Read Nyishi JERIMIYA 2 Bible Online

JERIMIYA 2 - Nyishi bible

JERIMIYA 2

¹At Swg gomcwrv ngam haal begamv,

²“Wno Jerusalem mam tapa dvb pui beta, soq sib At Sw bedo, “Noqg tuudy-yaamy ho dengkib nyinam mam ngo mwwpa dvn, noqg abynamv tvmw akv hvb, deexa-raraho hoo gvda vly liika maak ho no hoggub ngam wmin gvnum ham ngo mwwpa dvn.

³Israelv At Sw gab dvrwqnum, mwwg vly naam hoqgv aaxy xeeco bov. Hoqham dvnbo mwlwngam gunyingam goqlwqnum; bulug aoho ciqcaq-bviyaqkv haanum, At Sw bibwqdo.”

⁴‍Jakub nombunga, hoo Israelwg nombug hoolu mwlwngv, At Swg gomcwram tato.

⁵‍Soq sib At Sw bedo: “Hognvk nyixiaqkv nulug ab tulungv ngoqg lvgab kaapa tvl bulv ngoqg soqgv aadob wnum, hoo bulv ximanam lvgab wmin gvnum hoo hoggub bulam xik maanum?

⁶Bulv hvl bema, ‘Ngulam Ijipt gvda hoqgv boolinbov, ngulam deexa-raraho hoqgv, ho diixa-rara hoo ung-rung gvda hoqgv, ho iss dooma ko gvda gvla kan twdwqko gvda hoqgv, ho nywywngam nyi wka maanam gvda hoqgv, nyi dooma ko gvda hoqgv wgbo, At Sw hoglo?

⁷Hoo nulam diibuqbo gvda ura si boolwq pakun hoqg aaxy tulungam la hoqg albo dvs tulungam dvm dvb. Hvbmabde hwdlo nulv haanum, nulv ngoqg gvdangam kacdvb mvnum hoo ngoqg gumn otungam bulum-kac dvb mvnum.

⁸Nyub tulungv hvl bekma, ‘At Sw hoglo yu?’ Pvvb bwwl doogbo tulungv ngam cengk ma; sviya rvkybo tulungv ngam ceekol nyimurnum; nyiqry benbo tulungv Baalwg nyiqriam benum hoo niqtuq dooma bo pagoq kokwb wmin gvnum.

⁹“Hoqgab nulug lvgab ngo hvraq ai-heedwn, At Sw bibwqdo, hoo nulug ko hosiq-hosiq lvgab ngo ai-heetayin.

¹⁰Hoggab soiyoq nyookwg Saipras ho rabg dvl kaaka to, ho Kedarho kanam tvl hengabl pooiyeq mvto; soq svkwg pagoqkam hoq nyook tuluho kaapa yiba dwq.

¹¹Bulv pwnbo tulu maasu hvbsujaqkam, nyob akv hoqg pwnbo tulungam kwly dvn yv? Hvbmabde ngoqg nyiilungv bulug yuunam mam niqtuq dooma boam kwly paku.

¹²Ao lvpwnga, soq so, lomtwr twrya to; lomduq xaxa to, twrkub dooxa bogub nyitku, At Sw bibwqdo,

¹³hoggab ngoqg nyiilungv almanam vnyi jaqg nyipa ku: bulv ngam tol doonbo swwg issam, haqpaq paku, hoo bulv atv sokum mam dukoq sunum hoqhv yaqpia tvl issiv hengl doonyi maadwn.

¹⁴“Israelv nyera ngvi yv? Mwv nomdu hoqg dwrbuqnam nyera ngvi yv? Honyiloq hoggab mwv laqm baqn bob nyidkun?

¹⁵Sony nyot tulungv mwam ceekol dugum gumnum; bulv vcjaqb dugum gumdo. Bulv mwwg gvdangam dooxa dvb mvpa ku; mwwg bopam tuluho nyi akam doom mvma dvb mucu-mviya paku.

¹⁶Hoq aoho, Mempis la Tapanes nyi tulungv noqg dumpo hoq ywr dumtup pam naapaq paku.

¹⁷Hwdlo nam lamta ho mwv bool wdu yikho, noqg Pwnbo At Swn haqpaq ko-gab, no soq sam atv noqg aoho nyipup suma yv?

¹⁸Hoo sija no Nail issam twwtab Ijiptwb wlayil hoggv niqtuq lengpa ku? Ho no Iupratas issam twwtab Assiriyab wnamv hoggv niqtuq lengpa ku?

¹⁹Noqg almab nyinamv nam laqm baqm tayin, hoo noqg mwwjw maab nyinamv nam benyi-beya tayin. No cengto hoo kaato noqg Pwnbo At Swn haqpaqnamv noqgab almab la kacaq tayin; noqg lvgab ngam bosnanv dooma, nyiit Pwnbo At Sw bibwqdo.

