Read Nyishi JERIMIYA 14 Bible Online

JERIMIYA 14 - Nyishi bible

JERIMIYA 14

¹Jwwxa xaatanam pagoq gab At Swg gomcwrv Jerimiyanvn haanum:

²“Judangv nyix-riido, hoo hoqg toggoq tulungv yuupaq do; hoqg nyiilungv deela ho nyix-riido, hoo Jerusalemwg xabnamv vcib xabrab do.

³Mwnwg xinam nyi tulungv bulug nyera tulungam iss gab kanam do; bulv sokum ho haado; bulv iss kaapa ma; bulug uppum mam asar dvb bulv bwwkur do; bulv hvnyw moolwl hoo mwwdar maado hoo bulug dumpongam putum do.

⁴Hoggab nyook gab mwwdwq do hoggab gvda aoso nyodo hook ma, rongo mvnbo tulungv hvnyw do; bulug dumpongam bulv putum do.

⁵Nwmw-nwsin dooma ko-gab sudumv mwnwg nitib ko bwwnam mam nyoro lo apaq do.

⁶Nyoro svdam tulungv talo bo puutu aoho daqdo; bulv siyal hvb dooi saqs doomab sitab do; bulug vnyiqkv kaapa kuma hoggab hoqho nwmw dookma.

⁷“Ngulug nyixiaqnam tulungv ngulam ceekol betam sujaqkam, At Swa, noqg emin gab, nyito; hoggab ngulv nyika peel apaq kunbov naleqdo; ngulv nam ceekol nyic nyipa ku.

⁸Oa no Israelwg svqgwnamv, vs-axaq moodam ywwlin bov, hog gab no gvda so nyoodo nyi hvb nyidwn, nyoyw wnbo akv aiyam yubk gab meegaqnam hvb nyidwn?

⁹Hoggub no mwwdar-saqpar maanbo nyi hvb nyidwn, ator jaqb nyob paky bo akv ywwlin sumanam hvb nyidwn? Hvbsujaqkam, no, At Swa, ngulug pengko si doodo, hoo ngulv noqg emin ho goqnamv; ngulam wleqmabv.”

¹⁰Soq sib At Sw soq nyiilug pagoqkam bedo: “Sija godab bulv gaqkarl yvdwb aby dvn; bulug lvpiangam bulv mutur maata; hoqgab At Sw bulam loorwqma; sija bulug nyixiaqkam mwv mwwgab tayin hoo bulug nyicam laqm-baqm tayin.”

¹¹‍At Sw ngam benum: “Soq nyiilu algab swgw maabv.

¹²‍Bulv dvmab vrr rws jaqkam, ngo bulug xabnam mam tapa ram, hoo bulv boyuqnam mam la cwrm-malo pwram jisjaqkam, ngo hoq tulu ham loorwq ram. Hvbmabde ngo bulam lyoqr orioq lvgab, dwr-kano lvgab, hoo topum-yorup lvgab dvmeq tayin.”

¹³‍Ho ngo benum: Oa, Pwnbo At Swa, kaato, nyiqry benbo tulungv bulam bedo, ‘Nulv lyoqr orioqkam, ho dwr-kanongam kaapa ram, hvbmabde ngo nulam dingr dvn soq nyook so swrsongam jitayin.’”

¹⁴‍Hoo At Sw ngam benum: “Nyiqry benbo tulungv ngoqg eminwb xaalyo nyiqriam koodu do. Ngo bulam kanam maanum, ho ngo bulam gaml jimanum ho goomanum. Bulv nulam xaalyo nyiqriam bidu do, ximanam nyiqriam bidu do, hoo bulug mwwlwq hoqgv vm mvvdo.

¹⁵‍Hoqgab soq sib At Sw hiyv mwwg emin gab nyiqry benbo tulug pagoq gab bedo ngo bulam kanam maasu, hvbmabde hiyv bedwn, ‘Lyoqr orioq kvla dwr-kanongv soq nyook aoho so haaram’: Lyoqr orioq kvla dwr-kanongv soq nyiqry benbo tulu sam dvmeq tayin.

¹⁶‍Hoo hiyam bulv nyiqry kaal betamnam nyiilungam Jerusalemwg lamta ho hurpaq tayin, dwr-kano ngvla lyoqr orioqg laqm mam baqtayin, bulug nywxw tulungam, bulug ko tuup tulungam, bulug nyem ko tulungam bulam akjijaqkam svma liinbo dookram. Hoggab ngo bulug almab nyiknam mam bulug aoho yoqpup tayin.

¹⁷“No bulam soq gomcwr sam bedwb nyitayin: ‘Kv ngoqg vnyiqkam aal-aiyib nyiqs tomin mvto, hoo nyiqsam tongngin mvmabv, hoggab ngoqg nyiilug nyem mvvam mam jwwnv vcjaqb un mvg paku, sitab dvb nwqtab paku.

¹⁸Ngo rongo urab wi nyiloqkam, kaato, lyoqr orioq nwqlwqnam tulungam kaapa do! Hoo ngo bopam urab haai nyiloqkam, kaato, dwr-kanog vc-aiyam kaapa do! Hoggab nyiqry benbov la nyubv bulug kwm-kor mvnam mam gvda si hog cengmab nyidu do.’”

¹⁹No Judangam haqpaq looda pak nvi yv? Noqg yvjv Jaiyonam oyum pak nvi yv? Hoggub no ngulam jwwtab pakun hoqgab ngulam mwpbo dookma? Ngulv swrsongam kaagaqnum, hvbmabde albo lengk ma; mwp kodwb mood naanam, hvbmabde kaato, vcjaqb bosnamv ya doodo.

²⁰At Swa, ngulug nyic-nyiangam, hoo ngulug ab tulug nyixiaqkam ngulv bekin dvn, hoggab ngulv nam ceekol nyic nyipa ku.

²¹Noqg emin gab, ngulam haqpaq maabv; noqg yuunam pwqlwngam xima dvb mvmabv; mwwgabto hoo ngulug lvgab noqg birnam mam mvpia maabv.

²²Nyob tulug xaalyo bo pwnbo tulug pengko hoqgv nyodongam hoa mvd nvi yv? Ho doangv nyodo hool mvd nvi yv? Ngulug Pwnbo At Swa, no maai yv? Ngulug svqgwngv noqg aoho doodwn, hoggab no soq pagoq mwlw sam nyidwn.