Read Nyishi JERIMIYA 11 Bible Online

JERIMIYA 11 - Nyishi bible

JERIMIYA 11

¹At Sw hoqgv Jerimiyanvn gomcwrv haanum:

²“Soq birnam pvvb gomcwr sam tato, hoo Juda gvla Jerusalemho doon bo nyi tulungam gooto.

³‍No bulam betayin, soq sib Israelwg Pwnbo, At Sw bedo: Soq birnam pvvb gomcwr sam tama bo nyiingv beenam jaqkv

⁴‍ho ngo nulug ab tulungam gaml jinum hwdlo ngo bulam Ijipt gvdaho dvvcw bvvwr tvl laqm-baqnam hoqgv boolin yukho, hvl benamv doodwn, ngoqg yalam tato, hoo ngo nulam gaml jinam mwlwngam nyito. Ho nulv ngoqg nyiilu gob nyitayin, hoo ngo nulug Pwnbo gob nyitayin,

⁵‍ho nulug ab tulungam ngoqg pvvbam dingrwl jinam pagoqkam ngo pwbw jaqb cengtayin, soq aal soqg nyinam hvb, bulam wtw lywminko hoo ngola biqminko gvdangam jidwb birnum.” Ho ngo birwqnum, “At Swa, hoq hvbjaq nyimto.”

⁶‍Hoo At Sw ngam benum, “Soq gomcwr tulu sam Judag bopam tulu hoola Jerusalemwg lyobu buuxy ho puiyam beto: Soq birnam pvvb sam tato hoo nyito.

⁷‍Hoggab hwdlo ngo nulug ab tulungam Ijipt gvda hoqgv boolinl lengyikho ngo bulam piwr jwr-jwr dvb beo-belamnum, bulam betin-betinl soq aal namgub kam beol bidu dvn, ngoqg yalam tvjw to.

⁸‍Hvbsujaqkam bulv tvjw ma ho bulv ruucw kwrgab ma, hvbmabde nyiicwr-cwrxiv mwwg alman hang hoqgv tamil wnum. Hoqgab ngo soq birnam pvvb gomcwr tulungam bul gab sam baqanum, ham ngo gaml jitwl bulam nyim dvn, hvbmabde bulv nyimanum.”

⁹‍Lokta At Sw ngam benum, “Hima bwwl nyidwb Juda gvla Jerusalemho doonbo nyi tulug pengko ho doodo.

¹⁰‍Bulv bulug ab apa tulug nyixiaqnam mam nyikurnum, ngoqg gomcwram tadwb haqpaqnum. Bulv asaq pwnbo tulungam bon nyij taab wpa ku. Ngo bulug ab tulu lvgab birwl pvvb mvnam mam Israelwg nombungv la Judag nombungv mvpia paku.

¹¹‍Hoqgab, soq sib At Sw bedo, kaato, ngo ciqcaq-bviyaqkam bulug aoho hoodu mvgdvn ham bulv keleq nyoram. Bulv ngam xabs jaqkam, ngo bulam tvmw tayin.

¹²‍Ho Judag bopam tulu ngvla Jerusalemho doonbo tulungv asaq pwnbo tulungam bulug pwr jidunam mam wlayil xabtayin, hvbmabde bulug vs-axaq hoqgv bulam ywwlin nyoram.

¹³‍Hoggab Judanga, noqg bopam tulungv hog hwdgo doodwn hwdkalam noqg pwnbov doodo, hoo Jerusalemho hog hwdgo lamtangv doodwn hwdkalam go no hvnyw dvb yugwngv mvp paku, Baalam pwr jik yugw tulungam rap paku.

¹⁴“Hoqgab soq nyiilu gab swgw maabv, ho bulug kwly gab sogoql xabkam maabv ho swgw kam maabv, hoggab bulug vs-axaq moodam bulv ngam xabs jaqkam ngo tvmw tayin.

¹⁵‍Mwn naleqgo almanam nyigam gab, ngoqg tumanamv ngoqg nombu lo hognvk atorv doodwn? Tuun-mee pwr jinamv noqg sig-dorgam jipy nyotayin yv? No hwnyir-hvmar tai nvi yv?

¹⁶‍At Sw nam lok ‘Swiywq nyam-nyaml kangam dvb la alwb aaxy xeenbo olib svvnv hvl goqnum.’ Hvbmabde doogum korlw lvgab mwv hoqham wm rwlwq tayin, hoo hoqg haqb tulungam guiyum tayin.

¹⁷‍Nyiit At Sw, nam liinum, ciqcaq-bviyaqkam nam ceeko mvdwb gaml jinum, hoggab Israelwg nombu ngvla Judag nombungv almanam nyipa ku, ngam nyiluql haaxaq mvdwb Baalam pwr jidul doodwn.”

¹⁸At Sw hoqham ngam ceng dvb jinum hoo ngo cengknum; ho no bulug bonam nyinam mam ngam kaakinum.

¹⁹Hvbmabde ngo patab dvb bool wgnam nyinyiaqbo sviya ko hvb nyinum. Bulv ngam ceekol almab nyita dvn hvl ngo hoqham cengmanum, “Kuj ngulv svvn lvgab hoq aaxiam twrm tuj, ho mwwg eminam lokam mwwpa mvma dvb, kuj ngulv swwl dook gvda soqgv mwam mvpaq tuj.”

²⁰Hvbmabde, nyiit At Swa, no jvqtw jaqb pw-hwwdwn, hiyv hvvjw-haara ngamla mwwnam mam pooka dvn, bulug aoho noqg kwly daqnam mam ngam kaapa mvtbv, hoggab ngoqg pagoqkam ngo nam gvqlwq tukun.

²¹‍Hoqgab soq sib At Sw Anatotwg nyi tulu gab mwwl bedo, hiyv noqg swwgam meegaq bov, hoo bedo, “At Swg eminho nyiqry bemabv, hvbmab nyiloqkam no ngulug alaq so sitayin” —

²²‍hoqgab soq sib nyiit At Sw bedo: “Kaato, ngo bulam laqm-baqm tayin. Tuudy-yaamiv lyoqr orioq lvgab sitayin, bulug nyem-nyega ko tulungv kanol sitayin,

²³‍hoo akjijaqkam bulv dookram. Hoggab ngo Anatotwg nyi tulug aoho ciqcaq-bviyaqkam haam tayin, hoqhv bulug laqm-baqnam vnyw gob nyitayin.”