Read Nyishi LIBITIKAS 25 Bible Online

LIBITIKAS 25 - Nyishi bible

LIBITIKAS 25

¹At Sw Mojesnvn Sinai puutuho agam goonv begamv,

²“Israel nyiilungam agam goog dvl hoo bulam beto, hwdlo nulv ngoqg gvda jinam uraho haaikun, At Sw gab gvdangam Doonu dvb jito.

³‍Hoggab no vnyw nywx gob noqg rongongam vly liito, hoo vnyw nywx gob noqg roo boolungam mvxaq-mvraql hoo hoqg aaxiam pukum to,

⁴‍hvbmabde kvn deen vnywngam At Sw gab gvdangam hingky jaqb Doonu mvto. Noqg rongongam no vly liimabv ho noqg roo boolungam mvxaq-mvraq maabv.

⁵‍Hoggv noqg rongo ho atv swwlin dvn hamkam vly naamabv, ho noqg roo boolug roo aaxiam pukum maabv. Hoq vnyw ham hingky jaqb gvdangam doonu mvto.

⁶‍Gvdag Doonu de vnywho nam, noqg nyera-paqn tulungam hoo noqg ree goqnam nyera tulu ham hoo nyoodo nyiv noqg lvgab dooba bo tulungam dvs jitayin,

⁷‍hoo noqg gvdaho doonbo noqg tuun-meengv hoo nyorog svdin mwlwngv hoqg rongo hoqg lengn bo mwlwngv bulug dvs gob dvtayin.

⁸“No vnyw kvn-kvnwb xigdvl kvn vnyw mood gob xikum to, ho hoqham no xikum baloqkam vnyw campy leq kiya vnyw gob nyitayin.

⁹‍Ho no kvn poolwg aal looywngam tuuly vcjaqb miqtayin. Nyic kwly gab pwr jid Aalam no tuuliam noqg gvda mwlwho miqtayin.

¹⁰‍Hoo no vnyw camng ngam garxaqtayin, hoo gvdaho doonbo nyi mwlwngam svswqb swwdy kunam puiyam bekin to. Hoqhv nulgab jubli gob nyitayin, hwdlo nulv nyiicwr-cwrxiv gumn at-atam mwwg gumn-ranam atam jikur jitayin hoo mwwg otuqg nyobub xikur mvtayin.

¹¹‍Hoq vnyw camng hv nulgab jubli vnyw gob nyitayin; hoq vnywngam nulv vly gokam liiram ho rongo ho hoggv atv swwlin dvn ham vly gokam nookum ram ho mvxaq-mvraq maanam roo boolug aaxiam kam pukum maabv.

¹²‍Hoggab hoqhv jublingv. Hoqhv nulgab dvrwqbob nyitayin. Nulv rongo hoqg atv swwlin boam dvlatayin.

¹³“Hoqg jubli vnywngam nulv nyiicwr-cwrxiv gumn at-atam gumnam mwam jikur jitayin.

¹⁴‍Hoo noqg door-doopw kedam no puqgwi ho noqg door-doopw hoqgv rvgwi nyid nyiloqkam, nulv akwn-akwn hiyv nvkam nyimur mins maabv.

¹⁵‍Jubli vnyw kokwngam hog hwd vnyw go noqg door-doopwg kedam no rongo mvl dviyin dvn hoqg koram no jitayin, hoo vnyw-vnywg vly lengn boam mwv hwwka layil nam puqtayin.

¹⁶‍Vnywngv naleq yin nyiloqkam, no koram koi dvb mvtayin hoo vnywngv anyo baloqkam no koram anyo dvb mvtayin, hoggab mwv nam hoqg vly leng boam xika layil puqtayin.

¹⁷‍Nulv akwn-akwn nyimur mins maabv, hvbmabde noqg Pwnbon bosto, hoggab ngo nulug Pwnbo At Swv.

¹⁸“Hoqgab nulv ngoqg gamlam nyitayin hoo ngoqg pvvb tulungam pvvtayin hoo hoq tulu ham nyil swwtayin, hoo nulv gvdaho bos haai maab dootayin.

¹⁹‍Gvdangv aaxy-amar xeelin tayin, hoo nulug dwnwnam mam nulv dvtayin hoo hoqho bos haai maab dootayin.

