Read Nyishi LIBITIKAS 8 Bible Online

LIBITIKAS 8 - Nyishi bible

LIBITIKAS 8

¹At Sw Mojesnvn agam goonv begamv,

²“Aaron nvla mwwg ko tuup tulungam, hoo vj tulungam la neenan kutiam hoo svv hvvb loq dorg nyic akiam gab hoo yaap tvmwr dornyi go hoo opap kiilwq maanam wtw loq huc cig naato.

³‍Hoo kvvrwq minsko tombug haagaho dvpar mwlwngam goqkum to.”

⁴‍Hoo Mojes At Swg mwam gaml bekjaqb nyinum, hoo kvvrwq minsko tombug haagaho dvpar mwlwngam goqkumnum.

⁵‍Hoo Mojes mwlw dvparam benum, “Soq pagoq tulu sam At Sw nyim dukub gaml jipa kun.”

⁶‍Hoo Mojes Aaron nvla mwwg ko tuup tulungam iss lvgab hwrxaqtvl boanum.

⁷‍Hoo mwv lvlwqkam mwam koomnum hoo mwam kamtam koomnum hoo mwwg hwwpo ho pusam hiqlwqnum hoo lolupam mwam tulwq jinum hoo hingky jaqb cumnam lolupam mwam koom tvl hoo ham hiqcub jinum.

⁸‍Hoo mwv haabog kuiyam mwam gvmnum, hoo haabog kuiho Urim mam la Tummim mam vlwq jinum.

⁹‍Hoo At Sw Mojesnvn gaml bekjaqb, mwv mwwg dumpo ho bopyangam tulwqnum, hoo bopyag niqtuqho hun pataq ak ywr dumtup gob tinglwqnum.

¹⁰‍Ho Mojes neexaqnan kutiam naalayil xumk pirram la hoq hog mwlwngam neexaqnum, hoo bulam garxaqnum.

¹¹‍Hoo mwv hoqg tuugin yugw ho kvn go pwqyaqnum, hoo yugwngam hoo hoqho dupum-dvrab doon boam hoo hoqg hwrxaqko pagam mam hoo hoqg dvqgwnam neexaql hoq tulu ham garxaqnum.

¹²‍Hoo mwv kuty tuugin Aaron gv dumpo ho tooiyaql hoo mwam garxaqnum.

¹³‍Hoo Mojesnvn At Swg gaml bekjaqb Mojes Aaron gv ko tuup tulungam boalayil bulam lvlwq vjam koomnum hoo bulug hwwpo ho pusam hiqlwqnum hoo bulam bopyangam gvmnum.

¹⁴‍Ho mwv nyic gab hvvbam boanum, hoo Aaron nvla mwwg ko tuup tulungam bulam nyic aky jinam hvvb dumpo ho bulug alaqkam idaq mvnum.

¹⁵‍Hoo mwv ham patabnum, hoo Mojes uiyam naanum, hoo mwwg lvqcw lvgab uiyam yugwg vrrw tuluho tiyaqnum hoo yugwngam garxaqnum hoo uiyam tuugin yugw lwkwho tooptvl hoo ham nyic kwly gab pwr jil garxaqnum.

¹⁶‍Hoo mwv hara hoqg doonbo ox mwlwngam hoo ringtaq lvgab vsinam hoo kiicwr pwnyig lvgab naalayil Mojes hoq tulu ham yugw ho wm parnum.

¹⁷‍Hvbmabde At Swg Mojesnvn gaml bekjaqb, hvvbam la hoq vpinam hoo hoqg vdinam hoo hoqg eengam mwv svmcwg lvvgho wm lvgab parnum.

¹⁸‍Ho mwv boyuqnam aky yaapam boanum hoo Aaron la mwwg ko tuup tulungam bulug alaqkam yaap dumpo ho idaq mvnum.

¹⁹‍Hoo mwv ham patabnum, hoo Mojes yugw taqg-taqsaqb uiyam hwryaqnum.

²⁰‍Mwv yaapam twqmwqnum, hoo Mojes dumpongam hoo twqmwqnam mam hoo oxam wm parnum.

