Read Nyishi JERIMIYA 12 Bible Online

JERIMIYA 12 - Nyishi bible

JERIMIYA 12

¹Jvqtw bo no, At Swa, hwdlo ngo nam soryin; hvbsujaqkam ngoqg bvrwqkam ngo noqg agaho xuml bedwn. Hog gab nyic-nyia bog lamtangv swwd-geedwn? Hog gab xaalyo lyonbo mwlwngv swwl-geel niqtuq lengdwn?

²No bulam liidwn, hoo bulug rwbv guugab dvn; bulv swwl hoo aaxy xeedwn; no bulug agam ogumho doodwn hoo bulug hang hoqgv aado dvn.

³Hvbmabde no, At Swa, ngam cengdo; no ngam kaado, hoo ngoqg hangv noq daiyab doonam mam pooka do. Patab tanam sviyangam seelinam hvb bulam seelin to, hoo bulam patab dvb aal loog xuqpwl ap pakun.

⁴Hog hwdgo gvdangv nyix-riitayin hoo hog hwdgo gvdag nwmw-nwsinv sengtayin? Hoggab almanv hoqho doogam gab svdin tulu ngamla pvtangam yuupaq mvdo, hoggab bulv benum, “Mwv ngulug swwtar de aalam kaapa ram.”

⁵“No nyi tulu lvgab lvpiab xarka mins yikam, hoo bulv nam agar xarpa mvpa ku, hoggub no svpur tulu lvgab xarka mins tayin? Hoo cumciq gvdaho no mwwjw jwwtw dvnyiloqkam, Jordonwg tvgeqho hoggv no nyitayin?

⁶Hoggab noqg vbw-bor tulu ngvkam hoo noqg abwg nombungv, bulv noqg lvgab vc loodab xaalyo paku; bulv noqg kokwb vc loodab xabmin gvdo; bulv nam hoopu-haabial goos jaqkam, bulam mwwjw maabv.”

⁷“Ngoqg nombungam ngo haqpaq pakun; ngoqg otu nvvsiq deenam mam ngo apaq pakun; ngoqg tumanam swwgam mwnwg ceebio alaqho ngo jilwq pakun.

⁸Ngoqg otu nvvsiq tanamv nyorog sony nyot ak hvb nyipa ku; mwnwg yalv ngam ceekol sogoq goqrab paku; hoqgab ngo mwnwn oyum dvn.

⁹Ngoqg otu nvvsiq tanamv hainag doogw ung hvb nyid nvi yv? Mwnwn taqg-loosaqb pvta tulungv gooyuml ceekol mengta dvn yv? Wto, nyorog svdin mwlwngam hookum mvto; bulam duiyum mvdwb boolwqto.

¹⁰Sviya rvky bov vigo ngoqg roo boolungam twrm paku; bulv ngoqg naady sanam mam cooyu-caaca paku; ngoqg hempwl naady sanam mam bulv deexa-rara dooxa dvb mvpa ku.

¹¹Bulv hoqham dooxa-xaaram dvb mvpa ku, hoq dooxa-xaaramnamv, ngam nyix-riim do. Gvda mwlwngam dooxa-xaaram dvb mvpa ku, hvbmabde hoqham nyi akkam hangho pvvk ma.

¹²Diixa-raraho puutu aol talo bo tulungam twrn bov haapa ku, hoggab At Swg lyoqr orioqkv gvda taqgwn hoqgv taqgwnb mingyum dvn; gv aiyaqkv swrso kuma.

¹³Bulv wtw ammam liis paku hvbmabde taa-ngam vly naap paku; bulv nyelin-dors dvb nyis paku hvbmabde niqtuq nyijo dookma. At Swg vcjaqb haaxaqnam lvgab bulug vly naanamv bulam hvnyw moolw mvtayin.”

¹⁴‍Ngoqg Israelwg nyiilungam ngo otu nvvsiq mvdwb jinam mam almanbo ngoqg door-doopwngv otu ham ika deenam pagoqkam soq sib At Sw bedo: “Kaato, ngo bulam bulug gvda hoqgv bupaq tayin, hoo ngo Judag nombungam bulug pengko hoqgv bupaq tayin.

¹⁵‍Hoo ngo bulam bupaq kokwngam, ngo lokta bulam aya mwwpal hang biitayin, hoo ngo lokta bulam mwwg otu nvvsiq deekho vxiam mwwg gvdaho bookur tayin.

¹⁶‍Hoo hoqhv nyil wtayin, ngoqg emin lvgab dingl bulv ngoqg nyiilug lamtangam hingky jaqb cengb nyiloqkam, ‘At Sw swwl doonam gob,’ ngoqg nyiilungam bulv Baalwg lvgab dingr tvk hvl tomswr sujaqkam, ho ngoqg nyiilug pengko ho bulv pwrab tayin.

¹⁷‍Hvbmabde hiyv nyob gon jaqkam tama baloqkam, ho hoqham ngo twrkub bupaq tayin hoo hoqham twrm tayin, At Sw bibwqdo.”