²⁰‍Hoo nulv hvl bebnyiloqkam, ‘Ngulv vly liimab ho vly nookum mabnyiloqkam, kvn vnywho hoggv dvtayin?’

²¹‍Vnyw nywxho ngoqg lvqcnam mam nulug aoho ngo gaml jitayin, ho vnyw nywum gob non-poop dvb vly-axeqkam dvngam swwm tayin.

²²‍Hwdlo piin vnywngam nulv vly liiyikun, nulv hvraqb omk-miikam dvl dootayin; hwdlo nit dvg vliv lengnam xaqb, nulv kiya vnyw namgub hvraq dvl dootayin.

²³“Gvdangam puqtw kwlwl puqpaq maabv, hoggab gvdangv ngoqgv. Hoggab nulv ngoqg lvgab nyoodo nyiib nyitwl nyiody boanum.

²⁴‍Hoo nulug doognam gvda mwlw ham, nulv gvdangam pvlyw mvdwb jito.

²⁵“Noqg vbw-bor gon jwwgw ko-gab mwwg gumn meegwn puqp nyiloqkam, mwwg imiq lwkw nyiv ham pvlyw bob nyitayin hoo hoggv mwwg vbw-borv puqknum ham pvlyw tayin.

²⁶‍Nyi akkam ham pvlyw bo dooma baloqkam mwv atv kokwngam swwla-geela yukul hoqham pvlyw naadwb jot dvb dooi kukam mwv atv pvlyw taikun,

²⁷‍ho mwwg puqnam vnywngam xika layil hoo mwwg puqnam nyi akam hog hwdgo jiyin dukun ham mwv jitkul mwwg gumnam mwv nookur taikun.

²⁸‍Hvbmabde mwv hoqham pvlywl nookur dukub pvlywnanv pwwma baloqkam, mwv hognvkv puqnum hv jubli vnyw namgub hoqg rvnbo nyi alaqho dootayin. Jubli vnywngam ham apaq jitayin, hoo mwv mwwg gumnam nookur taikun.

²⁹“Nyiv bvly toqtumko uraho nam doogwngam puqp nyiloqkam, mwv hoqham puqd vnyw uraho pvlyw lengtayin. Hoggab hoq vnyw nywpw ho mwv pvlywl nookur dukub nyicwngv dootayin.

³⁰‍Hoqham hoq vnyw uraho pvlyw kuma baloqkam, hoq toqtumko nam puqknamv mwwg hotam namgub rvnbo gab doos-dooda tayin, hoqham jubli vnywho apaq kuram.

³¹‍Hvbmabde bvly toqtum maanam nampam tulug nam ham gvda rongog ked hvb xitayin. Hoq tulu ham pvlyw nyotayin, hoo hoq tulu ham jubli vnywngam apaq jitayin.

³²‍Hvbmabde Lebi nyi tulug bopam tuluho, Lebi nyi tulungv hwdlo jaqkam bopam urag nam tulu ham pvlyw nookur taikun.

³³‍Hoo Lebi nyi tulungv bopamho puqnam mwwg nam mam mwv pvlywl naalin dvb nyila dvn, ho ham hvb nyik mabalo jubli vnywngam apaq jitayin. Hoggab Israel nyiilug pengko ho Lebi nyi tulug bopamho nam doonbo tulungam bulug gumn gob bwwla tayin.

³⁴‍Hvbmabde bulug bopam dook tuluho sibin-svv dukumko gvdangam puqla ram, hoggab hoqhv bulug nwrba xaqb gumn bwwsv.

³⁵“Noqg vbw-borv jwwgwl hoo mwv atv tornyi-daanyi kuma bolo, no mwam nyoodo nyi nyiogy gilwqbo akwb hvb torta-daatayin, hoo mwv noqg lvgab dootayin.

³⁶‍Mwwg hoqgv leqbaql naamabv, hvbmabde noqg Pwnboam bosto, ho noqg vbw-borv noqg lvgab dooba tayin.

³⁷‍No mwam noqg twngkam leqbaql naadwb ciirwq maabv, ho noqg dvsam mwwg hoqgv naabinl nookur dvb mwwl jimabv.