²⁰“Hoggab kol ngo noqg vgwngam mvpianum hoo nam raqpnam mam toosuqnum; hvbmabde no benum, ‘Ngo nyis nyiram.’ Vv, yorn yorxy ho hoo svvn nwwxy niikumho no dvqmw bo nyem nyinam hvb xumsam-xumyaml xumkarnum.

²¹Hvbsujaqkam ngo nam daalinam akarbo roo aaxy akwb liinum. Hoggub no xima dvb nyikub dvn hoo nyoro roo gob ya nyipa kun?

²²No atv tac cola la sabon lvgab hwrxaqnum, hvbsujaqkam noqg nyimur kac kaqtaqnamv ngoqg aga si doodo, At Sw bibwqdo.

²³No hoggub bela kinto, ‘Ngo kac ma hvl, ngo Baal tulug kokwb wma pan hvl’? Lywpa ho noqg wk lamtangam kaaka to; ho cengto no hoggv nyipa kun— anyobo svjinv toloq-boloq nyoma twqb xarkarl nyidu do,

²⁴nyoro svdamv deexa-rara lo gaql yvdwn, ho mwnwg miinwnam mam dooi suugaq dvn! Hiyv mwnwg mwwbynam mam mvtur nyotayin? Mwnwg miinwnam mam meegaq bov hiyvkam ngaama dvn; mwnwg miid poolam bulv mwnwn kaapa tayin.

²⁵Noqg lvpia asarb wdynam mam wngin tuku hoo noqg hvngwram ngwrgin tuku. Hvbmabde no benum, ‘Soq si svqgw dooma, hoggab ngo nyoodo nyi tulungam aby paku, hoo bulug kokwb ngo wmin gvtayin.’

²⁶“Hwdlo dvco boam nootu yin hvnywnam hvbkalam, Israelwg nombungv hvnyw tayin: bulv atv, bulug lvpw at tulungv, bulug saab tulungv, bulug nyub tulungv, hoo bulug nyiqry benbo tulungv,

²⁷hiyv svvnam bedwn, ‘No ngoqg abv,’ hoo wlwngam bedwn, ‘No ngam dwrbuqn bov.’ Hoggab bulug langkam bulv ngam pwrj paku, hoo bulug nyuqm mam kaakin kuma. Hvbmabde bulug vs-axaq moodam bulv bedwn, ‘Gorab gvdwl ngulam ywwtwb!’

²⁸Hvbmabde noqgab atv mvsnam pwnbo tulungv hoglo? Bulam daqrab mvto, noqg vs-axaq moodam, bulv nam ywwlin yindy nyiloqkam; hoggab noqg bopamv hog hwdwg doodwn, hwdkalam go noqg pwnbov tulungv doodo, Judanga.

²⁹“Hoggub nulv ngam ai heedwn? Nulv ngam hog mwlwho ceekol nyimur nyipa ku, At Sw bibwqdo.

³⁰Jwwnyib ngo nulug ko tulungam jwwn mvi yv; bulv bedarl tomswrnam mam tamanum; roogumbo sony nyotv hoggub dvnw dvn hvbkalam nulug nyiqry benbo tulungam nulug atwg lyoqr orioqkv nwqlwqnum.

³¹Hoo nulv, ko hosiq tulunga, At Swg agam mam tato. Ngo Israel gab deexa-raraho gob nyin mvi yv ho kan twdwq ko gvda gob nyin mvi yv? Hvnyiloqkam ngoqg nyiilungv hoggab bedwn, ‘Ngulv nyuum kuma, ngulv noqg dookub lokkam haakram hvdwn’?

³²Nyem mvvngam akv mwnwg muny-tvswngam ho tvmw akv mwnwg gujam mwwpa maab nyinyi tai nvi yv? Hvbmabde ngoqg nyiilungv aal xila kuma dvb ngam mwwpa kuma.

³³“Hog hwdgo noqg abiam no kaapa dvb meegaq tayin! Hoqgab nyic-nyiabo dvn tulungam kam noqg lamtangam tomswr paku.

³⁴Noqg vj tulu hookam yolu doomab jwwgwbo nyi tulug swwg hijum jarxabnam mam kaapa paku; bulam mvpia dvb no kaapa maadwn. Hvbsujaqkam soq mwlwg pagoq soqgv

³⁵no bedo, ‘Ngo svswq nyiv; jvqtw jaqb mwwg haaxaqnamv ngoqg soqgv wn kun.’ Kaato, ngo nam pw-hwwk ho boa tayin, hoggab begamv, ‘Ngo nyic nyima pakun.’

³⁶Hog hwdgo, noqg lamtangam no kwlil gaqkar yvtayin! Assiriyangv hoggub nam hvnyw moolw dvb mvnum hvbkalam nam Ijipt nyi tulungv hvnyw moolw dvb mvtayin.

³⁷Hoq hoqkv kam noqg alaqkam noqg dumpo ho no mamdaq tvl haatayin, hoggab no hiyam mwwgwnam ham At Sw haqpaq paku, hoo bulug hoqgv no swwk-geekram.