Read Nyishi JERIMIYA 15 Bible Online

JERIMIYA 15 - Nyishi bible

JERIMIYA 15

¹Ho At Sw ngam benum, “Mojes la Samuyel bunyiv ngoqg aga so daqsjaqkam, ngoqg hangv soq nyiilu daiyab pwrj ram. Bulam ngoqg kaaga soqgv wpaqto, hoo bulam wmto!

²‍Hoo hwdlo bulv ngam tox yin, ‘Ngulv hogloqb wtayin?’ No bulam betayin, ‘Soq sib At Sw bedo: “‘Topum-yorup gab doodwn, ham topum-yorup pam dvxa mvto, hoo hiyv lyoqr orioq gab doodwn, ham lyoqr orioqb wmto; hiyv dwr-kano gab doodwn, ham dwr-kano mvmto, hoo hiyv nyuum gab doodwn, ham nyumwb boomto.’

³‍Ngo bulug aoho vpy go twrn boam jilwq tayin, At Sw bibwqdo: lyoqr orioq lvgab mengm dvb, iky tulungam ceko mvdwb, hoo doa pvta tulungam pako mvdwb hoo swcw soqg svdin tulungv bulam dvmeql hoo twrm dvn.

⁴‍Hoo Judag lvpw at, Hejekiyag tuup Manasse, Jerusalemho hoggv nyinum, hoqgab ngo bulam swcw soqg lvpw-haty mwlwngv bulam bos kaapa dvb mvtayin.

⁵“Hiyv nulug aoho aya mwwpa tayin, Jerusalema, ho hiyv nulgab mwwdwq tayin? Hiyv noqg algab nywwkur tox tayin?

⁶No ngam haqpaq paku, At Sw bibwqdo; no langk yaab wkur kurdu do, hoqgab ngoqg alaqkv nam ceekol ngo laqlin banv hoo nam twryumnum- ngo nam ludumnam mam mwwdwqdo.

⁷Ngo bulam xabxaqnan opy lvgab gvdag toggoq tuluho xabxaq pakun; ngo bulam mwwdwq dvb mvpa kun; ngoqg nyiilungam ngo twrm pakun; bulug lamta tulu hoqgv bulv wkur maanum.

⁸Sa-svlog xuqxiam laabo yaab ngo bulug xwwmiam naleq dvb mvpa kun; ngo aal lvpangam ko anyo bo ann tulungam ceekol twrn boam boa pakun; hentwram la vc loodab bosnam mam ngo bulug aoho haqma paqb haam pakun.

⁹Hiyv kvngo ko bwwnbo akv laanyi kuma; mwn swnyiq-svnyiaql niipaq paku; aal lvpab nyidu yikho mwnwg doonyiv haaknum; mwn hvnyw moolw bvla mwwdwq dwqpa ku. Hoo bulug nyemaq tulug agaho ngo tuugin lyoqr orioq niqtuqb jilwq tayin, At Sw bibwqdo.”

¹⁰‍Ngam mwwdwq mvmto, ngoqg anna, no ngam ko bwwgam gab, gvda mwlw so vs-axaq bvla loomanam nyi ak gob nyidwn! Ngo ceekam maanum, ho ngo narkam maanum, hvbsujaqkam bul mwlwngv ngam beedo.

¹¹‍At Sw benum, “Bulug algab ngo nam tolin jima namyv? Vs-axaq moodam la hentwr moodam nyemaq agaho ngo noqgab mvnyi-moiyul bema namyv?

¹²‍Odum nyookwg dvvcw ngamla tamangam, hiyv akv twrtu nyodwn?

¹³“Noqg gumnam la noqg uddum mam, kor xima dvb, noqg nyook mwlwho, noqg hog mwlw nyic tulu gab, ngo muiyu-mvca mvdwb jitayin.

¹⁴‍Noqg cengma ko gvda lo noqg nyemaq tulu gab bon nyij mvdwb ngo nam mvtayin, hoggab ngoqg haaxaqnamv wm ak gurabnum hoqhv nwrba gob gutayin.”

¹⁵At Swa, no cengdo; ngam mwwpal hoo ngam kaa tvb, hoo ngam leen-parnbo tulungam ngoqgab kwly naato. Noqg atam mvtur sukho ngam aadob naapaq maabv; cengto noqg emin gab ngam benyi-beyanam sam tado.

¹⁶Noqg gomcwr tulungam kaapanum, hoo ngo hoq tulu ham dvnum, hoo noqg gomcwr tulungv ngam hemp dvb mvnum hoo ngoqg hangam hemp mvnum, hoggab ngo noqg eminam goqnum, Pwnbo, nyiit At Swa.

¹⁷Ngo twwxum bo tulug dvparho dooba maanum, ho ngo hwnyir-hvmar kamanum; ngo vpwb doonum, hoggab noqg alaqkv ngoqg aoso doonum, hoggab no ngam haaxaq lvgab bwwr mvpa ku.

¹⁸Hoggub ngoqg vcv cingin maadwn, ngoqg unv mwp lama dvn, mwp dvb haqpaq dvn? Iss dooma bo pobu kucw gwwi-gwwca namhvb, no ngam nyitayin yv?

¹⁹Hoqgab soq sib At Sw bedo: “No wkur baloqkam, ngo nam nookur tayin, hoo ngoqg agaho no daqtayin. Hoggv no xinam mam goolin baloqkam, hoo dooxa boam gooma baloqkam, no ngoqg agam hvb nyitayin. Bulv noqgab haatayin, hvbmabde no bulug dookub haanyiram.

²⁰Hoo soq nyiilu gab ngo nam tama gurumg nwqtumnam hvb mvtayin; bulv nam ceekol nyob pvrwqtayin, hvbmabde bulv nam mviya nyoram, hoggab noqg lvgab ngo dooba dvn nam ywwlinl hoo nam naalin tayin, At Sw bibwqdo.

²¹Ngo nam nyic-nyiag alaq hoqgv naalin tayin, hoo kwr-korbog nootunam hoqgv nam pvlyw tayin.”