Read Nyishi LIBITIKAS 27 Bible Online

LIBITIKAS 27 - Nyishi bible

LIBITIKAS 27

¹At Sw Mojesnvn agam goonv begamv,

²“Israel nyiilungam agam goog dvl hoo bulam beto, nyi akwg kor hvb nyi akv At Swn luusaq jaqb dingr baloqkam,

³‍ho vnyw camnyi hoqgv camx namgub nyega tulug korv rup sikil camng gob nyitayin.

⁴‍Hoq nyi hv nyem baloqkam hoqg korv rup sikil cammum gob nyitayin.

⁵‍Hoq nyi hv vnyw nywng hoqgv vnyw camnyi namgub nyega baloqkam hoqg korv rup sikil camnyi gob nyitayin, hoo nyem gab rup sikil camgwb nyitayin.

⁶‍Hoq nyi hv pool barkin hoqgv vnyw nywng namgub nyega baloqkam hoqg korv rup sikil taqang gob nyitayin, hoo nyem baloqkam hoqg korv rup sikil tvqnyi gob nyitayin.

⁷‍Hoo nyi hv vnyw camx ho maalo ham laleq yaaba lo, nyegangam rup sikil camleq taqang gob nyitayin, hoo nyem ak gab rup sikil camgwb nyitayin.

⁸‍Hoo nyi tuugin vc loodab jwwgw ko-gab koram jinyi mabaloqkam, ho mwv nyub agaho daqm tayin, hoo nyubv mwwg koram xilin jitayin; nyubv mwwg koram jidy bo ak hv hog hwdgo jila tayin ham xilin jitayin.

⁹“Hoqhv svdin baloqkam ham At Swn aky jitayin, ho mwwg hog mwlw jinam hv At Sw gab dvrwq tayin.

¹⁰‍Mwv hoqham asaq svdinam kwly nyoram ho alboam ho almadwb, ho almanboam aldvb ham nvvlyw lakam ram; hoo mwv ham asaq svdin kwly baloqkam hoq vnyi-vnyi svdin hv dvrwq tayin, hv At Sw gv.

¹¹‍Hoo hoqhv dvrwq maanbo svdin goloqkam ham At Swn aky jinyi ram, ho mwv svdin ham nyub agaho daqm tayin,

¹²‍hoo nyubv hoqham albo maalo alman gob xilin tayin; ho nyubv hoggub xilin tayin, hvb hoqham xita yukun.

¹³‍Hvbmabde mwv hoqham pvlyw nwwb nyiloqkam, mwv hoqg koram ang go vbw tvl jitayin.

¹⁴“Hwdlo nyi akv mwwg nam mam dvrwqbo lvqc gob At Sw gab darxaq yukam, nyubv hoqham aljaqkam ho almajaqkam sooram xilin tayin, ho hoqhv hvb nyil wtayin.

¹⁵‍Hoo ham jinbo hv mwwg nam mam pvlyw dvb mwwb nyiloqkam, mwv hoqg kor lvgab ang go vbw tvl jitayin, hoo hoqhv mwwg gvku.

¹⁶“Nyi akv mwwg gvda meegwn At Sw gab darxaq baloqkam, hoqho hog hwdgo vly-axeqkv haadwn ham xika dvb nyitayin. Tanyeq homar akinv rup sikil camng gob xitayin.

¹⁷‍Ho mwwg rongongam jubli vnyw hoqgv mwv darxaq baloqkam, hoqg koram xika tayin,

¹⁸‍hvbmabde mwwg rongongam jubli vnyw wxo kokwngam mwv darxaq baloqkam, jubli vnywngv haanam gob hog hwd vnyw gob nyitayin hoqg koram nyubv xilin tayin, hoo soor hoqgv meegwn seqpaq tayin.

¹⁹‍Hoo hiyv mwwg atwg rongongam darxaq tvl pvlyw nwwdwn, ho mwv ang go hoq kor lvgab vbw tvl jitayin, hoo hoqhv mwwg gab doota yukun.

²⁰‍Hvbmabde mwv rongongam pvlyw dvb mwwma baloqkam, ho mwv rongongam nyi asaqkam puqk baloqkam ham pvlyw nyokram.

²¹‍Hvbmabde rongongam jubli moodam jik baloqkam hoqhv At Sw gab dvrwq aky gob nyitayin, rongongam At Swn jipaq pakun. Nyubv ham gumn doog tayin.

²²‍Mwwg gumn maab rongo rvnam ham mwv At Swn darxaq baloqkam,

²³‍nyubv hoqg koram jubli vnyw namgub xikal xilin tayin, hoo nyi akv hoq aalam hoqg koram At Swn dvrwq aky gob jitayin.

²⁴‍Jubli vnywngam rongongam hiyv goloqkv rvknum hoqg ked atam ham gumn bwwm dukub jikur taikun.

²⁵‍Vx-cwr kor xikanan hv dvrwq namlog xicw jaqb xitayin: camnyi gera ngv sikil akwb nyidwn.

²⁶“Hvbmabde otuqcob svding ko bwwnam hv At Sw gv, ham nyi akam darxaq maabv; hoqhv hvvb jaqkam ho sviya jaqkam, hoq tuluhv At Sw gv.

²⁷‍Hoo hoqhv dvrwq maan svdin baloqkam mwv ham kor jil rukur tayin, hoo hoq aoho ang go vbw tvl rvtayin, hoqham pvlyw mabaloqkam, ham hoqg kor ho puqtayin.

²⁸“Hvbmabde nyi akv At Swn jipaq kunam dupum-dvrab pam, nyi jaqkam ho svdin jaqkam, ho mwwg otu nvvsiqnam rongo jaqkam puqla ram ho pvlyw lakam ram; jipaq kunam dupum-dvrab mwlw hv At Sw gab mwlwngam dvrwq yaan bov.

²⁹‍Hiyam jaqkam jipaq kunam nyi ham pvlyw nookur dvb nyikram; mwam hoggub nyijaqkam sim tayin.

³⁰“Ked hoqgv swwlin bo vly-axaqkv jaqkam ho aaxy-amar jaqkam jibwqnam hv At Sw gv; hoqhv At Sw gab dvrwqdvn.

³¹‍Nyi akv mwwg jibwqnam ham pvlyw dvb mwwd nyiloqkam, mwv ang go vbw tvl ham naatayin.

³²‍Hoo svv doryw hoqgv dorgwn, ho sviya doryw hoqgv dorgwn jibwq tayin, tuun-meeg doryw hoqgv dorgwn jibwq tayin, hoq tuluhv At Sw gab dvrwq tayin.

³³‍Akinv al-koram xuqbwql xuqdu maabv, ho hoqham nvvly kamabv; hoo mwv hoqham nvvly baloqkam hoqg nvvlynam hvvla hoo nvvly dvb jinam hvvkam dvrwq taikun, At Sw gvku; hoqham pvlyw dvb nyikram.”

³⁴‍Mojes lvgab Sinai puutuho soq gaml tulu sam At Sw Israel nyiilu gab pvvb mvl apkunum.