Read Nyishi LIBITIKAS 26 Bible Online

LIBITIKAS 26 - Nyishi bible

LIBITIKAS 26

¹“Nulv atv atgab murty tulungam ho maalo guss ak, ho maalo swwrw soogwngam diidaq maabv, hoo nulug gvdaho pwlw soogwngam diidaq tvl ham pvxwl xumabv, hoggab ngo nulug Pwnbo At Swv.

²‍Ngoqg Doonu Aalam nulv pvvtayin hoo ngoqg dvrwq namlongam nulv xixo vrram xitayin: ngo At Swv.

³“Nulv ngoqg pvvbam hoo ngoqg gaml tulungam nyib nyiloqkam,

⁴‍ho ngo nulam nyodo hodam hom jitayin, hoo gvdangv naleqgo vly-axeqkv lengtayin, hoo rongog aaxy-amar svvn tulungv naleqgo xeetayin.

⁵‍Nulug jurpiam roo aaxy pudnam gob lwql dootayin, hoo roo aaxiam vly liid mood namgub putayin. Hoo nulug dvdwb mwwnam mam nulv dvdeq dvb dvtwl bos haai maab gvdaho dootayin.

⁶‍Ngo gvdaho swrso dvb jitayin, hoo nulv yumin karmin tayin nulam hiyv kam bos dvb mvkram. Hoo gvda hoqgv nam cex-gamx deenbo svdin tulungam ngo mvpaqtayin, hoo nulug gvdaho nyob nyet pakram.

⁷‍Nulug ceebio tulungam nulv ruqmin gvtayin, hoo bulam nulug lyoqr orioq lvgab mengtayin.

⁸‍Nul nyi ang-gv nyi lwwgam ruqmin gvtayin, hoo nyi lwwgv camg lwwyw nyiingam ruqmin gvtayin, hoo nulug ceebio tulungam nulug lyoqr orioq lvgab mengtayin.

⁹‍Ngo nulug dookub tobkur tayin hoo nulam swwm-geem dvb mvtayin hoo nulam dumtwq-miilyw mvtayin hoo ngoqg nulug lvgab pvvb birnam mam hwngkw mvtayin.

¹⁰‍Nulug vly-axaqkv naleq ko-gab nulv omk-miikam dvmin tayin, hoo nit vly-axaqkam bvqlwq dukub kucuq boam sarpaq tayin.

¹¹‍Ngoqg doogwngam ngo nulug pengko ho mvtayin, hoo ngoqg yvjv nulam oyum ram.

¹²‍Hoo nulug pengko ho ngo wl yvtayin hoo nulug Pwnbob nyitayin, hoo nulv ngoqg nyiilub nyitayin.

¹³‍Ngo nulug Pwnbo At Swv, hiyv nulam Ijipt hoqgv boolin kunum, ho nulv bulug raasurb nyik maabv. Hoo ngo nulug vgwbo luukam papia jipa kun hoo nulam nywrab tvl wm pakun.

¹⁴“Hvbmabde nulv ngam tagab maab nyiloqkam hoo soq gaml tulu sam nyil swwma baloqkam,

¹⁵‍nulv ngoqg gaml tulungam tagab maab nyiloqkam, nulug yvjv ngoqg pvvb tulungam oyum baloqkam, ho nulv ngoqg gaml tulungam nyil swwma baloqkam, hvbmabde ngoqg pvvb birnam mam mvpia baloqkam,

¹⁶‍ho ngo soq tulu sam nulam nyitayin: ngo nulug dookub bos haainam lvgab iicw-tobum dooyam hoo liya dooyam hoo vnyiq dooyam haam tayin hoo nulug hangam mwwdwq dvb mvtayin. Hoo nulug vly liinam mam niqtuq dooma dvb mvtayin, hoggab ham nulug ceebio tulungv dvtayin.

¹⁷‍Ngo nulam ceekol ngoqg nyuqmv moiyeq tayin, hoo nulug ceebio tulug agaho nulam jwwtab tayin. Nulug ceebio oyumnam nyiv nulam pvvb bwwl doog tayin, hoo nulam nyi akjijaqkam ruqma su hvbmabde nulv ketayin.

¹⁸‍Hoo soqgv hvraqb nulv ngam tagab mabaloqkam, ngo nulam nulug nyic gab kvn yaiya go laqm-baqmwl gwrnyiaq tayin,

¹⁹‍hoo ngo nulug larnam atoram mvpia tayin, hoo ngo nulug doangam dvvcw hvb hoo nulug swcwngam tama hvb mvtayin.

²⁰‍Hoo nulug ator tornamv niqtuq dooram, hoggab nulug gvdangv vly-axaq svvnamv vigo swwlin ram, hoo rongog svvn tulungv aaxy-amar xeekram.

²¹“Ho nulv ngoqg wkwb wmab hoo ngam tagab mabaloqkam, nulug nyic gab ngo nulam kvn yaiya go laqm-baqnam tulu ham boqdu mvtayin.

²²‍Hoo cex-gamx deenbo svdin tulungam ngo nulam ceeko mvdwb toolin tayin, hoq tuluhv nulam la nulug ko tulungam hoo nulug tuun-meengam dwtwr tayin hoo nulug nyi hoolungv anyo tayin, ho nulug lamtangv tapin piul soj maalap tvl dootayin.

²³“Hoo soqg laqm-baql gwrnyiaqnam hoqgv nulv ngoqg dookub wkur maab ho ngoqg wkwb wma baloqkam,

²⁴‍ho ngo nulam ceekol wtayin, hoo nulug nyic gab ngo atv jaq nulam kvn yaiya go laqm mam baqm tayin.

