Read Nyishi JERIMIYA 10 Bible Online

JERIMIYA 10 - Nyishi bible

JERIMIYA 10

¹Israelwg nombunga, nulv At Sw gomcwr goonam mam tato.

²‍Soq sib At Sw bedo: “Nyob tulug nyinam wnam mam nyimin gvmabv, ho doa tolo kaacin dvb mux mvnam mam hang homabv hoggab nyob tulungv hoq tulu ham hang hopa ku,

³hoggab nyiilug nyicw-wcwngv niqtuq dookma. Nyorog hoqgv svvn nwwg patabnum hoo jem mvlaqbo alaqkv vx lvgab bonam nyinum.

⁴Bulv rupam la hunam hoqham oj gvm dvn; bulv hoqham dumpum lvgab silongam taqtin dvn, hoqgab hoqhv biimanum.

⁵Bulug murty tulungv tinnin rongo lo apa taca daqnam hvb daqdwn, hoo bulv gooma dvn; bulam joodwb nyidwn, hoggab bulv wma dvn. Bulam vcwr gokam bos maabv, hoggab bulv almanam nyinyi ram, ho bulv alboam kam nyinyi ram.”

⁶At Swa, noq hvb nyinbo akjijaqkam dooma; no koi looda dvn, hoo noqg eminv atorl koi looda dvn.

⁷Nyob tulug Lvpw ata, nam hiyv bos maanbo doodwn? Hoggab soq si noqg gwj; nyob tulug pengko ho mwlwngam mwwlaq yaanbo ak hv hoo bulug lvpw-haty mwlw so noqg hvb nyinbo akjijaqkam dooma dvn.

⁸Bulv mwwlaq maab la dama bov; murty tulungv tomswr si niqtuq dooma svvda ngwtwq!

⁹Yip pwnam rupam Tarsis hoqgv, hoo hunam Upaj hoqgv baqadvn. Hoq tuluhv nyi tulug jem mvnamv hoo hun yip pwnbog alaq hoqg pwnamv; bulug vjam koonamv yamo-yalol hoo yvlw-yaka dvn; hoq mwlw si pwbwb jem mvlaqbog nyi tulug mvnamv.

¹⁰Hvbmabde At Sw jvqtw Pwnbov; mwv swwl doonbo Pwnbov hoo kuiyum xaqb Lvpw atv. Mwwg hang lengtwr yikam swcwngv hwqdin dvn, hoo nyob tulungv mwwg kaaxaqnam mam cwqnyi maadwn.

¹¹‍Soq sib no bulam beto: “Hiyv doa aongam la swcw sam pwma bo pwnbo tulungv swcw nvg ao soqgv hoo nyodo nvg niikum soqgv nyiitayin.”

¹²Hoqhv mwv su mwwg ator hoqgv swcw sam mvnum, mwwg pumb-ywrnam hoqgv gvda gvtam pwnum, hoo mwwg cenglaq hoqgv doa aongam ywwjin mvnum.

¹³Hwdlo mwwg yalam mwv dulin mvikam, doa ao tolo issiv ody dvn, hoo swcw nvg ywwtwr hoqgv mwv gumsam aob juuca mvdwn. Mwv taiyam mam nyodo gab bioqm dvn, hoo mwwg noosu hoqgv dooiyam lvvgwb yilin mvdwn.

¹⁴Nyi vxiv dama bvla cenglaq maadwn; hun yip pwnbo vxiam mwwg murty tulu gab hvnyw moolw mvdwn, hoggab mwwg guss tulu si xaalyo bov, hoo bulug uraho saqnam dooma do.

¹⁵Bulv kor ximanamv, mwwsam-mwwiyaml bon nyinamv; bulam laqm-baqm de moodam bulv nyiitayin.

¹⁶Hvbmabde Jakub gab doonbo mwv soq tulu sib nyima dvn, hoggab mwv su hog luucw-luutam ywrn bov, hoo Israelv mwwg otu jisiqnam nyob hoolungv; mwwg eminv nyiit At Sw.

¹⁷Noqg agaqnam mam deela hoqgv nookum to, nootunam nyuum tulunga!

¹⁸Hoggab soq sib At Sw bedo: “Kaato, soq mood so ngo gvda soq doon boam lvvgwb hurpaq poqdu dvn, hoo ngo bulug aoho hentwr-kaasam haam tayin, ho bulv ham hempa tayin.”

¹⁹Ngoqg mwwr ko-gab ngam mwwdwq mvto! Ngoqg unv ut jaqpa. Hvbmabde ngo benum, “Jvqtw jaqb soq si hentwr henamv, hoo ngo sam cwqky tayin.”

²⁰Ngoqg tombungam mvpia paku, hoo ngoqg axia mwlwngv bvriq paku; ngoqg ko huriv ngoqg soqgv wn kuba, hoo bulv dookma; ngoqg tombungam lokta tabor dvb, hoo ngoqg viyap pam mvdarbo nyi akkam dookma.

²¹Hoggab sviya rvky bo tulungv dama pa hoo At Swn toxol taka kama; hoqgab bulv swwma-geema do, hoo bulug sviyangv cwrsaq-bvraqdo.

²²Yal ak, bisiq-bemeqnam ak! Kaato, hoqhv haado!— nyoodum daiya nyook toloqkv koi jaqb hur-marab gob dunv Judag bopam tulungam mwwdwq dvb la svca tulug dookum kob mvgdo.

²³Ngo cengdo, At Swa, nyia kog lamtangv mwwg atwg lvgab dooma dvn, ho nyia kog dwql wnamv mwwg atwg mwwlwqb nyima dvn.

²⁴Mvdar tvb, At Swa, hvbmabde lootw hoqgv; noqg haaxaq yin ma, hvb nyibaloqkam no ngam niqtuq dooma dvb mvta do.

²⁵Noqg haaxaqnam mam noqg cengmanam nyob tulungam, hoo noqg eminam goqma bo nyiilug aoho toolwqto, hoggab bulv Jakubnvn muiyu-mvca paku; bulv mwam muiyu-mvcal hoo mwam dvmeq paku, hoo mwwg doogw koam dooxa-xaaram dvb mvpa ku.