Read Nyishi JERIMIYA 18 Bible Online

JERIMIYA 18 - Nyishi bible

JERIMIYA 18

¹At Sw hoqgv Jerimiyanvn gomcwrv haanum:

²“Gorabto, hoo pwcw mvnbo nam urab haano, hoo ngo alo nam ngoqg gomcwram tapa mvtayin.”

³‍Hoqgab ngo pwcw mvnbo nammwb haanum, hoo mwwg pwcw ywrn nanho mwv bon nyidul doonum.

⁴‍Hoo pwcw mvnbo alaqho mwwg mudunam pwcwngv almab nyinum, hoo pwcw mvnbov hoqham mwwg kvvlwql kangam dvb, mwv hoqham pwcw cwsaq gob ya mvknum.

⁵‍Ho At Swg gomcwrv ngam haanum:

⁶“Israelwg nombunga, ngo nam soq pwcw mvnbo si hoggub pwcwngam mvknum hvb ngo mvnyiram yv? At Sw bibwqdo. Kaato, deekam mam hoggub pwcw mvnbo alaqho doodwn, hvb kalam nulv ngoqg alaqsi doodwn, Israelwg nombunga.

⁷‍Hwdlo moodam jaqkam nyob hoolu gvla lvpw-haty akwg pagoqkam ngo bibwq ladwn, ho ham ngo buusuq dvbkam hoo mudupl hoo twrm dvb,

⁸‍hoo hoq nyob pagoq gab ngoqg goonam tuluhv, alman hoqgv wkur kuba loqkam, ngo bulam tuugabl ciqcaq-bviyaq haam tanam mam, ngo naapaq jitayin.

⁹‍Hoo hwdlo moodam jaqkam nyob hoolu gvla lvpw-haty akwg pagoqkam ngo bibwq ladwn, ho ham ngo nam mvd bvkam hoo liid bvkam,

¹⁰‍hoo hoqhv ngoqg kaaga so almab nyib nyiloqkam, ngoqg yalam tama baloqkam, ho ngo bulam alboam tuugabl jitanam mam ngo jikram.

¹¹‍Sija, hoqgab, Judag nyiilu ngamla Jerusalemho doonbo nyi tulungam beto: ‘Soq sib At Sw bedo, kaato, ngo nam ceekol ciqcaq-bviyaq dvb modu dvn hoo nam ceekol alman nyidwb nyidu dvn. Nyi vxiv mwwg almab nyinam hoqgv wkur tuku, hoo noqg lamta ngamla noqg nyinam mam nyidar tuku.’

¹²“Hvbmabde bulv bedo, ‘Hoqhv niqtuq dookma! Ngulug atwg mwwkwb ngulv nyitayin, hoo nyi vxiv mwwg almanbo hangam baqtwl tameql dootayin.’

¹³“Hoqgab soq sib At Sw bedo: Nyob pengko lo toxto, hiyv soq sib tapa dvn? Israelwg mvvngamv nyimur jaqkam nyipa ku.

¹⁴Lebanonwg tapamv Sirionwg puutu hoqgv jiqpaq dvn yv? Hviyiq tvl puutug hoqg iss tonbov xootwr dvn yv?

¹⁵Hvbmabde ngoqg nyiilungv ngam mwwpa kuma; xaalyo bo pwnbo tulungam bulv aky jidu do; otuqg lamta tuluho, bulug lamta tulungv bulam dwqtup dvb mvnum, hoo lamta paadaho wmab, lamta bviywrb wdo,

¹⁶bulug gvdangam bos-kaac dvb mudu do, hoq pagoqkam nwrba gob xwwl doodo. Nyiicwr-cwrxiv hoqb wpeq yin hoqg bos-kac kaapa tvl mwwg dumpongv piwr do.

¹⁷Dou-cagag dooi hvb ngo bulam ceebio agaho cwrsaq-bvraqb mvtayin. Bulug ciqcaq-bviyaq aalam, ngoqg nyuqm mam ma, ngoqg langkam ngo kaakin tayin.”

¹⁸‍Ho bulv benum, “Haato, kuj ngulv Jerimiyanvn ceeko gvdwl almab nyituj, ho nyub tulu hoqgv, mwwlaql tomswr-honynam hoqgv, ho nyiqry benbo tulu hoqgv pvvbv nyiiram. Haato, kuj ngulv mwam agam lvgab bex-bela tuj, hoo kuj ngulv mwwg gomcwr tulungam tagab yooju.”

¹⁹Ngam tato, At Swa, hoo ngoqg ceebio tulu hoqg yalam tato.

²⁰Alwb nyinam mam alman gob nyirwq dvn yv? Hvbsujaqkam bulv ngoqg swwg gab ung ug dup paku. Mwwpa to ngo hoggub noqg agaho daqtwl noqg hang lingtwrnam hoqgv aadob keleq mvdwb, bulug algab agam goonum.

²¹Hoqgab bulug ko hury tulungam dwr-kano ho jipaqto; bulam lyoqr orioq niqtuqho jito; bulug nywxw tulungam ko doomab hoo xwwmib nyimto. Bulug nyega tulungam dooi-palam ho simto, bulug tuudy-yaamy tulungam nyob pak lyoqr orioq lvgab paxy mvto.

²²Hwdlo no bulug aoho haqmapaqb naareqnam mam haam yin, bulug nam hoqgv xabnam mam tapa mvto! Hoggab bulv ngam mengdwb ung ug dup paku hoo ngoqg lvpiangam hoqtu mvdwb pwd-poto mvp paku.

²³Hvbsujaqkam no, At Swa, bulug hima bwwl ngam mengtanam mam cengdo. Bulug nyixiaqnam mam apaqmabv, ho noqg kaaga hoqgv bulug nyicam tipaq maabv. Bulam noqg agaho mviya mvto; bulam noqg haaxaq de mood hoqg bonam nyito.