Read Nyishi JERIMIYA 17 Bible Online

JERIMIYA 17 - Nyishi bible

JERIMIYA 17

¹“Judag nyicam dvvcwg xeqnan lvgab xeqp pakun; viyin yvkiqtvl taqnan lvgab bulug hvvjw lwpia lo, hoo bulug yugw tuqtam lo tvqlwq pakun,

²‍ho jeenbo svvn tulu gvla yorn yorxy lvvg alo, bulug ko tulungv bulug yugw tulu ngamla bulug Aserim mam mwwpa dvn,

³‍bvbin ko nyook puutu aoho. Noqg aobo gvda mwlwho noqg nyic nyijo kor gob noqg gumnam la noqg uddum mam ngo muiyu-mvca mvdwb jitayin.

⁴‍Ngo nam otu nvvsiq mvdwb jiknam ham noqg alaq hoqgv no topaq tayin, hoo noqg cengma ko gvda lo noqg ceebio tulungam bon nyij mvdwb ngo nam mvtayin, hoggab ngoqg haaxaqnamv wm ak rwgabnum ho hv nwrba gob gutayin.”

⁵Soq sib At Sw bedo: “Hiyv nyiingam mwwgw dvn hoq nyi akv beenamv hoo hiyv hangv At Sw hoqgv wkurl aado dvn, mwwg aiyaqkam ator dvb mvdwn.

⁶Mwv diixa-rara ho nwmw ak hvb nyidwn, hoo albo haanam akkam kaapa ram. Mwv deexa-rarag goqc-goqyi bo nyook ho doogw tayin, nyi dooka maab deexa-rara nyook ho dootayin.

⁷“Hiyv At Swn mwwgw bo nyi akv xinam jaqkv, hiyv At Swn mwwgw dvn.

⁸Mwv pobu bviywrho svvn ak liinam hvb nyidwn, hoqg rwbv pobu daiyab mialin dvn, hoo hwdlo oggv haajaqkam bos maadwn, hoggab hoqg nwmwngv leelaq tvl dooky dvn, hoo jwwxa xvvd vnywngam mwwdwq maadwn, hoggab hoqhv aaxiam xeengin maab xeedwn.”

⁹Hangv hog mwlwngam xaalyo lyobin yaadwn hoo ceceq loodab vc dvn; hiyv ham cengla dvn?

¹⁰“Ngo At Sw hangam meegaq dvn hoo mwwnam mam pooka dvn, nyi vxiam mwwg lamta nyikjaqb, mwwg bon tulu nyijo aaxy hvbjaq jidwb.”

¹¹Pvtangv osup subtwl gumanam hvb mwv nyet swwnam, hvbmabde jvqtwb nyil swwmanum; mwwg swwca aalam hoq tuluhv mwam wleq tayin, hoo mwwg swwtar alo mwv paca gob nyitayin.

¹²Nyirab hoqgv yuunam ao gob mvpnam pwqlw hv ngulug dvrwq namlo kediv.

¹³At Swa, Israelwg svqgwngv, hiyv nam haqpaqbo mwlwngam hvnyw moolw mvtayin; hiyv noqg hoqgv aadob wleq boam swcw so xeql aptayin, hoggab swwl doon bo iss subuqkam, bulv At Swn haqpaq pakun.

¹⁴Ngam mwptvb, At Swa, hoo ngam mwptayin; ngam ywwlin tvb, hoo ngam ywwlin tayin, hoggab no ngoqg paqnamv.

¹⁵Kaato, bulv ngam bedo, “Hogloq ho At Swg gomcwrv? Hoqham haamto!”

¹⁶Noqg sviya rvky bob nyitwl ngo hoqgv kelinl kepaq ma, ho ngo vcnam moodam mwwby ma. No cengdo hoggv ngoqg nvbcwr soqgv lengnum; hoqhv noqg kaagaho doonum.

¹⁷Ngam bos som mvmabv; ciqcaq-bviyaq aalam no ngoqg cwwgwngv.

¹⁸Hiyv ngam leed-pardwn ham hvnyw moolw mvto, hvbmabde ngam hvnyw moolw mvmabv; bulam mwwdwq mvto, hvbmabde ngam mwwdwq mvmabv; bulug aoho ciqcaq-bviyaqnam moodam haamto; bulam looba yaadwb twrl oyu-aca dvb twrto!

¹⁹‍Soq sib At Sw ngam benum: “Wn hoo Nyiilug Toggoqho daqta, hogloqb Judag lvpw atv haadwn hoo hogloqb bulv lvvgwb lengdwn, hoo Jerusalem toggoq tulu mwlwho,

²⁰‍hoo beto: ‘At Swg gomcwr sam tato, Judag lvpw at tulungv, hoo Judag nyi mwlwngv, hoo Jerusalemho doonbo nyi mwlwngv, hiyv hoq toggoq tuluho haadwn.

²¹‍Soq sib At Sw bedo: Noqg swwgam gab no hengab to, hoo Doonu aalam vgw baqmabv ho hoqham Jerusalem toggoq tulu hookam baqal haamabv.

²²‍Hoo Doonu aalam noqg nam hoqgv vgw baqlin maabv ho nyis akkam nyimabv, hvbmabde ngo nulug ab tulungam gaml jiknam hvb, Doonu aalam dvrwqb pvvto.

²³‍Hvbsujaqkam bulv tagabl ho ruucw kwrgab maanum, hvbmabde bulug lwwpongv xwqda tvl doonum, ho bulv tomswrnam mam tapal svgagvrwq maadwn.

²⁴“‘Hvbmabde nulv ngam taab nyiloqkam, At Sw bibwqdo, hoo Doonu aalam soq bopamg toggoq tulu soqgv vgw baqamabv, hvbmabde Doonu aalam dvrwqb pvvto hoo hoq aalam bonam nyimabv,

²⁵‍ho Debidg pwqlw ho doonbo lvpw atv la nyem kov soq bopam toggoq tuluho haatayin, bulv la bulug saab tulungv, Judag nyi tulu ngvla Jerusalemho doonbo nyi mwlwngv, ceriot tulu ngvla svpur lvgab xara tayin. Hoo soq bopam so nwrba gob nyiv dootayin.

²⁶‍Hoo Judag bopam tulu hoqgv la Jerusalem bviywr nyook hoqg nyiilungv, Benjaminwg gvda hoqgv, Sepela hoqgv, diisw gvda hoqgv, hoo Negeb hoqgv haatayin, boyuqnam akiam la pwr jinam tulungam, cwrm-malo ngamla sungam bo akiam, hoo paqyalinco akiam At Swg namlo ho baqatayin.

²⁷‍Hvbmabde nulv ngam tama baloqkam, Doonu aalam dvrwqb pvvma baloqkam, hoo Doonu aalam Jerusalem toggoq tulub vgw baqtwl haama baloqkam, ho ngo hoq toggoq tuluho wm parlwq tayin, hoo hoqhv Jerusalem nyook tulungam guiyum tayin hoo ham mwmiq nyoram.’”