Read Nyishi JERIMIYA 13 Bible Online

JERIMIYA 13 - Nyishi bible

JERIMIYA 13

¹Soq sib At Sw ngam bedo, “Wto hoo pus vj lo rumg rvto hoo ham noqg hwwpo ho hwwlwqto hoo ham iss lo swwbam maabv.”

²‍Hoqgab ngo pus vj rumg At Swg bekjaqb rvnum, hoo ham ngoqg hwwpo lo hwwlwqnum.

³‍Hoo At Swg gomcwrv ngam lwnyi dvb haanum,

⁴“No hogloq ham noqg hwwpo lo hwwlwq pan, hoq pus vj rvnam ham naato, hoo daqrabto, Iupratas wgdvl hoqham wlw lwwpwq alo kvsil apto.”

⁵‍Hoqgab At Swg ngam gaml jik jaqb ngo Iuprataswb wbnv ham kvsnum.

⁶‍Hoo aal oyu kokw so At Sw ngam benum, “Gorabto, Iuprataswb wgto, hoo ngo nam gaml jitwl kvsil apnam pus vjam hoqg apko hoqgv naata.”

⁷‍Kokw so ngo Iuprataswb wnum, ham dulinum, hoo ngo pus vjam hogloq ho kvsil apnum hoq pvvk hoqgv ham naanum. Hoo kaato, pus vjv bwiyin-bviyaqnum; hv hog akkam al kumanum.

⁸‍Ho At Swg gomcwrv ngam haanum:

⁹“Soq sib At Sw bedo: Hoq hvbkalam ngo Judag larnam mam la Jerusalemwg koijaqb larnam mam mucu-mviya tayin.

¹⁰‍Soq almanbo nyiilu si, hiyv ngoqg gomcwram tadwb haqpaq dvn, hiyv tamil bulug atwg hang mwwkwb wdwn, hoo asaq pwnbo tulungam bon nyijtab la xumtab wpa kun, hoq tuluhv soq pus vj sib nyitayin, hv hog akkam al kumanum.

¹¹‍Hoggab pus vjam nyi akwg hwwpo ho hiqgab dvn, hoq hvbkalam ngo Israelwg nombungam la Judag nombungam ngam bvvbwl doom dvb mvnum, At Sw bibwqdo, ho bulv ngoqg nyiilu akwb nyil ngoqg eminam paql hoo yuum dvb mvnum, hvbmabde bulv tamanum.

¹²“No bulam soq gomcwr sam bedwb nyitayin: ‘Soq sib Israelwg Pwnbo, At Sw bedo, “Pvtaq tvqx ho roo alangam bwwr mvtayin.”’ Hoo bulv nam betayin, ‘Pvtaq tvqx ho roo alangam bwwr mvtanam mam jvqtw jaqb ngulv cengma dvn yv?’

¹³‍Ho no bulam betayin, ‘Soq sib At Sw bedo: Kaato, ngo soq gvda so doonbo mwlwngam: Debidg pwqlw ho doonbo lvpw at tulungam, nyub tulungam, nyiqry benbo tulungam, hoo Jerusalemho doonbo mwlwngam twwxum dvb mvtayin.

¹⁴‍Hoo ab tulu ngvla ko tuup tulungv lvkin gob, akwn-akwn ceekol tumin sudwb ngo bulam mvtayin, At Sw bibwqdo. Ngo bulam twryum dvb, aya mwwpa ram ho danyib apaqram ho hang biikam ram.’”

¹⁵Tato hoo ruucw kwrgab to; larmabv, hoggab At Sw goopa ku.

¹⁶Nulug Pwnbo At Swn yuunam mam jito, mwv kanam baqa maatab, nulug lvpiangv kanbo puutuho dwqtup maatab, hoo hwdlo nulv huto gab kaagaqyin mwv ham kaiya dvb mukub dvn hoo ham kan twdwq dvb mvdwn.

¹⁷Hvbmabde nulv tama baloqkam, ngoqg yvjv nulug largam gab xvbstayin; ngoqg vnyiqkv vcjaqb nyiqs dil xabtayin, hoggab At Swg sviya pvtwngam nyumwb leep paku.

¹⁸Lvpw atam la vi-koory annam beto; “Nyi nyiisam dookho dooto, hoggab nulug kangam bo ywr dumtup pam nulug dumpo hoqgv naageq paku.”

¹⁹Negebg bopam tulungam ciqtum paku, hoq tulu ham akjijaqkam ciqko bo dook ma; Judag nyi mwlwngam nyumwb boopa ku, mwlwjaqkam nyumwb booyum boopa ku.

²⁰“Hiyv nyoodum hoqgv haan boam nulug vnyiqkv piorabl kaato. nulam jiknamv sviya pvtangv hoglo, nulug kangam bo sviya pvtwngv hoglo?

²¹Hiyam no atv noqg ajin tulu hvb mwwnam yaangv bulam noqg aoho swwg mvdwb mvpyin hoggv no betayin? Dvn ak cinc ciyikam vc cinam hvb nam mwwdwql sogoq goqnamv nootul doogram yv?

²²Hoo noqg hang uralo no hvl bebnyiloqkam, ‘Hoggub yu soq pagoq tulu si ngoqg aoso haadwn?’ soq si noqg koijaqb nyixiaq ko-gab noqg vjam liqbinum hoo no guunyi ho hentwrnum.

²³Itiopiya nyiingv mwwg gv tojam ho hogga takarv mwwg potaq-pomaqkam kwly nyiody nvi yv? Ho hiyv alman boam nyidwb cengnbov nulv kam albo bonam nyinyi tan.

²⁴Diixa-rarag dooiyv ampam nuul wgnam hvb ngo nulam cwrsaq-twqb mvtayin.

²⁵Soq si nam nvtaqnamv, ngo nam xibwql xilin jilin pakun, At Sw bibwqdo, hoggab no ngam mwwpa kuma hoo vm mvvnam mam mwwgwnum.

²⁶Ngo atv jaq noqg vjam noqg nyuqm namgub liqbin tayin, hoo noqg hvnywngam kaapa dvb nyitayin.

²⁷Ngo noqg bulum dvb nyinam mam, noqg bwwxinam mam hoo yocu-yabio nyinwnam mam, yorn yorxig haapa ho noqg kac loodab yocu-yabio nyinam mam kaapa paku. Jerusalema, no mwwdwqto! No hog hwdgo oyu tayin hoq hoqgv dvrwq dukub?”