Doonu aalv.

⁴“Dvrwq dookumko ho At Swg durum dvdwb xuqlinl apkunam mam nulv moodam xuqp kunum ham pui bekin tayin.

⁵‍Otuq poolwg camleq loopy aalwg ariyum mam At Swg Dvtv Durum dvnam ham dvtayin.

⁶‍Hoo hoqg pool barkinwg camleq loong aalam At Swg Opap Kiilwq maanam wtwngam dvtayin; nulv aal kvn go opap kiilwq maanam wtwngam dvtayin.

⁷‍Hoqg otuq aalam nulv dvrwq dookum mam dootayin; nulv doopaq-doiyaqbo bonam akam nyimabv.

⁸‍Hvbmabde nulv aal kvn gob At Swn dvs akiam jitayin. Kvn deen aalv dvrwq dookum de aalv; nulv doopaq-doiyaqbo bonam akam nyimabv.”

⁹‍Hoo At Sw Mojesnvn agam goonv begamv,

¹⁰“Israel nyiilungam agam goog dvl hoo bulam beto, hwdlo nulv ngoqg jinam gvdaho haalayil vly naaikam, nulug otuqcob vly naanam am agaqkam nulv nyubam bwa jitayin,

¹¹‍hoo mwv At Sw agaho am agaqkam bwa jitayin, ho nulam loorwq tayin. Doonu aal kokwngam nyubv hoqham bwa jitayin.

¹²‍Hoo hoq aalho hwdlo nulv am agaqkam bwa jiyikam, nulv un-tar gvma bo vnyw nywgbo sviya koam At Swn boyuqnam akib jitayin.

¹³‍Hoo am aky lvgab albo wtwngam kuty lvgab mviyonam ipa hoqgv sarnyi go At Sw gab dvs akiam sungam dvb jitayin, hoo roo ala aljaqn bo twws akiam hin ak hoqgv juqpy gob jitayin.

¹⁴‍Hoo nulug Pwnboam nulv aky jima deedib nulv ammam wtwb, ho maalo romnul ho maalo leelaqb hoq aal namgub dvmabv: nulv hoglo doojaqkam soq gaml sam nwrba xaqb nulug hotam-hotam gob nyil dootayin.

¹⁵“Nulug otuqcob am agaqkam bwal jinam aal hoqgv Doonu aalwg kokwngam nulv hapta haptab kvn hapta gob xitayin.

¹⁶‍Kvn haptag Doonu aal kokwngam nulv aal camng gob xitayin. Ho nulv At Swn nitbo ammam dvs aky gob jitayin.

¹⁷‍Nulug doogw nyook hoqgv nulv cwwnam wtw tvqnyi go torlin naadwb, hoqg wtw hv ipa hoqgv taqkinv sarnyi gogab mvnam mam bwatayin. Hoq tuluhv albo wtwngam opap kiilwql cwwcw tvl At Swn otuqcob aaxy-amar gob jitayin.

¹⁸‍Hoo nulv wtw lvgab un-tar gvma bo sviya ko vnyw nywgbo kvn go, hoo svv hvvtw hoqgv hvvb loq dorg hoo yaap tvmwr loq dornyi go jitayin. Hoq tulu ham dvs aky lvg bvla bulug twws aky lvgab At Swg boyuqnam aky gob nyitayin, hv At Swn dvnam aky sungam bov.

¹⁹‍Hoo nulv nyic aky gab vnyw nywgbo sibin bimp loq dorg jitayin, hoo vnyw nywgbo yaap loq dornyi go swrso pwr akib jitayin.

²⁰‍Hoo nyubv hoq tulu ham otuqcob aaxy-amar lengco bo wtw lvgab sviya dornyiam At Swg agaho bwa jitayin. Hoq tuluhv nyub tulu gab At Sw ho dvrwq tayin.

²¹‍Hoo nulv hoq aal lookin ho puiyam betam tayin. Nulv dvrwq dookum dootayin. Nulv doopaq-doiyaqbo bonam akam nyimabv. Nulv hoglo doojaqkam nulug hotam-hotam xaqb soq si nwrba gob pvvbwb nyitayin.

²²“Hoo hwdlo nulug rongongam nulv vly naaikun, nulug rongo raagam namgub nulv vly naamabv, ho nulug vly noumnam mam nulv naak maabv. Nulv hoq tulu ham jwwgwbo la nyoodo nyiilu gab apaq jitayin: ngo nulug Pwnbo At Swv.”

