Read Nyishi JERIMIYA 16 Bible Online

JERIMIYA 16 - Nyishi bible

JERIMIYA 16

¹At Swg gomcwrv ngam haanum:

²“No nywxw naamabv, ho soq nyook so no nyega ko ho nyem ko doomabv.

³‍Hoggab soq nyook so nyega ko hoo nyem ko bwwnam pagoqkam, hoo hiyv bulam ko bwwnbo ann tulug pagoqkam hoo bulam soq gvda so abwb ab swwnbo tulug pagoqkam, soq sib At Sw bedo:

⁴‍Al looda maanbo vc-ai hoqgv bulv sitayin. Bulv nyix-riikam ram, ho bulv svma liikam ram. Bulv ked aoho diix-dea gob nyitayin. Lyoqr orioq bvla dwr-kano lvgab bulv yuupaq tayin, hoo bulug svmangam doa pvtag hoo swcw soqg svdin tulug dvs gob nyitayin.

⁵“Hoggab soq sib At Sw bedo: Nyix-riidu ko nammwb haamabv, ho bul gab nyix-riitab ho mwwdwq dwqtab wmabv, hoggab ngoqg swrsongam, ngoqg tumanam abiam la aya mwwpanam mam, soq nyiilu soqgv naapaq pakun, At Sw bibwqdo.

⁶‍Soq gvda so anyo ge koi ge vnyi-vnyiv sitayin. Bulam svma liikram, hoo nyi akkam bul gab nyix-riiram ho mwv atv at dummam riqbin ram ho bul gab mwv atv dumbin dvb riqbin ram.

⁷‍Nyi akkam nyix-riinbo gab dvs mwjram, sigam gab mwam bet-bela ram, ho mwwg ab-ann sigam gab nyi akkam mwam bet-belal twws jiram.

⁸‍No dvmin-twwmin soomin ko nam urab, bulug lvgab dvl-twwl dootab wdwb nyiram.

⁹‍Hoggab soq sib Israelwg Pwnbo, nyiit At Sw bedo: Kaato, noqg kaaga hoola noqg aal tuluho, nyirminam yal gvla hempnam yalwg, nyem-nyega naal yal duk pengko ho, ngo soq nyook so cooikab dootayin.

¹⁰“Hoo hwdlo no soq gomcwr tulu sam soq nyiilu sam betayin, hoo bulv nam bedo, ‘Hoggub At Sw soq koi jaqb almanbo sam ngulam bekin gviyin? Hoggv ngulug nyixiaqkv? Hoggv ngulug Pwnbo At Swn ngulv ceekol nyic nyipa kun?’

¹¹‍ho no bulam betayin: ‘Hoggab noqg ab tulungv ngam haqpaq pakun, At Sw bibwqdo, hoo asaq pwnbo tulug kokwb wmin gvpa kun hoo bulam bon nyijil hoo xumnum, hoo ngam haqpaq paku hoo ngoqg pvvbam pvvk maab nyipa ku,

¹²‍hoo noqg ab tulungam no nyic yaab nyipa ku, hoggab kaato, nul nyiicwr-cwrxiv mwwg almab mwwnam mam, tamynam mam wmin gvdwn, ngam tagab dvb haqpaq poqdu do.

¹³‍Hoqgab no la noqg ab tulungv cengmako gvdab ngo nam soq gvda soqgv ruqlin tayin, hoo aal-aiyib no hoqho asaq pwnbo tulungam bon nyij tayin, hoggab ngo nam mwwsw kuram.’

¹⁴“Hoqgab, kaato, aalv hoodu do, At Sw bibwqdo, hwdlo hoqham hvl benyi kuram, ‘Israelwg nyiilungam Ijipt gvda hoqgv boolinbo At Sw swwl doodwn,’

¹⁵‍hvbmabde ‘Israelwg nyiilungam nyoodum gvda hoqgv la gvda mwlwb mwv bulam ruqpaqbo At Sw swwl doodwn.’ Hoggab ngo bulug ab tulungam jiknum gvda hoqgv ngo lokta bulam bulug at gvdab bookur tayin.

¹⁶“Kaato, ngo naleqgo ngui meng boam kanam gviyin, At Sw bibwqdo, hoo bulv bulam nootu tayin. Hoo kokwngam ngo naleqgo nyoro gaqn boam kanam tayin, hoo bulam puutu tuuxyho hoo yorn yorxy ho, hoo wlw lwwpwq tuluho bulv nyoro gaqtayin.

¹⁷‍Hoggab ngoqg vnyiqkv bulug lamta mwlwngam kaadwn. Bulv ngoqg hoqgv kvs lama dvn, ho bulug nyixiaqnamv ngoqg vnyiq hoqgv kvs lama dvn.

¹⁸‍Hvbmabde otuqcob ngo bulug nyixiaqkam la bulug nyicam vnyi yaag koi dvb jikur tayin, hoggab bulv ngoqg gvdangam bulug oyumnam murty tulug svma lvgab kacdvb mvpa ku, hoo ngoqg gumnam bulug bulum dvb nyinam hoqgv bwwr mvpa ku.”

¹⁹At Sw, ngoqg atorv hoo ngoqg cwwgwngv, vs-axaq aalam ngoqg cwwgwngv, swcw nvg ywwtwr hoqgv noqgab nyob tulungv haatayin hoo bedo: “Ngulug ab tulungv hog akkam otu nvvsiq kuma hvbmabde vm mvvnam mam, ximab niqtuq dooma bo pagoq tulungam naanum.

²⁰Nyiv mwwg atgab pwnbo tulungam mvla dvn yv? Hoq tuluhv pwnbo ma!”

²¹“Hoqgab, kaato, ngo bulam cengm dvb mvtayin, soq ak sam ngo bulam ngoqg huqlw ngamla ngoqg atoram cengtayin, hoo ngoqg eminv At Sw hvl bulv cengtayin.”