Read Nyishi LIBITIKAS 4 Bible Online

LIBITIKAS 4 - Nyishi bible

LIBITIKAS 4

¹Hoo At Sw Mojesnvn agam gool, begamv,

²“Israel nyiilungam agam goog dvl beto, hiyv gonjaqkam At Swg nyima bvk hvl gaml jinam tulu ham nyiduml nyimab hvbmab nyip-nyilupl hoq akgon nyik baloqkam,

³‍hoqham xuqlin kunum nyubv nyic nyib nyiloqkam hv nyiilug ao lo nyixiaq kam haam dvn, ho mwwg nyic nyiknam gab mwv svv hvvb un-tar gvma boam nyic aky gab At Swn jitayin.

⁴‍Mwv hvvbam kvvrwq minsko tombug haagaho At Swg agaho boatayin hoo mwwg alaqkv hvvb dumpo ho idaql hoo hvvbam At Sw agaho patab tayin.

⁵‍Hoo xuqlin kunum nyubv hvvb hoqg ui tuugin naalayil ham kvvrwq minsko tombu ho bwatayin,

⁶‍hoo nyubv mwwg lvqcwngam uiho xwqbam layil uiyam kvn go At Swg agaho dvrwq namlongam tortumko ho haagaho pwqkar tayin.

⁷‍Hoo nyubv ui tuugin kvvrwq minsko tombu yugwg sungam dvb sulum mwwk vrrw ho toolwqtvl At Sw agaho pvvtayin, hoo jingo hvvb uiyam mwlwngam yugw lwkwho boyuqnam aky gob kvvrwq minsko tombug haagaho toop tayin.

⁸‍Hoo nyic gab aky jinam hvvb hoqg ox mwlwngam, hara hoqg ox mwlwngam hoo vx-aiyeqho ox doonbo mwlw ham mwv peelin tayin

⁹‍hoo kiicwr pwnyi lvgab gvvs hoqg ox tulu ham, hoo ringtaq lvgab vsinam mwv kiicwr lvgab peelin tayin.

¹⁰(soq mwlw sam hoggub swrso pwr aky jinam hoqgv naalinam hvb hvvb hoqgv naalin tayin); hoo nyubv hoq tulu ham yugw ho boyuqnam aky parnam hvb partayin.

¹¹‍Hvbmabde hvvb hoqg vpinam, hoo gv vdin mwlwngam, hoqg dumpongam, hoqg lvpiangam, hoqg hara vdinam, hoo hoqg eengam—

¹²‍hvvb hog piiyum kunam mwlwngam—mwv svmcwg lvvgwg dvrwqko nyook mui yoqkumko aoho wsw lvgab wm parxa tayin. Ho ham mui aoho parxa tayin.

¹³“Israel nyi mwlwngv nyip-nyilupl nyicam nyipkulo hoo dookumg vnyiq kaagaho kvs pakloqkam, hoo At Swg nyima bvk hvl gaml jinam tulu ham nyi ak nyipkulo, hoo bulug nyixiaqkam bulv mwwdar kubnyilo,

¹⁴‍ho bulug nyic nyiknam mam bulv cengk baloqkam hookumbo dvparv bulug nyic gab svv hvvb dorg aky jil kvvrwq minsko tombu agaho boatayin.

¹⁵‍Hoo dvpar hoqg nyixa tulungv bulug alaqkv At Swg agaho hvvb dumpo ho idaql hoo hvvbam At Sw agaho patab tayin.

¹⁶‍Ho xuqlinam nyubv hvvb hoqg ui tuugin kvvrwq minsko tombu uraho bwwlwqtayin,

¹⁷‍hoo nyubv mwwg lvqcwngam uiho xwqbam layil uiyam kvn go At Swg agaho vj tortumko haagaho pwqkar tayin.

¹⁸‍Hoo mwv ui tuugin kvvrwq minsko tombu yugwg vrrw ho toolwqtvl At Sw agaho pvvtayin, hoo hoq pwqngo hvvb uiyam yugw lwkwho boyuqnam aky gob kvvrwq minsko tombug haagaho toop tayin.

