Read Nyishi LIBITIKAS 24 Bible Online

LIBITIKAS 24 - Nyishi bible

LIBITIKAS 24

¹At Sw Mojesnvn agam goonv begamv,

²“Israel nyiilungam dvrwqbo olib kutiam lemp gab noqg dookub bwa mvdwb gaml jito, ho lemp hoqg hutongv huudul dootayin.

³‍Kvvrwq minsko tombug pvvb uddum mam tortumko lvvgho Aaron At Sw agaho ariyum aram lwxiam ham mwx-mvaq tayin. Hoqhv nwrba xaqb nulug hotam-hotam xaqb pvvb gob nyitayin.

⁴‍Mwv At Sw agaho mwlwngam dvrwq yaanbo hun lemp dvqgwko ho lempam mwx-mvaq aptayin.

⁵“No albo wtwngam naagdvl hoo hoq hoqgv camleq vnyi go wtwngam cwwto; ipa ak hoqgv vnyi gogab wtw pwx-cwrho mwlwqto.

⁶‍Hoo no hoq tulu ham pwx-pwx gob pvmnyi gob mvgdvl mwlwngam dvrwq yaanbo hun tebol ho At Swg agaho paal aptayin.

⁷‍Hoo no dvrwq kwrwqbo sungam bo kutiam naalayil wtw pvmnyi-pvmnyi dookho aptayin, ho hoqhv wtw lvgab mwwpanam jibwqnam gob At Swn dvs aky jikho jitaq tayin.

⁸‍Doonu aalwg loocw-lootam Aaron hoqham At Swg agaho lwxiam mwx-mvaq tayin; hoqhv Israelwg nyiilu hoqgv nwrba gob pvvb birnamv.

⁹‍Hoo hoq jinam tuluhv Aaron la mwwg ko tuup tulu gab dootayin, hoo bulv hoq dvrwq dookho dvtayin, hoggab hoqhv At Swn dvs aky jinam hoqgv mwwg gab mwlwngam dvrwq yaanbo dvsv, ham lwxiam nyil dootayin.”

¹⁰‍Israel dvnwg ko tuup ak hiyvg abv Ijipt nyiingv, Israel nyiilug pengko ho lvvgwb lengnum. Hoo Israel dvn hoqg ko tuupv la Israel nyi ak svmcw ho paiyaq mins baloqkam,

¹¹‍hoo Israelwg dvn ko tuupv Pwnbog eminam bej-beparnum hoo beenum. Ho bulv mwam Mojesnvn boa jinum. Mwwg ann hoqg eminv Selomit Dibrig nyem kov, Dan nyob hoolu hoqgv.

¹²‍Hoo hwdlo At Swg mwwlwqkam bulam betam maady deedib, bulv mwam tuml apnum.

¹³‍Ho At Sw Mojesnvn agam goonv begamv,

¹⁴“Hiyv beenbo akam svmcw lvvgwb boolin to, hoo mwwg benam mam tapa bo mwlwngam mwwg dumpo ho alaq idaq mvto, hoo dvpar mwlwngv mwam wlw hurtayin.

¹⁵‍Hoo Israel nyiilungam goog dvl beto, hiyv lajaqkam mwwg Pwnboam beenbov mwwg nyicam baqtayin.

¹⁶‍Hiyv lajaqkam At Swg eminam bej-bepar bov sitayin. Dvpar mwlwngv mwam wlw hurtayin. Nyoodo nyiam kam nyiidu nyiam mvnam hvb hwdlo mwv Pwnbog eminam bej-bepar yin sim tayin.

¹⁷“Hiyv lajaqkam nyi mengn bov hoggub nyijaqkam sitayin.

¹⁸‍Hiyv lajaqkam svdinam mengn bov ham kwliam hvbkalam jitayin.

¹⁹‍Hiyv lajaqkam mwwg door-doopwngam un-tar mvg baloqkam, mwv hoggub nyipan hvbkalam mwam mwrwqtayin,

²⁰‍jwwtwrnam mam jwwtwr kalam, vnyiqkam vnyiqkalamb, exiam exy kalamb; hoggv xeq mwv nyi akam un-tar mvnum hvbkalam mwam mvtayin.

²¹‍Hiyv lajaqkam svdinam mengn bov ham kwlib jitayin, hoo hiyv lajaqkam nyi mengm bov sitayin.

²²‍Nulv nyoodo nyi gab la nyiidu nyi gab pvvb akinam nyitayin, hoggab ngo nulug Pwnbo At Swv.”

²³‍Ho Mojes Israel nyiilungam agam goonum, hoo hiyv beenbo ak ho bulv svmcw lvvgwb boolinum hoo mwam wlwngv hurxnum. Ho At Sw Mojesnvn gaml jinam hvb Israel nyiilungv nyiknum.