²³‍Hoo At Sw Mojesnvn agam goonv begamv,

²⁴“Israel nyiilungam agam goog dvl hoo beto, kvn poolwg otuq aalam nulv hingky jaqb doonu tayin, dvrwq dookum ho mwwpanam tuuliam miqpur lengtayin.

²⁵‍Nulv doopaq-doiyaqbo bonam akam nyimabv, hoo nulv At Swn dvs akiam jitayin.”

²⁶‍Hoo At Sw Mojesnvn agam goonv begamv,

²⁷“Kvn poolwg looyw aalam Nyic kwlib pwr jinam mam nyitayin. Hoqhv nulgab dvrwq dookum gob dootayin, hoo nulv atv dvma-twwmab vrr rwl hentwr hengdvl At Swn dvs akiam jitayin.

²⁸‍Hoo nulv hoq aalam hog nyis akam nyimabv, hoggab hoqhv Nyic kwlib pwr jid aalv, nulug nyic kwly gab pwram nulug Pwnbo At Swg agaho jitayin.

²⁹‍Hoggab hoq aalam hiyv nyiv vrr rwl hentwr hema boam mwwg nyi tulu hoqgv mvpaqtayin.

³⁰‍Hoo hiyv nyiv hoq aalam bonam nyitayin, hoq nyiam ngo mwwg nyiilug pengko hoqgv twrtayin.

³¹‍Nulv bon akam nyimabv. Nulv hogloq nyook ho doojaqkam nulug hotam-hotam xaqb soq si nwrba gob pvvbv.

³²‍Nulv Doonu aalam hingky jaqb pvvtayin, hoo nulv hoq aalam atv atv vrr rwl hentwr hento. Hoq poolwg aal kiyag ariyum hoqgv naarab layil ariyum-ariyum mam nulug Doonu aalam pvvtayin.”

³³‍Hoo At Sw Mojesnvn agam goonv begamv,

³⁴“Israel nyiilungam agam goog dvl hoo bulam beto, kvn poolwg camleq loong aalam hoqgv nyirab layil aal kvn gob At Swg Doogw Durum mam nyitayin.

³⁵‍Otuq aalam nulv dvrwq dookum gob dootayin; nulv doopaq-doiyaqbo bonam akam nyimabv.

³⁶‍Hoggab kvn aalam nulv At Swg dvs-twws akiam jitayin. Piin deen aalam nulv dvrwq dookum mam dootayin hoo At Swn dvs akiam jitayin. Hoqhv piwr jwr-jwr dvb dookum doonam gob dootayin; nulv doopaq-doiyaqbo bonam akam nyimabv.

³⁷“Soq tulu si At Swg xuqlinam durumv, ham dvrwq dookumko moodam nulv pui bepa tayin, hoggab At Swn dvs-twws akiam, boyuqnam akiam hoo dvs akiam, pwr jinam mam, hoo twwnam akiam, hoqg aal-aal kalam mam kvxaqmab jitayin,

³⁸‍At Swg Doonu aalam hoo nulug lvqc cinam tulungam hoo nulug dingrwl aky jinam mam hoo nulug hang mwwbwql aky jinam mam nulv At Swn jitayin.

³⁹“Kvn poolwg camleq loong aalam hwdlo nulv rongo ho vly naatab hookum yin, nulv At Swg durum aal tulungam aal kvn gob nyil dootayin. Otuq aalam nulv piwr jwr-jwr dvb doonu tayin, hoo piin deen aalam kam nulv piwr jwr-jwr dvb doonu tayin.

⁴⁰‍Hoo nulv otuq aalam albo svvn tulug aaxiam, pvng svvn haqbam, svvn swwmw dwr-dwr twqn boam hoo taam-toruq svvn haqbam naatayin, hoo nulug Pwnbo At Swg agaho nulv hwnyir-hvmar tayin.

⁴¹‍Nulv vnywngam aal kvn gob At Swg durum mam sookuml soomin tayin. Soq si nwrba gob nulug hotam-hotam xaqb pvvb gob nyitayin; nulv sam kvn poolam sookuml sootayin.

⁴²‍Nulv doogw ho aal kvn gob dootayin. Israel nyiidu nyi mwlwngv doogw ho dootayin,

⁴³‍hoq baloqkam nulug hotam mwlwngv cengtayin ngo Israel nyiilungam doogw ko ho doomnum hwdlo ngo bulam Ijipt hoqgv boolin yukho: ngo nulug Pwnbo At Swv.”

⁴⁴‍Soq sib Mojes Israel nyiilungam At Swg xuqlinam durum tulungam bibwq kunum.