²¹‍At Sw Mojesnvn gaml bekjaqb, mwv hara vdinam la lvpiangam iss lvgab hwrxaqnum, hoo Mojes yugw ho yaap dorpwngam wm parnum. Hoqhv boyuqnam akiv hoo hv At Swn dvn aky sungam bo gob nyinum.

²²‍Ho mwv asaq yaap dorg boanum, hv darxaqnan yaapv, hoo Aaron nvla mwwg ko tuup tulungam bulug alaqkam yaap dumpo ho idaq mvnum.

²³‍Hoo mwv ham patabnum, hoo Mojes uiyam tuugin naanum hoo ham Aaron gv ruubwq ruutuqho hoo lvqbwq alaqg laqnho hoo lwbwq lvpiag lvnho tiyaqnum.

²⁴‍Ho mwv Aaron gv ko tuup tulungam boanum hoo Mojes bulug ruubwq ruutuqho hoo lvqbwq alaqg laqnho hoo lwbwq lvpiag lvnho tiyaqnum. Hoo Mojes yugw taqg-taqsaqb uiyam hwryaqnum.

²⁵‍Ho mwv gv dorpwg oxam hoo vxy-aiyeqkam pulup bo oxam hoo vsinam hoo kiicwr pwnyi ox lvgab hoo xvrbwq axaram naanum,

²⁶‍hoo At Swg agaho doonbo opap kiilwq maanam wtw huc hoqgv mwv opap kiilwq maanam wtw cwwcwnam loq pwg hoo kuty lvgab wtw cwwcwnam loq pwg hoo kabnam loq pwg hoq tulu ham ox gvla xvrbwq axar aoho tvpnum.

²⁷‍Hoo mwv hoq mwlw ham Aaron la mwwg ko tuup tulug alaqho gvqlwqtvl hoq tulu ham torlin mvnum hoo At Swg agaho torlinam aky gob jinum.

²⁸‍Ho Mojes hoq tulu ham bulug alaq hoqgv naala yukul yugw ho boyuqnam aky gob parnum. Hoqhv darxaqnam akiv, hv At Swn dvnam aky sungam bo gob nyinum.

²⁹‍Hoo Mojes hoqgv copium mam torlinam aky gob At Swg agaho naanum. At Swg Mojesnvn gaml bekjaqb Mojes hoqg yaap hoqgv darxaqnan bulwngam naaknum.

³⁰‍Ho Mojes yugw ho doonbo neexaqnan kuty tuugin la uiyam naanum hoo ham Aaron nvla mwwg vjho, hoo mwwg ko tuup tulungam vjamkam pwqyaqnum. Ho mwv Aaron la mwwg vjam, hoo mwwg ko tuup tulug vjam mwwg lvgab garxaqnum.

³¹‍Hoo Mojes Aaron nvla mwwg ko tuup tulungam benum, “Kvvrwq minsko tombu haagaho vdinam xwwnu tvl hoo darxaqnam aky wtw huc hoqgv naagdvl hoqho dvto, hoo begamv, ngoqg gaml bekjaqb, ‘Aaron la mwwg ko tuupv hoq tulu ham hoqho dvtayin.’

³²‍Hoo hoggv vdin hoo wtw dvngongv dootayin ham nulv wm lvgab partayin.

³³‍Hoo nulam darxaqnam moodv aal kvn gob naadwb nyitayin, hoqgab hwdlo nulam darxaqnam aalv wiyum maady deedib, nulv kvvrwq minsko tombug haaga hoqgv aal kvn gob lvvgwb lengmabv.

³⁴‍Soolo nyinam hvb, At Sw nulgab nyic kwly gab pwram jim dvb gaml jipa ku.

³⁵‍Kvvrwq minsko tombu haagaho aal-aiyib nulv aal kvn go At Sw nulam nyim dvb jinam ham nyil dootayin, ho nulv siram, hoggab soq sam ngam gaml jipa ku.”

³⁶‍Hoo At Sw Mojesnvn gaml bekjaqb Aaron la mwwg ko tuup tulungv hog mwlwngam nyil dooknum.