Read Nyishi LIBITIKAS 9 Bible Online

LIBITIKAS 9 - Nyishi bible

LIBITIKAS 9

¹Aal piin deenho Mojes Aaron nvla mwwg ko tuup tulungam la Israelwg axa tulungam goqnum,

²‍hoo mwv Aaronnvn benum, “Noqgab no atv svv hvvb ko loq dorg nyic aky gab hoo yaap loq dorg boyuqnam aky gab un-tar gvma boam naato, hoo hoq tulu ham At Swg agaho aky jito.

³‍Hoo Israel nyiilungam beto, ‘Sibin bimp loq dorg nyic aky gab, hoo vnyw nywg bo svv ko loq dorg hoo sviya ko loq dorg un-tar gvma boam boyuqnam aky gab naato,

⁴‍hoo svv hvvb loq dorg hoo yaap loq dorg swrso aky gab At Swg agaho pwr jidwb, hoo kuty mviyonam dvs akiam naato, hoggab soolo At Sw nulam daqlinl kaakin tayin.’”

⁵‍Hoo Mojes hoggv gaml jiknum ham bulv kvvrwq minsko tombu agaho bwanum, hoo dvpar mwlwngv ogumb hvvnwqnv At Swg agaho daqnum.

⁶‍Hoo Mojes benum, “Soq pagoq sam At Sw nulam nyim dukub gaml jinum, ho At Swg yuunamv nulam hwrlup kamyi nvpv.”

⁷‍Ho Mojes Aaronnvn benum, “Yugw ogumb hvvnwqto hoo noqg nyic akiam hoo noqg boyuqnam akiam hoo nyic kwly gab pwram noqgab la nyiilu gab jito, hoo nyi tulug akiam bwato hoo nyiilu nyic kwly gab pwram jito, At Sw gaml jipa kun.”

⁸‍Ho Aaron yugw ogumb hvvnwqnum hoo mwwg atgab mwv svv koam nyic aky gab patabnum.

⁹‍Hoo Aaron gv ko tuup tuluhv mwam uiyam bwa jinum, hoo mwv mwwg lvqcwngam uiho xwqbamnum hoo yugwg vrr tuluho pvvnum hoo yugwg lwkwho uiyam toopnum.

¹⁰‍Hvbmabde At Sw Mojesnvn gaml bekjaqb nyic aky hoqg oxam la kiicwr pwnyiam hoo vsinam mwv yugw ho wm parnum.

¹¹‍Vdinam la vpinam mwv svmcwg lvvgho wm lvgab parpaqnum.

¹²‍Ho mwv boyuqnam akiam patabnum, hoo Aaron gv ko tuup tulungv mwam uiyam gvqlwq jinum, hoo mwv yugw taqg-taqsaqb hwryaqnum.

¹³‍Hoo bulv mwam boyuqnam akiam cig-cigab, hoo dumpongam kam gvqlwqnum, hoo mwv hoq tulu ham yugw ho parnum.

¹⁴‍Hoo mwv hara vdinam la lvpiangam hwrxaqnum hoo hoq tulu ham boyuqnam aky gab yugw ho parnum.

¹⁵‍Ho mwv nyiilug akiam jinum hoo nyiilug nyic gab sibin akiam naanum hoo ham patabnum hoo ham otuq ak hoqg nyic aky gab aky jinam hvb jinum.

¹⁶‍Hoo mwv boyuqnam akiam pvvb bepko jaqb jinum.

¹⁷‍Hoo mwv dvs akiam jinum, hoqgv ar roxiam boyuqnam aky parnam lvgab mwwg alaqho dvs yumgub naalayil ham yugw ho parnum.

¹⁸‍Ho mwv svv hvvbam la yaapam swrso pwr aky gab nyiilu gab patabnum. Hoo Aaron gv ko tuup tuluhv mwam uiyam gvqlwq jinum, hoo mwv ham yugw taqg-taqsaqb hwryaqnum.

¹⁹‍Hvbmabde svv hvvbwg la yaapwg oxam, gv dorpwg oxam hoo vxy-aiyeq aoho pulup bo oxam hoo kiicwr pwnyiam la vsinam—

²⁰‍bulv ox twqmwqnam ham oc aoho pvvnum, hoo ox twqmwqnam ham yugw ho parnum,

²¹‍hvbmabde Mojes gaml bekjaqb copium mam la xvrbwq axaram torlinam akib At Swg agaho aky jinum.

²²‍Ho Aaron mwwg alaqkam nyiilug daiyab irabnv bulam lvqcnum, hoo mwv nyic akiam la boyuqnam akiam hoo swrso aky tulungam jinya peekul ipoq kunum.

²³‍Hoo Mojes la Aaron kvvrwq minsko tombub urab haaknum, hoo hwdlo bulv lvvgwb lengyikho nyiilungam lvqcnum, hoo At Swg yuunamv nyiilu mwlwngam kaakinum.

²⁴‍Hoo At Sw agaho hoqgv wmv bioqlin banv boyuqnam akiam la ox twqmwqnam tulu ham dvmeqnum, hoo hwdlo ham nyiilu mwlwngv kaapa yin, bulv sogoqnv hoo bulug nyuqm mam kedho nywtinum.