Read Nyishi JERIMIYA 19 Bible Online

JERIMIYA 19 - Nyishi bible

JERIMIYA 19

¹Soq sib At Sw bedo, “Wno, pwcw mvnbog deekam yooxaqlo ak rvto, hoo nyiilug nyiixa tulungam hoo nyub buxa bo tuugin naato,

²‍hoo Hinnom ko tuupwg Lywpa Potsard Toggoqho agab lengto, hoo ngo nam betamnam gomcwr tulungam alo pui bepa to.

³‍No beta, ‘At Swg gomcwram tato, Judag lvpw at tulunga, hoo Jerusalemwg doonbo nyi tulunga. Soq sib Israelwg Pwnbov, nyiit At Sw bedo: Kaato, ngo soq gvda so hvbjaq ciqcaq-bviyaqkam haam tayin ho ham tapa bo nyiicwr-cwrxig nyurungv hvitayin.

⁴‍Hoggab nyiilungv ngam haqpaq paku hoo hiyam bulv la bulug ab tulungv ho Judag lvpw at tulungv cengkam maanam asaq pwnbo tulungam aky jil soq gvdangam kacdvb mvpa ku; hoo nyiisam nyiingam mengnam hoqgv soq gvdangam bulv bwwr mvpa ku,

⁵‍hoo ao dvb Baalwg murty tulungam mvtwl bulug tuup tulungam wm parl boyuqnam aky gob Baalnvn jido, hogloq ham ngo gaml jikam ma ho pvvb bvkam gooma, ho ngo mwwmiq kamanum-

⁶‍hoqgab, kaato, aalv hoodu do, At Sw bibwqdo, soq nyook sam Topet hvl, Hinnomwg Ko tuupwg Lywpangv hvl nyi akkam goqram, hvbmabde Mingkumko Lywpangv hvl goqtayin.

⁷‍Hoo soq nyook so ngo Juda gvla Jerusalemwg mwol nyitanam mam asar dvb mvtayin, hoo bulug nyiilungam bulug nyemaq tulug agaho lyoqr orioq niqtuqb haam tayin, hoo bulug swwgam meegaqbo alaqb haam tayin. Ngo bulug svma tulungam doag pvta tulu gab hoo gvdag svdin tulug dvs gob jitayin.

⁸‍Hoo ngo soq bopam sam bos kaapa dvb, hoo bej-beparnum pagoq akgob mvtayin. Nyiicwr-cwrxiv hoqb wpeq bov lomtayin hoo hoqg un tulu gab bej-bepar tayin.

⁹‍Hoo ngo bulam bulug ko tulug vdinam dvm dvb mvtayin, hoo bulam doqyuml naareq ko-gab la bulug ciqcaq-bviyaq ko-gab nyiicwr-cwrxiv bulug door-doopwg vdinam dvtayin, bulug nyemaq tulu ngvla ho bulug swwgam meegaq bov bulam hentwr hem tayin.’

¹⁰“Ho noqg lvgab wmin gvnbo nyi tulug kaagaho no yooxaqkam tubdup tayin,

¹¹‍hoo bulam betayin, ‘Soq sib nyiit At Sw bedo: Hoqhvb kalam ngo soq nyiilu sam la soq bopam sam mvpia tayin, nyi ak pwcw mvnbog pwcwngam mudupnam hvb, ho hoqham nywywngam mvdar kuram. Nyi tulungam liik nyook asaq dooma ko-gab Topet ho liitayin.

¹²‍Hoqhvb ngo soq nyook sam mvtayin, At Sw bibwqdo, hoo hoqho doonbo mwlwngam, Topet hvb soq bopam sam mvtayin.

¹³‍Jerusalemwg nam tulu ngvla Judag lvpw tulug nombu tulungam-hiyvg nam mwwlo tulungam doangam aky jipa kun, hoo asaq pwnbog aoho twwnam akiam tool jipa kun-hoqhv Topet nyookam muburnam hvb mubur tayin.’”

¹⁴‍Ho hogloq ho mwam At Sw nyiqry bem dvb kanam namk Topet hoqgv, Jerimiya haanum, hoo mwv At Swg nam baagho daqtwl hoo nyiilu mwlwngam benum:

¹⁵“Soq sib Israelwg Pwnbo, nyiit At Sw bedo, kaato, ngo soq bopam so la pamda mwlwho ngoqg ceekol ciqcaq-bviyaq mvdwb beknum ham hoodu mvdwn, hoggab bulug lwwpongam bulv nywwkub kuma, ngoqg gomcwr tulungam tadwb haqpaq poqdu do.”