Read Nyishi JERIMIYA 1 Bible Online

JERIMIYA 1 - Nyishi bible

JERIMIYA 1

¹Benjamin gvdag Anatot ho nyub akwg, Hilkiyag ko tuup Jerimiyag gomcwrv,

²‍hiyam At Swg agamv Amonwg ko tuup Josiyag, Judaho vnyw camleq nywum gob mwwg lvpw atwb swwl dooi yikho haanum.

³‍Josiyag ko tuup Jehoiakim Judag lvpw atwb swwi yik hookam, hoo Josiyag ko tuup Jedekiya Judag lvpw atwb vnyw camleq nywkin go swwiyum yukho, ho hwdlo Jerusalem mam pool barg otuqb nyumwb booma daab haanum.

⁴‍Sija ngam At Swg gomcwrv haal begamv,

⁵“Mamb ho nam ngo ywrab maatab ngo nam cengnum, hoo nam dwrbuqma daab ngo nam darxaqnum; ngo nam nyob asaqg nyi tulu gab nyiqry betambo gob xuqlinum.”

⁶‍Ho ngo benum, “Oa, Pwnbo At Sw! Kaato, hoggub gootan ham ngo cengma, hoggab ngo ko anyo xiqdo.”

⁷‍Hvbmabde At Sw ngam benum, “Ngo ko anyo ngwtwq, hvl ‘bema bv’; hoggab hogloq bvxeq, ngo nam kanam tayin, no hoq mwlwho wdwb nyitayin, hoo ngo hoggv xeq nam gaml jitayin, ham no goodwb nyitayin.

⁸Bulam bos maabv, hoggab noqg lvgab ngo doobal nam naalin tayin, At Sw bibwqdo.”

⁹‍Ho At Sw mwwg alaqkv laqrab banv hoo ngoqg agam mam idaqnum. Hoo At Sw ngam benum, “Kaato, noqg agam ho ngoqg gomcwr tulungam ngo vlwq pakun.

¹⁰Kaato, soq aal soqgv ngo nam nyob asaq nyi tulu gvla lvpw-haty mwlwg aoho, busuql pulin mvd bvla mwtwrxam dvb, mucu-mviya mvd bvla mviya mvdwb, pwm dvb la liim dvb jipa kun.”

¹¹‍Hoo At Swg gomcwrv ngam haal, begamv, “Jerimiya, hoggv no kaapa do?” Hoo ngo benum, “Ngo almonwg haqb haqg kaapa do.”

¹²‍Ho At Sw ngam benum, “No kvvjwq pa, hoggab hoqho ngoqg gomcwram bon nyim dvb ngo rvky kidu dvn.”

¹³‍At Swg gomcwrv ngam lwnyi dvb haal, begamv, “No hoggv kaapa do?” Hoo ngo benum, “Nyoodum daiyab pwrtwl, pwcw xudu bo ak, ngo kaapa do.”

¹⁴‍Ho At Sw ngam benum, “Nyoodum daiya hoqgv gvda soq doonbo mwlwngam ciqcaq-bviyaqkam haam dvb toosuq tayin.

¹⁵‍Hoggab kaato, ngo nyoodum daiyag lvpw nyi mwlwngam goqdu dvn, At Sw bibwqdo, hoo bulv haatayin, hoo nyiicwr-cwrxiv mwwg pwqlw dootam mam Jerusalem haagag toggoqho mvl ap tayin, hoqhv bvly mwlwngam hoo Judag bopam mwlwngam ceeko tayin.

¹⁶‍Hoo bulug almab nyil ngam haqpaq ko-gab, ngoqg bulam ceekol pw-hwwnam mam bibwq tayin. Bulv asaq pwnboam aky jidu do hoo bulug atwg alaqho mvnam tulungam xumnum.

¹⁷‍Hvbmabde no, atv bonam nyitab vj kooto; daqrabto, hoo ngo nam gaml jinam hog mwlwngam bulam betam to. Bulug agaho hang homabv, hvbmab nyiloqkam bulug agaho nam ngo hang hom tayin.

¹⁸‍Hoo ngo su, kaato, soolo aal so ngo gurum nwqtumnam bopam ak mvtayin, dvvcw swwrw diil, hoo tama bvliam nwql, gvda mwlwngam, Judag lvpw at tulungam, hoqg saab tulungam, hoqg nyub tulungam, hoo hoq nyook hoq nyiilungam ceeko tayin.

¹⁹‍Bulv nam ceekol mwrwqtayin, hvbmabde bulv nam mviya nyoram, hoggab ngo noqg lvgab doodwn, At Sw bibwqdo, nam ywwlin tayin.”