²⁵‍Hoo nulug aoho ngo nyob nyetam pamtayin, hoqhv pvvb birnam mam mvpia ko-gab kwly naatayin. Hoo nulug bopam tuluho nulv lvkin gob hookum baloqkam ngo nulug pengko ho iicw-tobum dooiyam kanam tayin, hoo nulam nyemaq alaqho gvqlwq jitayin.

²⁶‍Hwdlo ngo nulug wtw dvsam mutum kuba lo, nyem wywngv wtw pwkinam cwwl dvdwb nyitayin hoo nulug dvs-twwsv dookram, hoo nulv dvtayin hvbmabde hv hwdlo jaqkam nulam xumt ram.

²⁷“Hvbmabde soq sib kam nyik tvl nulv ngam tama baloqkam, hoo ngoqg wkwb wma baloqkam,

²⁸‍ho ngo hang lengtwrl ngo nulam ceeko tayin, hoo nulug nyic gab ngo atv jaq nulam kvn yaiya go laqm mam baqm tayin.

²⁹‍Nulug ko tuup tulug vdinam, hoo nulug nyem ko tulug vdinam nulv dvtayin.

³⁰‍Hoo nulug xumk nyookam ngo twrtayin hoo nulug sulum par dook yugwngam papia tayin hoo nulug svmangam nulug svma aoho nulug murty tulu lwkwho joopaq tayin, hoo ngoqg yvjv nulam oyum tayin.

³¹‍Hoo nulug bopam tulu ham ngo dooxa-xaaram dvb mvtayin hoo nulug xumk namlo tulungam tapin rubu dvb mvtayin, hoo nulug sungam dvb parnam akiam ngo suuram.

³²‍Hoo ngo atv jaq gvdangam twrtayin, ho nulug ceebio tulungv hoqho doonyia bov loml mooka-saq tayin.

³³‍Hoo nulam ngo nyob tulug gvdaho cwrsaq twqb ruqpiaq tayin, hoo nulug kokwb lyoqr orioqkam poobw tvl ruqmin gvtayin, hoo nulug gvdangv deexa-rara taikun, hoo nulug bopam tulungv dooxa-xaaram taikun.

³⁴“Ho nulv hwdlo nulug ceebiongv gvdaho dooleq yukun, gvdangv swwiywq nyam-nyam tvl swwl Doonul doomin tayin.

³⁵‍Gvdangam hog hwdgo apaqtayin hwdkalam go hoqhv swwl doomin tayin, hwdlo nulv gvdaho doodu yikho gvdangv nulug Doonu de aal hookam doonu maanum.

³⁶‍Hoo nulv hiyv gvdangam apaq peel wk boam bulug ceebio gvdaho ngo bulug hangho bosil any maanam mam kanam tayin. Svvn okam dooi yidin yikam bulv bosil ketayin, hoo nyiingv lyoqr orioq lvgab ruqtwl kenam hvb bulv ketayin, hoo nyi akkam ruqmin gvmab bulv dwqtubl geqtayin.

³⁷‍Bulam nyi akkam ruqmin gvma su, hvbmabde lyoqr orioq puseq tvl ruqmin gviyam xaal kenam hvb bulv akwn aoho akwn dwqtubl xaal kedo. Hoo nulug ceebio tulug agaho nulv dvqrwq dvb ator dookram.

³⁸‍Hoo nulv nyob tulug pengko ho yuupaq tayin, hoo nulug ceebio tulug gvdaho nulam dvmeq taikun.

³⁹‍Hoo doonyu bo nyi tuluhv nulug ceebio tulug gvdaho bulug nyixiaq ko-gab yaapaq taikun, hoo bulug ab tulug nyixiaq ko-gab bulv hoqhvb yaapaq tayin.

⁴⁰“Hvbmabde bulug nyixiaqkam hoo bulug ab tulug nyixiaqkam hoo bulug ngam ceekol nyepin pingpaqnam mam, hoo ngoqg wkwb wmab nyinam tulu ham betaml bulv xaqlin maagam gab,

⁴¹‍bulam ngo bulug ceebio tulug gvdaho boolwq jiknum—hvbmabde bulug pepaql-mux maanam hangv yanwl hoo bulv bulug nyixiaqkam nyidar baloqkam,

⁴²‍ho ngoqg Jakub lvgab pvvb birnam ham ngo mwwpa tayin, hoo Aisak lvgab ngoqg pvvb birnam ham mwwpa tayin hoo Abraham lvgab ngoqg pvvb birnam ham mwwpa tayin, hoo gvdangam mwwpa tayin.

⁴³‍Hvbmabde bulv gvdangam apaq dvb nyitayin hoo gvdangv nyi tulu dooma yukam swrsob Doonu tayin, hoo bulug nyixiaqnam mam bulv nyidar tayin, hoggab bulv ngoqg pvvb tulungam haqpaqnum hoo bulug yvjv ngoqg gamlam oyum dvb nyinum.

⁴⁴‍Hvbsujaqkam hoq mwlwho, hwdlo bulug ceebio tulu gvdaho bulv dooikam ngo bulam haqpaqram, ho ngo bulam oyuml twrkiq-twrmab twrpaqram hoo bulug lvgab ngoqg pvvb birnam mam ngo pvvb juqbo ram, hoggab ngo bulug Pwnbo At Swv.

⁴⁵‍Hvbmabde bulug ab tulungam pvvb birnam emin gab ngo bulam mwwpa tayin, hiyam ngo Ijipt gvda hoqgv nyob tulug kaagaho boolin kunum, ho ngo At Swv, ngo bulug Pwnbob nyidwb.”

⁴⁶‍Mojes lvgab Sinai puutuho soq gaml tulu sam la pvvb tulu sam At Sw gvla Israel nyiilug pengko ho pvvb mvl apkunum.