Read Nyishi LIBITIKAS 6 Bible Online

LIBITIKAS 6 - Nyishi bible

LIBITIKAS 6

¹At Sw Mojesnvn agam goonv begamv,

²“Hiyv lajaqkam nyic nyil hoo At Swn ceekol mwwjwngam mvpial, mwwg door-doopwg svtinam mam ho saqtinam mam xaalyol, ho naalil dvco col, ho mwwg door-doopwngam nyijab-nyiyiql nyim nyiloqkam

³‍ho niinbongam kaapa tvl hoo hoqham vm mvvl, ho dingbum baloqkam—hoq mwlw ham nyiilungv hvb nyil nyic baloqkam—

⁴‍mwv nyic nyipa ku hvl mwwg nyixiaqkam mwwdar baloqkam hoggv mwv naalil dvconam ho hoggv nyijab-nyiyiql naaknum ho mwam svtinam ham ho niinboam kaapanam ham jikur kubalo

⁵‍ho hog pagoq gojaqkam mwv dingbum balo, mwv bupwb jikur taikun hoo hoq aoho ang go vbw tvl jitayin, hoo hwdlo aalam mwwg nyixiaqkam mwwdar yukun, hoqham hiyvg hoqgv naapwn mwv jikur taikun.

⁶‍Hoo mwwg nyimur kwlib mwv sviya pvtw hoqgv sviya un-tar gvma bo yaap dorg At Swn gab nyubam kwlib boa jitayin, hvbmab nyiloqkam hoq hwdkalam go nyixiaq akib jitayin.

⁷‍Hoo mwwg nyic kwly gab pwram nyubv At Sw agaho jitayin, hoo mwv pagoq golo jaqkam hog ak nyil nyixiaq kubalo ham mwam paqnyi jitayin.”

⁸‍At Sw Mojesnvn agam goonv begamv,

⁹“Aaron nvla mwwg ko tuup tulungam gaml jil beto, Soq si boyuqnam aky jinam pvvbv. Boyuqnam akiv ai yupwngam yugwg wm park imiqho ar namgub dootayin, hoo yugw hoqg wmv hoqho gudul dootayin.

¹⁰‍Hoo nyubv mwwg topum vjam la urag gv gab topum vjam mwwg gv ho kootwl mwv boyuqnam akiam wm muiyib guknam tulu ham yugwg bviywrho pvvtayin.

¹¹‍Ho mwwg kooknam vjam mwv pipaqtvl asaq vj kooly layil mui ham svmcw lvvgwg dvrwqbo nyook ho baqlin tayin.

¹²‍Yugw hoqg wmv hoqho gudul dootayin; hoqhv nywywngam miqram. Nyubv ham ar roxiam wsw nvvlwql partayin, hoo mwv boyuqnam akiam mwx-mvaql hoq aoho partayin hoo swrso pwr aky oxam hoqho partayin.

¹³‍Wm mam yugw ho luuxiam pordul dootayin; hoqhv nywywngam miqram.

¹⁴“Hoo soq si dvs aky jinam pvvbv. Aaron gv ko tuup tulungv ham At Swg agaho yugw lwkw ho pwr jitayin.

¹⁵‍Hoo mwv hoqg wtw hoqgv alaq yumgub dvs akiam la kutiam hoo hoqg sungam bo dvs akiam mwwgab dvb jibwqnam mam yugw ho partayin, hv At Swn sungam bo gob nyitayin.

¹⁶‍Hoo hoqg jingo ngam Aaron la mwwg ko tuup tulungv dvtayin. Hoqham opap kiilwq maab dvrwqbo nyook ho dvtayin. Bulv ham kvvrwq minsko tombu baagho dvtayin.

¹⁷‍Hoqham opap lvgab kobnu dvb nyiram. Ngo ham ngoqg dvs-twws aky gob bulam jipa kun. Hoqhv nyicnam akiv la nyixiaqnam aky dvrwqnam hvb mwlwngam dvrwq yaan bob nyidwn.

¹⁸‍At Swg dvs-twws aky hoqgv Aaron gv nyega ko nyiicwr-cwrxiv ham dvla dvb nyidwn, hoqhv nwrba xaqb pvvb gob nyil nulug hotam-hotam xaqb At Swg dvs akiam dvtayin. Hoggv xeq bulam idaqtayin hv dvrwq tayin.”

¹⁹‍At Sw Mojesnvn agam goonv begamv,

²⁰“Hwdlo mwam xuqlinl darxaq yukam, soq sib Aaron la mwwg ko tuup tulungv At Swn aky jitayin: lwxiam dvs aky jiknam albo wtw hoqgv sarg jitayin, aram sarpo go hoo sarpo kalam go ariyum mam jitayin.

²¹‍Hoqham kuty lvgab mviyol cvvkaqho kaqtayin. No ham hingky jaqb mviyo tvl dvs aky hvb anyo go cwwcw tayin hoo hoqham At Swn sungam bo akib jitayin.

²²‍Aaron gv ko tuup nyub tulug pengko hoqgv mwwg nyitungam nyisiq mvdwb xuqlinam akv ham At Swn nwrba gob aky jitayin. Hoqg hog mwlwngam bumpwb partayin.

²³‍Nyub akwg dvs aky jinam bumpwngam wm ho parpaq tayin. Hoqham dvdwb nyiram.”

²⁴‍At Sw Mojesnvn agam goonv begamv,

²⁵“Aaron nvla mwwg ko tuup tulungam begamv, Soq si nyic aky jinam pvvbv. Hogloq ho boyuqnam akiam patab ko nyook ho nyic akiam At Swg agaho patab dvb nyitayin; hoqhv mwlwngam dvrwq yaadwn.

²⁶‍Nyic gab aky jinbo nyub akv ham dvtayin. Hoqham dvrwqko nyookwg, kvvrwq minsko tombug baagho dvtayin.

²⁷‍Hoggv xeq hoq ham idaqbov dvrwq tayin, hoo hwdlo hoqg uiyv vjam xaayaq baloqkam, no hoqg dvrwqbo nyook hoqgv ui xaayaqnam ham hwrxaql niixaqto.

²⁸‍Hoo hoqg xwwnan deekam pwcwngam joodub tayin. Hvbmabde tama pwcw lvgab xwwn paloqkam ham wm xvwrl iss lvgab deexaq tayin.

²⁹‍Nyub tulug nyega vxiv hoqgv dvntayin; hoqhv mwlwngam dvrwq yaadwn.

³⁰‍Hvbmabde kvvrwq minsko tombu uraho nyic kwly gab pwram Dvrwqbo Dookho nyic aky ui baqanam ham dvmabv; hoqham wm lvgab parpaq tayin.