¹⁹‍Hoo hoqg ox mwlwngam mwv naalin tayin hoo ham yugw ho partayin.

²⁰‍Hoqhvb mwv hvvbam mvtayin. Mwv hoggub nyic aky hvvbam mvnum, hoqhvb mwv sam nyitayin. Hoo nyubv bulug nyic kwly gab pwr jitayin, hoo bulug nyicam apaq jitayin.

²¹‍Hoo mwv svmcwg lvvgwb hvvbam baqlin tayin hoo ham otuq hvvbam wm parnam hvb parpaq tayin; hoqhv dvpar gab nyic akiv.

²²“Hwdlo nyigbo akv At Swg nyima bvk hvl gaml jinam tulu ham nyiduml nyimab hvbmab nyip-nyilupl nyitkul ham mwwg nyixiaqkam mwwdar kubnyiloqkam

²³‍ho mwwg nyic nyiknam mam mwv cengk baloqkam, sibin bimp loq dorg un-tar gvma boam tayin,

²⁴‍hoo mwwg alaqkv sibin dumpo ho idaql hoo ham boyuqnam aky jikwg At Sw agaho patab tayin; hoqhv nyic akiv.

²⁵‍Ho nyubv nyic gab aky jinam hoqg ui tuugin mwwg lvqcw lvgab naatayin hoo ham boyuqnam aky jikwg yugw aog vrrw tuluho pvvtayin hoo hoqg lvvgwg uiyam boyuqnam aky jik yugw lwkw ho toop tayin.

²⁶‍Hoo hoqg ox mwlwngam mwv swrso pwr akiam parnam hvb, yugw ho partayin. Ho nyubv mwwg nyic kwly gab pwr jitayin, hoo mwwg nyicam apaq jitayin.

²⁷“Nyi nyiisam akgon At Swg nyima bvk hvl gaml jinam tulu ham nyiduml nyimab hvbmab nyip-nyilupl nyitkul, hoo mwwg nyixiaqkam mwwdar kubalo,

²⁸‍ho mwwg nyic nyiknam mam mwv cengk baloqkam, mwv mwwg nyic gab sibin bin dorg un-tar gvma boam mwwg nyic nyiknam gab boatayin.

²⁹‍Hoo mwwg alaqkv nyic aky gab jinam sibin dumpo ho idaql hoo nyic aky ham boyuqnam aky kwlib patab tayin.

³⁰‍Hoo nyubv hoqg ui tuugin mwwg lvqcw lvgab naatayin hoo ham boyuqnam aky jikwg yugw aog vrrw tuluho pvvtayin hoo hoqg jingo uiyam yugw lwkw ho toop tayin.

³¹‍Hoo swrso gab pwr aky jinam oxam naalinam hvb, hoqg ox mwlwngam mwv naalin tayin, hoo nyubv ham yugw ho At Swn sungam bo aky gob partayin. Hoo nyubv mwwg nyic kwly gab pwr jitayin, hoo mwwg nyicam apaq jitayin.

³²“Mwv sviya ko ak nyic gab aky jidnyiloqkam, mwv un-tar gvma bo yaan loq dorg jimtayin

³³‍hoo mwwg alaqkv nyic aky gab jinam dumpo ho idaql hoo nyic aky ham boyuqnam aky kwlib patab tayin.

³⁴‍Hoo nyubv hoqg ui tuugin mwwg lvqcw lvgab naatayin hoo ham boyuqnam aky jikwg yugw aog vrrw tuluho pvvtayin hoo hoqg jingo uiyam yugw lwkw ho toop tayin.

³⁵‍Hoo swrso gab pwr aky jinam sviya oxam naalinam hvb, hoqg ox mwlwngam mwv naalin tayin, hoo nyubv ham yugw ho At Swg dvs-twws aky aoho partayin. Hoo nyubv mwwg nyic nyiknam gab nyic kwly gab pwr jitayin, hoo mwwg nyicam apaq jitayin.