Read Nyishi LIBITIKAS 7 Bible Online

LIBITIKAS 7 - Nyishi bible

LIBITIKAS 7

¹“Soq si nyixiaqnam aky pvvbv. Hoqhv mwlwngam dvrwq yaadwn.

²‍Hogloq nyookho bulv boyuqnam akiam patab dvn hoqho bulv nyixiaqnam akiam patab tayin, hoo hoqg uiyam yugw taqg-taqsaqb pwqyaq tayin.

³‍Hoo hoqg ox mwlwngam, ami hoqg oxam, ho hara vdinam ox pulup boam aky jitayin,

⁴‍hoo kiicwr pwnyi lvgab gvvs hoqg ox tulu ham, hoo ringtaq lvgab mwv kiicwr tulungam peelin tayin.

⁵‍Nyubv hoq tulu ham yugw ho At Swg dvs akib partayin; hoqhv nyixiaqnam akiv.

⁶‍Nyub pengko hoqg nyega vxiv hoq vdinam dvtayin. Hoqham dvrwqbo nyook ho dvtayin. Hoqhv mwlwngam dvrwq yaadwn.

⁷‍Nyixiaqnam aky hv nyic aky hvb nyidwn; hoq tulu gab pvvbv akin dvn. Hiyv nyubv hoq nyic kwly gab pwram jidwn hv ham dvtayin.

⁸‍Hoo hiyv nyubv nyi akwg boyuqnam akiam jidwn mwv hoqg boyuqnam aky jinam hoqg vpinam mwv atv naatayin.

⁹‍Hoo hiyvg nyubv wtw cwwcwnam mam la loora ho wtw kabnam mam dvs aky jidwn, hoqham jinbo nyub gab dootayin.

¹⁰‍Hoo dvs aky pwtw dvb la kuty mviyonam mam Aaron gv ko tuup tulug pengko ho homyin lvkinb horpin-hora tayin.

¹¹“Hoo soq si swrso gab pwr aky At Swn jinbo akgab pvvbv.

¹²‍Mwv paqyalinco aky jibnyiloqkam, mwv opap kiilwq maanam kuty mviyonam wtwngam, ho kuty lvgab kabnam loq hoo albo wtwngam cwwcwnam ham paqyalinco pwr aky gob jitayin.

¹³‍Mwwg swrso pwr aky paqyalinco jinam lvgab mwv opap kiilwq tvl cwwcwnam wtwngam mwv aky jitaq tayin.

¹⁴‍Hoo hoq hoqgv mwv aky jicw-jitam At Swn lvqc citayin. Hoqhv nyub hiyv swrso aky uiyam yugw ho pwqkarbo gab hoq wtw hv dootayin.

¹⁵‍Hoo mwwg paqyalinco paql swrso aky jinam vdin ham hoq aal darangam dvtayin. Mwv hog akkam hoqham ar namgub doom dvb nyiram.

¹⁶‍Hvbmabde mwwg aky jinam hv dingrnam aky maalo mwwlwql aky jinam goloqkam, ham hoq aalam mwwg aky jinam ham dvtayin, hoo dvngongam aal loogwn dvtayin.

¹⁷‍Hvbmabde pwr jinam vdinv aal loum namgub dook boam wm lvgab parpaq tayin.

¹⁸‍Swrso gab pwr jinam vdinam loum aalam dvk baloqkam, hiyv ham jinboam loorwqram, ho ham xikamram. Hoqhv kac kunbov, hoo hiyv ham dvtayin mwwg dvjongam baqdwb nyitayin.

¹⁹“Kacboam vdin mvdaqnam mam dvmabv. Ham wm lvgab parpaq tayin. Ho dvrwqbo vdin mwlw ham dvla tayin,

²⁰‍hvbmabde hiyv nyiv At Swg swrso aky pwram dvrwq maatwl mwv dvbnyiloqkam, hoq nyi akam mwwg nyiilu lvgab xitaq kuram.

²¹‍Hoo hiyv lajaqkam dvrwq maanbo dupum-dvrab pam, hoqhv nyi hoqgv dvrwq maab ho svdin hoqgv dvrwq maab lengboam, ho dvrwq maanbo svdin gotwq boolo idaq peel hoo At Swg swrso aky pwram dvbnyiloqkam, hoq nyi akam mwwg nyiilu lvgab xitaq kuram.”

²²‍At Sw Mojesnvn agam goonv begamv,

²³“Israel nyiilungam agam goog dvl beto, nulv svv hvvbwg ho maalo sviya ho maalo sibinwg ox dvmabv.

²⁴‍Atv sinbo svding oxam hoo dwr-pee cexnam oxam asaqho bon nyila nvtayin, hvbmabde nulv hoggub nyijaqkam ham dvmabv.

²⁵‍Hoggab hiyv At Swn dvs aky jinam svding oxam dvnbo nyiicwr-cwrxiam mwwg nyiilu lvgab xitaq kuram.

²⁶‍Hoq aoho, nulv hoglo doogw jaqkam nulv pvta uiyam ho svdin uiyam hoggub nyijaqkam uiyam dvdwb nyiram,

²⁷‍Hiyv lajaqkam ui gotwq boolo dvn boam, mwwg nyiilu lvgab xitaq kuram.”

²⁸‍At Sw Mojesnvn agam goonv begamv,

²⁹“Israel nyiilungam agam goog dvl beto, hiyv lajaqkam mwwg swrso pwr akiam At Swn jidy bov mwwg swrso pwr akiam At Swn mwwg swrso pwr aky hoqgv bwa jitayin.

³⁰‍Mwwg atwg alaqkv At Swg dvs-twws akiam jitayin. Mwv ox lvgab copium mam bwa tayin, copium mam torlinam aky gob At Sw agaho jitayin.

³¹‍Nyubv oxam yugw ho partayin, hvbmabde copiumv Aaron la mwwg ko tuup tulu gab dootayin.

³²‍Hoo nulug swrso pwr aky jinamg xvrbwq axaram nyubam bulw jitayin.

³³‍Hiyv lajaqkam Aaron gv ko tuup tulu hoqgv swrso pwr aky uiyam la oxam jinbo gab xvrbwq axaram bulw jitayin.

³⁴‍Hoggab ngo Israelwg nyiilu hoqgv bulug swrso pwr aky jinam hoqgv copium mam torlinam aky gob hoo xvrbwq axaram bulw gob naapa kun, hoo hoq tulu ham nyub Aaron nvla mwwg ko tuup tulungam pvvb bekajaqb Israelwg nyiilu hoqgv jipa kun.

³⁵‍Soq si At Swg dvs-twws aky hoqgv Aaron nvla mwwg ko tuup tulungam bulwb jiknamv, bulv At Sw gab nyubwb swwrab duk aal hoqgv.

³⁶‍Israel nyiilungam nyim dvb At Sw soq sam bul gab gaml jipa kun, hwdlo aalho mwv bulam xuqknum. Soq sam bulug hotam-hotam namgub pvvb nyil dootayin.”

³⁷‍Soq si boyuqnam akig, dvs akig, nyic akig, nyixiaqnam akig, darxaqnam akig, hoo swrso aky pvvbv,

³⁸‍hoqham At Sw Mojesnvn Sinai puutuho gaml jiknum, hwdlo mwv Israel nyiilungam bulug akiam At Swn Sinai deexa-raraho jim dvb gaml jiyik aalho pvvbam jiknum.