³⁸‍Ngo nulug Pwnbo At Swv, hoo nulug Pwnbob nyidwb hiyv nulam Ijipt gvda hoqgv Kanaan gvdangam jidwb nulam boolin kunum.

³⁹“Noqg vbw-borv mwv jwwgw ko-gab mwv nam atv puqlwq dvloqkam, no mwam rvnam raasuram nyinam hvb nyimabv:

⁴⁰‍mwv noqg lvgab bon nyim dvb ree goqnam nyi hvb dootayin hoo nyoodo nyi hvb dootayin. Mwv noqg lvgab jubli vnyw namgub bon nyil dootayin.

⁴¹‍Ho mwv la mwwg ko tulungv mwwg lvgab noqg hoqgv lengta yukun, hoo mwwg atwg nyobub la mwwg abwg gumn tulu dookub wkur taikun.

⁴²‍Hoggab bulv ngoqg nyerangv, hiyam ngo Ijipt gvda hoqgv boolin kunum; bulam raasur ak hvb puqla ram.

⁴³‍No mwam anya-kaasar dvb bwwl doog maabv hvbmabde noqg Pwnboam bosto.

⁴⁴‍Noqgab raasur hoo nvsuram no rvdwb mwwd nyiloqkam: noqg diis-paap nyob tulu hoqgv no raasuram hoo nvsuram rvla tayin.

⁴⁵‍Nyoodo nyiv hiyv nulug lvgab dooba dvn hoqg nyob tulu hoqgv nulv rvla tayin, hoo nulug gvdaho nyoodo nyi tulug ko bwwnam hv nulug gumn gob nyitayin.

⁴⁶‍Hoo nulv bulam nulug ko tuup tulungam gumn otu gob nwrba xaqb nvvsiq mvtayin. Nulv bulug hoqgv raasuram bwwla tayin, hvbmabde nulug vbw-bor Israel nyiilug aoho nulv akwn-akwn pvvb bwwl doog maabv, akwn aoho akwn anya-kaasar dvb nyimin sumabv.

⁴⁷‍Noqg lvgab doonbo nyoodo nyiv la nyiogy giabo nyiv nyetwl hoo mwwg bviywrho doonbo noqg vbw-borv jwwgw ko-gab mwv atv nyoodo nyiam maalo nyiogy giabo nyi tulug nyob hoolub puqlwq baloqkam,

⁴⁸‍mwam puqxo kokwngam mwv pvlyw tayin. Mwwg vbw-bor hiyv gonjaqkam mwam pvlyw tayin,

⁴⁹‍ho maalo mwwg kwiyv maalo mwwg abwg vbw-borv pvlyw tayin, ho maalo mwwg imiq lwkw nyob hoolu hoqgv pvlyw tayin. Hvbmab nyiloqkam mwv nyet kuba lo mwv atv pvlyw tayin.

⁵⁰‍Mwv mwam rvnbo lvgab hwdlo vnywho mwv atam hoq nyi lvgab puqlwq kunum ham mwv jubli vnyw namgub xika tayin, hoo mwwg puqknam soorv vnywngam xika layil xilin tayin. Mwwg at lvgab mwwg doomin gvnam moodam bon nyim dvb ree goqnam hvb xitayin.

⁵¹‍Vnywngv vigo hvraqb dooxiq baloqkam, mwwg pvlyw dvb soor jinam ham mwv vnywngam xika layil jidwb nyitayin.

⁵²‍Vnywngv doojaqkam hvbmabde jubli vnywngv ogum kuba lo mwwg vnyw bon nyidy sanam koram xika layil mwv pvlyw tayin.

⁵³‍Mwv mwam bon nyim dvb ree goqnam ak hvb nyil mvl doom tayin. Mwam anya-kaasar dvb mwwg aoho no pvvb bwwl doog laram.

⁵⁴‍Hoo mwv hoqg vnyw tuluho pvlyw nyok mablo, ho mwv la mwwg ko tulungv mwwg lvgab jubli vnywngam lengta yukun.

⁵⁵‍Hoggab Israel nyiilungv ngoqg nyerangv. Bulv ngoqg nyerangv hiyam ngo Ijipt gvda hoqgv boolin kunum: ngo nulug Pwnbo At Swv.