Read Nyishi LIBITIKAS 5 Bible Online

LIBITIKAS 5 - Nyishi bible

LIBITIKAS 5

¹“Hiyv lajaqg nyic nyinam ham mwam nyi rolu ho mwwg kaanam mam la cengnam mam hvvkib pagoqkam bem dvb jitayin, hvbmabde mwv agam bema baloqkam, mwwg nyixiaqkam mwv baqtayin;

²‍ho hiyv lajaqkam kacboam kvsiq baloqkam, hoqhv nyorog svdin svma kacboam, ho tuun-mee svma kacboam ho puml gwn-jarnbo tulug svma kacboam, hoo hoqham mwwg hoqgv mwv kvsil doogam gab, hoo mwv kac yukun, hoo mwwg nyixiaqkam mwwdar yukun;

³‍ho mwv nyi hoqgv lengbo kacam kvs baloqkam, hog goojaqkam kacboam doog yukun, hoq akhv kac duku, ho hoqhv mwwg hoqgv kvs dukun, hoqham mwv hwdlo cengyi kun, hoo mwwg nyixiaqkam mwwdar yukun;

⁴‍ho hiyv lajaqkam mwwg nvbcwr hoqgv nyebia jaqb alman la alboam dingnam-dingcal nyiilungam dingb nyiloqkam, hoo hoqhv mwwg hoqgv kvs dukun, hoo hwdlo mwv hoqham cengkul hoo hoq tulu hoqgv akgon mwwg nyixiaqkam mwwdar yukun;

⁵‍ho hoq tulu hoqgv akgon mwwg nyixiaqkam mwwdar yukun, hoo mwwg nyic nyinam ham beporl betam yukun,

⁶‍hoqg mwwg nyic nyigo gab mwv At Swn jil dvb sviya-sibin pvtw hoqgv yaan dorg maalo bin dorg nyic aky gab boatayin. Hoo nyubv mwwg nyic gab nyic kwly pwr jitayin.

⁷“Hvbmabde mwv sviyangam jinyi mabnyiloqkam, mwwg nyic nyigo gab mwv At Sw gab pukum akam bo maalo anyo bo dornyi go jim dvb bwa jitayin, dorgwn ham nyic aky gab hoo akwn ham boyuqnam aky gab.

⁸‍Mwv hoq tulu ham nyubam bwa jitayin, hoo otuq akam nyic aky gab jitayin. Mwv hoqg lwwpongam hiqswr tayin hvbmabde hiqriq loodaram,

⁹‍hoo mwv ui tuugin nyic aky jinam ham yugw taqgwn ho pwqtayin, hvbmabde hoq pwqngo uiyam yugw lwkwb biqpaq mvtayin; hoqhv nyic akiv.

¹⁰‍Ho mwv vnyi deenam ham pvvb bekjaqb boyuqnam akib jitayin. Hoo nyubv mwwg nyic nyigo gab nyic kwly pwr jitayin, hoo mwwg nyicam apaq jitayin.

¹¹“Hvbmabde mwv pukum akam bo maalo anyo bo dornyiam jinyi mabnyiloqkam, mwwg nyic nyigo gab mwv ipa wyw hoqgv aljaqn bo wtw xunam loq ipa akwb nyic aky gab bwatayin. Mwv hoqho kutiam la sungam kutiam toolwqram, hoggab hoqhv nyic akiv.

¹²‍Hoo mwv ham nyubam bwa jitayin, hoo nyubv hoq hoqgv mwwgab dvb jibwqnam mam alaqho yumgub yumlayil yugw ho At Swg dvs-twws aky gob partayin; hoqhv nyic akiv.

¹³‍Ho mwv soq tulu soqgv nyic nyigam gab nyubv mwwgab nyic kwly gab pwr jitayin, hoo mwwg nyicam apaq jitayin. Hoo jingongam nyub gab dootayin, hoqhv dvnam akiv.”

¹⁴‍At Sw Mojesnvn agam goonv begamv,

¹⁵“Hiyv lajaqkam mwwjwngam la At Swg dvrwq pagoq tulungam nyiduml nyimab hvbmab nyip-nyilupl mvpia baloqkam, mwv mwwg nyimur kwlib sviya un-tar gvma boam At Swn boa jitayin, hoo dvrwq namlog sikil xicw jaqb, rup sikil hwdgob xitayin, hoqhv nyixiaqnam akiv.

¹⁶‍Mwv hoggv dvrwqbo pagoqho nyixiaqkunam mam mwv kwlib jidwb nyitayin hoo hoq aoho ang go vbw tvl nyubam jitayin. Hoo nyubv mwwgab nyic kwly gab pwram sviya lvgab nyixiaqnam akib jitayin, hoo mwwg nyicam apaq jitayin.

¹⁷“Hiyv gonjaqkam At Swg nyima bvk hvl gaml jinam tulu ham nyiduml nyimab hvbmab nyip-nyilupl hog ak cengmab nyicam nyik balo, ho mwwg nyixiaqngam mwv mwwdar baloqkam, mwwg nyixiaq nyijongam mwv bwqdwb nyitayin.

¹⁸‍Mwwg nyimur kwlib mwv sviya un-tar gvma bo yaap dorg nyubam boa jitayin, hvbmab nyiloqkam hoq hwdkalam go nyixiaq akib jitayin, hoo mwwg cengmab nyixiaql nyiknam gab nyic kwly gab pwr akiam nyubv mwwg gab jitayin, hoo mwwg nyicam apaq jitayin.

¹⁹‍Hoqhv nyixiaqnam akiv; mwv jvqtw jaqb At Swg agaho nyixiaq yuk banyi.”